Ukumfwila ku Menso
CINSHI caba amakii pa kutunguluka mu kumfwana bwino na Nkomamatwi? Kuloleshanya bwino bwino. Ici cilafwaikwa lintu Bankomamatwi balelanda. Na kuba, nga ca kuti abantu babili balelanda mu lulimi lwa bankomamatwi ulwa kubomfya ifishibilo, umo nga alolesha kumbi, cimonwa ngo kubulwo mucinshi. Ni shani fintu mwingacebusha Nkomamatwi? Mu cifulo ca kumwita ishina, caliwamapo ukumupampansha pa kubeya nelyo pa kuboko, nangu ukupeepesha ukuboko uko aloleshe. Nga ca kuti ali apatali, kuti mwaeba umbi ukumucebusha. Ukulingana ne mibele, kuti mwakonkonsha pa nshi nelyo ukushimya no kwasha amalaiti. Ishi nshila sha kucebushishamo na shimbipo shilafwilisha fintu Bankomamatwi bapitamo kabili balashibomfya.
Icikakilo ca Kwikatanya ica Lulimi
Lintu bakumanya Nkomamatwi, bamo batila bankomamatwi bonse balomfwa cintu umuntu alelanda pa kulolesha imilomo yakwe cintu cayanguka. Nangu cibe fyo, Bankomamatwi abengi, bacimona nge nshila yapelela nga nshi iya kumfwaninamo. Kwena, bambi te fyo caba, ca cine bamo balilamuka sana mu kwishiba cintu umuntu alelanda pa kulolesha imilomo yakwe. Lelo kuti caba cikuuku ukukanatontonkanya ukuti umo kuti aishiba cintu mulelanda pa kulolesha imilomo yenu. Napamo ukukwata kapilibula nelyo ukulalemba fintu mulefwaya ukulanda kuti kwalenga ukuti mumfwane bwino eyefilyako.
Nangu cibe fyo, nga ca kuti mulakumanya Bankomamatwi lyonse, bushe te kuti cibe kulangulukilako ukusambililako ululimi lwa bankomamatwi ulwa kubomfya ifishibilo? Fintu ico cingalundulula icikakilo cishaiwamina, maka maka pa kati ka bapepa kumo kwine! Calipalana no kusambilila ifya kutendekelako ifya lulimi lumbi ku ncende ilandwamo indimi shibili. Pa nshita yalepa Inte sha kwa Yehova shilafwaya ukulenga bonse ukwishiba Yehova Lesa. Lintu twailuko kuti Bankomamatwi te kuti basambilile ukumfwa na matwi, fintu cingawamisha nga twaiteulula ukulingana ne mibele yabo ukupitila mu kubomfya ululimi lwa bankomamatwi ulwa kubomfya ifishibilo!—1 Abena Korinti 9:20-22.
Antonino alanda ukuti lintu atendeke ukusangwa ku kulongana kwa Bwina Kristu ku Italy, pa kutendeka “takwali ukukoseleshanya kwine kwine kabili ukwacincila mu kulanshanya na bamunyina abaleumfwa. Apantu tatwaleyumfwikisha, naleyumfwa kwati ndi neka.” Abengi mu cilonganino balyankwileko ukupitila mu kusambilila Italian Sign Language (LIS). Bankomamatwi abalesekelela batendeke ukusambilila Baibolo, kabili ukulongana kwalebako muli LIS. Antonino alikoseleshiwe kabili nomba afwaisha “ukulanda ne fibusa fyandi fyonse Bankomamatwi pa lwa kulongana no kutemwa ukwaba pa kati ka Nte sha kwa Yehova.”
Mwi sonde lyonse Inte sha kwa Yehova shilepanga ifilonganino fya ndimi sha bankomamatwi, muntu Bankomamatwi baleipakisha ukubishanya kwa kutemwa. Ku Spain, utumabumba twa lulimi lwa bankomamatwi ulwa kubomfya ifishibilo twalibako pa myaka ukucila pali 20. Pali nomba ku United States kwaba ifilonganino 19 ifya Bankomamatwi, no tumabumba 47.
Bankomamatwi kuti baba abatumikishi ba nshita yonse (bapainiya), ababomfi batumikila, na baeluda kabili kuti balanda amalyashi pa mabungano, kuti basambilisha mwi Sukulu lya Mulimo wa Bupainiya, no kutungulula mu nshila shapusanapusana. Muli ino mibele tamwaba ukupelela, lelo mwaba fye amashuko ya kulumbanya Yehova ukubomfya ukulamuka kwa muntu umo umo.
Ukufwaisha kwesu ukwa cifyalilwa ukwa kuba ne fibusa no kumfwana kumonekela mu nshila ishingi ne ndimi mwi sonde lyonse. Mu cifulo ca kumona Bankomamatwi nga bashingacita nangu cimo, fintu cingacilapo kuwama nga twalolekesha pa fintu baabomba, fintu balamuka, ne mibele iitulenga ukuba abantunse! Pa kucindika bambi no kuba abaitemenwa ukuteuluka, kuti twasangwilako ku lupwa ulwabamo abantu bapusanapusana lelo ulwaikatana.
[Icikope pe bula 16]
Lintu mulelanshanya mu lulimi lwa bankomamatwi ulwa kubomfya ifishibilo, twalilileni ukuloleshanya mu menso
[Icikope pe bula 16]
Bankomamatwi balabomba mu nsansa nga batumikishi ba nshita yonse
[Icikope pe bula 17]
Ukwimba inyimbo sha Bufumu mu Spain
[Icikope pe bula 17]
Ukulande lyashi pe bungano muli Korean Sign Language (Ululimi lwa Bankomamatwi Ulwa Kubomfya Ifishibilo ulwa ku Korea)
[Icikope pe bula 17]
Impapulo shashimpwa pali Baibolo mu lulimi lwa bankomamatwi ulwa kubomfya ifishibilo pa vidio