Ukubebeta Ubusuma bwa Kale Ubwa Miti

Ku ulemba Loleni! mu New Zealand

IMITI, maka maka iya cina New Zealand ileya ileloba lubilo lubilo. Mu fyalo ifingi abantu balekufya imiti. Imiti nga yapwa, imitengo ya mbao ilanina sana nangu cingati imbao shaba pa fipe fimo ifibomfiwa sana mwi sonde kabili ifyafulile nga nshi akale.

Muno New Zealand, icilepapushako fye ca kuti imilemu ya radiata pine iyabyelwe muli ba 1930 yalifula sana, nangu cingati imiti ya cina New Zealand pamo nga rimu, beech, na kahikatea, ileya ileloba.

Ukucebusha kwa Mutatakuya Ukwa Miti Iyakosa

Pa myaka iingi, umuntunse aliipakisha ukupanga ifipe fyalekanalekana ku miti. Ilangi, ulukula, no mununko wa misango iingi iya miti fyalitemuna abantunse. Ifipe ifya milimo yalekanalekana fyaliikusha abantu pa myaka iingi kabili, limo limo, pa myanda ya myaka iingi.

Ukufuma ku kale, ifipe ifya mbao ishakosa fyalibomfiwa mu mayanda. Ukubomfya ifibombelo fya bena kale, abaume na banakashi balilangisha ubutukushi no kulamuka mu kupanga ifipe pamo nga matebulo, imbale shafonka, utupuna, amabeseni, utwabati, ne mipando.

Ilelo ifibombelo fya muno nshiku fyalilenga ifipe fya musango yo filepangwa bwangu. Ifibombelo fya malaiti ifya congo, pamo nga basoo, ifya kutulilako, bapuleni, ne fya kukuushilako, filabomfiwa ku kubasa imbao ukupangamo ifipe fya mapulanga ayakosa. Ifyalo ifingi fyalikwata amafakitare ya fya mbao ayapanga ifipe ifingi ifya mitengo yalinga.

Lelo ifipe fya musango yo tafikokola pa mulandu wa kuti (1) fipangwa ku mapulanga ayakulundikanya, na ku fibokoshi nelyo (2) pa mulandu wa kuti filundanishiwa ulubilo ukubomfya bamashini ba kumanikilako nelyo ukubomfya imisomali.

Ukubwelela ku Mbaso

Pa kufwaya ukucimfya amafya yamo ayo ifibombelo fya muno nshiku fyakwata, bamo babomfya fye imbaso—icibombelo ca bena kale. Imbaso cibombelo icibomfiwa ku kubashilako ifipe. Mu New Zealand, baMaori balebomfya imbaso sha mabwe ya greenstone ku kubashilako amato na kukulinganya imyalo ya kubasamo fimo. Nangu cibe fyo, ilelo imbaso ishabako sha cela.

Ku kale, bakabasa balebomfya imbaso ku kupala no kulinganya imyalo ya kupangila ing’anda na mato. Pa kupala ipulanga balelifyantika mu makasa, no kubomfya imbaso ku kuceka amafwa.

Umwengo Ubombela Pamo ne Mbaso

Umwengo ubombela pamo ne mbaso kabili waba cibombelo na cimbi icibomfiwa sana ku kwengwilako icipe icakalabana. Ubomfiwa ku kulinganya iming’ong’o nelyo mu mbali. Imbaso pamo na mwengo fifwile ukutwa sana.

Nga namukwata ifi fibombelo, kuti mwafwaya fye umuti uusuma no kubasamo icipe ico mulefwaya. Bakabasa balando kuti uyu e mulandu inshila ya bena kale yawamina ukucila inshila sha muno nshiku.

Amapulanga ayakalabana, ayauma kabili ayaololoka kuti yabomfiwa ku kupangilako icipe icakosa kabili icayemba. Amapulanga ya musango yo kuti mwayasanga ukwapusanapusana: imbao sha ku fipe ifyaonaika pamo nga amawardrobe, babeti, na matebulo, ifibokoshi fya kale, imyalo ya fikuulwa ifyaonaika, ne milando ya lubao.

Ukubomfya Amapulanga ya Kale

Kabasa uwacenjela kuti abomfya amapulanga ya kale ayashapeswa nelyo ukubola ku kupangilako ifipe ifyayemba.

