Bikeni Amano ku Kwishiba Bankomamatwi mu Cifulo Mushimikilamo
1 Yehova aleita abantu ati: “‘Iseni!’ . . . onse uulefwaya abuule amenshi ya bumi aya bupe fye.” (Ukus. 22:17) Pa baleyankula kuli ubu bwite pali na bankomamatwi abengi. E cilengele ukuti mu filonganino fimo fimo muno calo cesu mube amabumba ya bankomamatwi abalongana ukulongana kwa pa cilonganino mu lulimi lwa bankomamatwi ulwa cina Amerika.
2 Nangu ca kutila abalongana mu filonganino umwaba amabumba ayabomfya ululimi lwa bankomamatwi balabombesha ukufwaya bankomamatwi na bashumfwikisha ababa mu cifulo bashimikilamo, kucili na bambi abengi abo bashaishiba abo bafwile ukushimikila muno mwine mu calo cesu.
3 Cinshi Mwingacita? Ilyo muli mu fifulo fya cintubwingi, bushe mwalimonapo abantu balelanshanya mu lulimi lwa bankomamatwi? Bushe mwalishibako bamo ku ncito ku mwenu nelyo pa sukulu musambilila abakwata balupwa lwabo bankomamatwi? Bikeni amano ku kwishiba bankomamatwi konse uko mwingabamwena. Nomba kuti mwacita shani pa kufwaya abaishiba ululimi lwa bankomamatwi aba kushimikila bankomamatwi abo musangile?
4 Ukushimikila Bankomamatwi: Ishibisheni ibumba lya bakasabankanya ababomfya ululimi lwa bankomamatwi ilyabela mupepi no ko mwikalila kabili balangeni uko bengasanga uyo nkomamatwi. Bankomamatwi abengi balasambilila bwangu sana icine nga ca kutila balesangwa ku kulongana pamo ne Nte sha kwa Yehova bankomamatwi banabo ababomfya ululimi lwa bankomamatwi ulwa cina Amerika. E ico, nga ca kutila mupepi no ko mwikalila kwaliba ibumba lya bakasabankanya ababomfya ululimi lwa bankomamatwi, peeleni kalemba wa mu cilonganino cenu ifyebo fyonse ifya kulondolola bankomamatwi abo musangile mu cifulo mubombela. Kalemba na o, akatuma ifyo fyebo ku cilonganino icakwata ibumba lya bakasabankanya ababomfya ululimi lwa bankomamatwi icabela mupepi no ko mwikalila.
5 Na lyo line, kuti mwacita shani nga ca kutila uko mwabela takwaba uwaishiba ululimi lwa bankomamatwi uwingashimikila bankomamatwi abo musangile? Kuti mwabafwa shani? Kuti cawama nga mwaya ku cipempu ca kubwelelamo no kuyalanda na bekala no yo nkomamatwi. Nga kuti mwasanga vidio wa lulimi lwa bankomamatwi, bebeni ukuti mulefwaya ukuti uyo nkomamatwi akatambe vidio. Ico mukacitile fyo, kufwaya ukuti uyo nkomamatwi atendeke ukufwaya ukusambilila ifyaba mu Baibolo. Bakasabankanya bamo balisambilila ululimi lwa bankomamatwi ulwa cina Amerika pa kuti baleshimikila bwino kuli bankomamatwi.—Imil. 16:9, 10.
6 Nga mulebika amano ku kumona bankomamatwi ababela uko mwikalila, kuti mwalenga na bo bene baba ne shuko lya kubuulapo amenshi ya mweo aya bupe fye.—Mat. 10:11.