Bushe Ubutuntulu bwa Bumi Ubwapwililika ca Kwelenganya Fye?
BUSHE mwalitala amulwalapo sana nelyo ukuya ku opareshoni iyatapata nga nshi? Nga ni fyo, napamo mwalitesekesha sana ubumi pali nomba. Lelo te mulandu na fintu ubutuntulu bwenu ubwa bumi bwaba, bushe mwalisumine fyo kuti mwaba no butuntulu bwa bumi ubwapwililika? Napamo ici kuti camoneka nge cishili ca cine cine pa mulandu wa malwele yabipisha pamo nga kansa nelyo ubulwele bwa ku mutima. Ca cine, mu nshita mu nshita fwe bengi tulalwala. Nalyo line, ubutuntulu bwapwililika te ca kwelenganya fye.
Abantunse bapangilwe ukuba no butuntulu bwa bumi ubwapwililika, te kulalwishanya no kulwala ne mfwa. E co, pa kulwisha ukulwala ne mfwa, Yehova apayenye inshila ya kukwatilamo ubutuntulu ubwa bumi ubwapwililika no mweo wa muyayaya ukupitila mwi lambo lya cilubula ilya kwa Kristu Yesu. “Lesa atemenwe aba pano isonde ukutemwa kwa kuti apeele Umwana wakwe uwafyalwa eka, ukuti onse uumutetekela eonaika, lelo abe no mweo wa muyayaya.” (Yohane 3:16) Abo abakekala ku ciyayaya mu calo cipya ica kwa Lesa tabakalelwishanya no kulwala nelyo ubukote. Apo e fyo cikaba, cinshi cikacitika ku malwele?
Ukutauluka ku Kulwala
Imyundapile ya kwa Yesu Kristu ipayanya fintu ukundapa kukabako. Casoselwe pa lwa kundapwa kwa ifi ukuti: “Impofu shilemona, abalemana amolu baleenda, aba fibashi balesangululwa, na bankomamatwi baleumfwa; na bafwa balebuushiwa; na babusu balebililwe mbila nsuma.” (Mateo 11:3-5) Cine cine, bonse abalemana abaile kuli Yesu “baliposhiwe.” (Mateo 14:36) E calengele na “mabumba ukupapa pa kumona bacibulu balasosa, abalemana baba abatuntulu, abalemana amolu balaenda, ne mpofu shalamona: na bo bacindike Lesa wa kwa Israele.”—Mateo 15:31.
Cine cine, nangula ca kuti takuli nangu umo ilelo uwingondapa nge fi, kuti twacetekelo kuti mu kuteka kwa kwa Lesa abantunse bakapwililika, bakaposhiwa ku malwele ya muntontonkanya na ya mubili yonse. Ubulayo bwa kwa Lesa bwalembwa pa Ukusokolola 21:3, 4 butila: “Moneni, ubwikalo bwa kwa Lesa buli pamo na bantu, kabili akekalilila pamo na bo; na bo bakaba abantu bakwe, na Lesa umwine akaba pamo na bo: kabili akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.”
Citontonkanyeni—icalo icishakakabile utwampani tupango muti nelyo ifipatala, amaopareshoni, nelyo ukundapwa! Ukulundapo, tamwakabe ukupopomenwa no kulwala kwa muntontonkanya mu Paradise wabweshiwa. Ubumi bukaba ubwa buseko icine icine; kabili insansa, shikabako pe fye. Cine cine, amaka ya kwa Lesa ayashingalinganishiwako yakabukulula amaka ya mubili aya kuyundapa, no kumwenamo mu cilubula kukafumyapo ukusonga kwabipisha ukwa lubembu. “Umwikashi wa mu calo takasose, ati, Nindwala.”—Esaya 33:24.
Mwandi lisubilo lishaiwamina ilya kuba no butuntulu bwa ku mubili no bwa ku mupashi ubwapwililika mu kuteka kwa Bufumu bwa kwa Lesa! Ilintu mulesungilila ubumi bwashikatala ubutuntulu ilelo, muleenekela amapaalo ya ku ntanshi mu calo cipya ica kwa Lesa. Shi Yehova ‘engekusha akanwa kenu ne fisuma, ukuti ubwaice bwenu bulengwe cipya cipya nga kapumpe.’—Ilumbo 103:5.