Ukupeswa, ifipunda fya misomali, ne fimfokonshi kuti fyaonaula ipulanga lya kale. Nangu tamubikileko umuti nelyo ukupalako, icipe mwingapanga kuti caba fye icisuma kabili icakosa kabili kuti camusansamusha.

Ukupala umulimi uulima umushili, umubumfi uumumunga ibumba, nangu kapikula wa bushishi uupikula, kabasa uubasa no kupala imbao ku mbaso nelyo ku mwengo na o alamwenamo nga nshi. Uyu mulimo kwena walikosa kabili apo taubombwa ku fibombelo fya muno nshiku ulakokola. Nangu cibe fyo, ukwishiba ukuti mwaliba ukwikushiwa muli uyu mulimo no kuti ifipe mupangila bambi fikabomfiwa pa myaka iingi kulaletako ubuseko bwa kale ubwaba mu mulimo wa bukabasa.

Ifya Kucinkulako

Imbaso taibomba ku misango yonse iya miti. Ilingi line ilafilwa ukubasa imiti iyakosa iisangwa mu ncende ishakaba. Lelo ilabomba bwino ku muti uwanaka, uwa lukula ulunono. Ifikonko tafilingile ukumusakamika. Kuti mwabomfya cesulo uwakonkomana pa kufifumya, pa kuti mwingabasa bwino.

Amapulanga aya lukula e yakwata ilangi ilisuma sana. Ifipe ifipangwa kuli aya mapulanga filamoneka bwino nangu tamubikileko umuti. Nangu cibe fyo, nga mulefwaya ukuti amapulanga yamoneke bwino, kwaliba imiti iingi iyo mwingabikako.

Te shingi mwingapoosa pali uyu umulimo. Bamo abashingako grease wa motoka ku mapulanga aya lukula ulwabutulukila balimono kuti ilalenga ifipe ukulamoneka bwino.

Pa kuti icipe cenu cimoneke bwino, kwaliba bavanishi aba musango wa polyurethanes nelyo lacquers abo mwingafuminishako nelyo ukushingako. Pa kuti vanishi wa mulekelelo alenge amapulanga ukumoneka bwino ukucila ukuyakupilila fye, kuti mwasubako amafuta ya kubesha amapulanga ayapangwa ku kusakaanya imilingo isano iya vinegar, imilingo ine iya mafuta ya mulemu, imilingo ibili iya mafuta ya linseed, no mulingo umo uwa methylated spirit. E lyo mubikemo ipula lya nshimu, kabili nga mwasubako uyu muti lekeni papite inshiku ishingi pa kuti wingile mu mapulanga.

Ubutukushi Ubwikusha

Lintu mwapanga icipe ca mapulanga ayakosa ku minwe yenu mukalacimona bwino lintu cili mu ng’anda yenu pa ncende mwatemwisha, nangu fye cingalamoneka ica bupiina. Mwi sonde lyonse, mu mayanda ayakalamba na yanono, kuti mwasangamo ifipe ifingi ifyapangwa ku minwe ya ntukushi, fimo ifya fyene fya kale. Ifi fipe filangililo ukuti fyapangilwe ku ntukushi shalamuka, isha mukoosha, kabili isha mute. Ishi ntukushi shalikushiwe no kusangalala mu kupanga ifipe ifileta ubucindami ne ciyembo lintu fyasungwa bwino kabili filenga amayanda ukumoneka bwino.

Muli ino nkulo, iyaisulamo ifipe fya mapulasitiki ne fya mipila yakosa, imiti Kabumba atupeela icili ilebomfiwa mu milimo iingi iyacindama. Umulimo umo imiti ibomba kupayanishisha kabasa imbao sha kupangilamo icipe icayemba.

[Ifikope pe bula 23]

Rimu

Tawa

Oak

Umulemu wa fikonko uwa “radiata pine”

Umulemu uwashingwako vanishi

Umulemu uwashingwako grease

Umulemu uwashingwako umuti uwafita

[Ifikope pe bula 24]

Ukubomfya imbaso

na mwengo

[Icikope pe bula 25]

Akabati kapangwa ku mbaso

[Icikope pe bula 25]

Ishelufu