Bushe Icintiinya ca Manyukiliya Calipwa?
PA MYAKA ukucila pali 40, isonde lyali mu cintiinya ca nkondo ya manyukiliya. Lyene, mu 1989, icibumba ca Berlin Wall e cabalilepo ukuwa, e lyo paishilekonkapo imitekele ya Komyunisimu iya ku Soviet Union. Pa numa ya ico, ifyalo fyakwatisha amaka fyalisuminishenye ukuleko kusontana iminshinga ya manyukiliya. Camoneke kwati “Armagedone” wa manyukiliya alicilimwe, nelyo ukulaalikishiwa, ica kuti isonde lyalipeemwinako.
Lelo, incenshi ishingi shitila icintiinya ca manyukiliya tacilapwa. Mu 1998 inkoloko yalumbuka iya kupwa kwa calo iya muli magazini wa The Bulletin of the Atomic Scientists yaseshiwe amaminiti yasano ku ntanshi, ukuipalamika amaminiti 9 mupepi na pa nembenembe. Ico calangilile bwino ukuti cine cine icintiinya ca manyukiliya cali tacilapwa.a Ca cine, ifintu pano isonde nafyaluka. Ifyalo fibili ifyakwatisha ifyanso fya manyukiliya fyalileko kukansana. Nomba kwaliba ifyalo ifingi ifyakwata ifyanso fya manyukiliya! Ukulundapo, incenshi shitiino kuti bushiku bumo ibumba lya tupondo likashukila ifibombelo fya kupangilako amanyukiliya no kumumungamo ibomba lya atomiki.
Ukulundapo, nangu ca kuti ifyalo fya United States na Russia fyalicefyako sana ifyanso fya manyukiliya, ficili fyalitutila iminshinga ya manyukiliya iya kutiinya. Ibumba lya bakasapika ilitwa Committee on Nuclear Policy, litila pali ndakai ifi fyalo fyaliiteyanya ukulisha ifyanso fya manyukiliya nalimo 5,000. Lipoti wabo atila: “E co kanshi pali ndakai nga bakambishiwa ukulisha ifyanso fya manyukiliya, iminshinga 4,000 [iya kulashilako ifyalo fya kutali sana] (e kutila, 2,000 iya ba Russia na 2,000 iya ba United States) e yo bengalisha mu kulashilako abalwani babo mu maminiti fye ayanono e lyo na pa numa ya ico kuti balisha iminshinga na imbi 1,000 [ukufuma mu mato ayendela pa nshi ya bemba] ukulashilako abalwani babo.”
Inkondo kuti yabalamuka nga ca kuti ubusanso bwalenga iyi minshinga ukulila atemwa bamo balisha yene ku mumbo. Mushika uwalamuka mu fya bulwi umwina Russia, Vladimir Belous asokele ukuti: “Nga kwaponako ubusanso bwabipisha, isonde kuti lyaonaulwa mu kayofi ka manyukiliya, nangu ca kuti te fyo bapolitishani bengafwaya cibe.” E co kanshi, nangu cingati ifyalo fyakwatisha amaka fyalileko kukansana, icintiinya ca nkondo ya manyukiliya tacilapwa. Lelo bushe ico cintiinya cili shani ubukulu? Bushe ifyanso fya manyukiliya fikatala afifumishiwapo pe sonde? Ifipande fikonkelepo fyalalanda pali iyi milandu.
[Futunoti]
a Inkoloko ya kupwa kwa calo iya pa nkupo ya magazini wa The Bulletin of the Atomic Scientists ilangilila ifyo isonde lili mupepi na “pa nembenembe” ya nkondo ya manyukiliya. Pa myaka iingi iyapita, kalya akalangilila amaminiti aka pali iyi nkoloko kaliseshiwa ukulingana no kwaluka kwa mapolitiki ya pano isonde.
[Abatusuminishe Ukubomfya Icikope pe bula 3]
Ukupuulika kwa mabomba pa mabuula 2 na 3: Icikope ca ba U.S. National Archives