Ukwipayaulula Kwapalana ne Nkondo
ILYO Marilyn uwa myaka 23 aondele no kuyumfwa ukupwa, atungenye ukuti pambi mulandu wa kwimita aimite pali ndakai. Na kabili alikwete icifuba cabulo kuputuka, ico alondolwelele dokota wakwe. Dokota atile ni mpito sha kupemenamo isha pa muulu e shaingiliilwe no bulwele kabili amulembele umuti. Pa numa, Marilyn alisakamikwe cibi lintu atendeke ukupuuka ilibe ku tulo. Abweleele kuli dokota wakwe, uwamupekanishishe ukuyakopwa X ray mu cifuba.
Icinshingwa cafituluka icamwenwe pa cikope ca X ray, cafwaikwe ukubombelapo mu kampampa, lelo calyafishe ukusanga ukwali Marilyn ukubomfya telefoni. Marilyn atile, “dokota afwailishe ukwali bamayo no kubeba ukuti nalilwele icine cine. Bamayo baishile mu kumfwaya no kunjeba ukuya kuli [dokota] mu kwangufyanya. Dokota antumine ku cipatala uko nailekopwa X-ray na umbi kabili balinteekele mu cipatala.”
Caponeshe Marilyn pa musao ukusango kuti alwele icifuba ca TB. Atontonkenye ukuti ali no kufwa, lelo pa numa ya kundapwa ne miti ya TB, mu kwangufyanya alipolele bwino bwino.
Kuti twaumfwikisha ukusunguka kwa kwa Marilyn pa kulwala icifuba ca TB. Te patali sana, nangu fye bantu basambilila ifya butuntulu bwa bumi abengi basumine ukuti icifuba ca TB calicimfiwe mu fyalo fikankaala. Umubomfi wa cipatala cinono pa ncende ya kundapilapo abalwele mu London, atile, “naletontonkanya ukuti icifuba ca TB calicimfiwe ukupala icikuko. Lelo ilyo naishile mu kubombela kuno, nasangile ukuti e ko cicili kabili cileya cilefulilako mu kati ka musumba.”
Mu ncende umo icifuba ca TB capwile, calibweluluka; umo cashele, calyanana icabipisha. Mu cifulo ca kucicimfya, icifuba ca TB ni kepaya uwalingana fye ne nkondo ne cipowe. Langulukeni fi:
◼ Te mulandu no kulunduluka kwa kusungusha ukwa muno nshiku mu fya miti, icifuba ca TB calipaya abantu mupepi na mamilioni 200 pa myaka 100 iyapitapo.
◼ Ukufika ku bantu amabilioni yabili—iciputulwa calenga fitatu ica bantu bonse pe sonde—kale kale balyambukilwa no musango wa kashishi kaleta icifuba ca TB aka bacillus. Ukulundapo pali cila sekondi, kulabako umuntu umbi uwambukilwa ne cifuba ca TB!
◼ Mu 1995 impendwa ya bantu abakwete icifuba ca TB ica kuti nacimoneka no kumoneka yali mupepi na mamilioni 22. Mupepi na mamilioni yatatu balifwile, abengi pali aba ba mu fyalo ifipiina.
Mulandu nshi ubu bulwele butwalilila ukucululusha abantunse, ilyo kwaliba ne miti yakwatisha amaka iya kubucimfya? Bushe bukatala abucimfiwa? Bushe kwalibako inshila iili yonse iya kuicingililamo kuli bwene? Ifipande fikonkelepo fyalaasuka ifyo fipusho.
[Abatusuminishe Ukubomfya Icikope pe bula 3]
New Jersey Medical School—National Tuberculosis Center