Ukulingana na Baibolo

Cinshi Cilenga Ubuloshi?

“INDOSHI.” Cinshi mwelenganya ilyo mwaumfwa ilyo ishiwi? Bushe mutila bakote abaikobenkanya ifinkolonkolo abalowa nelyo bushe mutila bantu bomfwana na Satana? Ukupusanako no kutontonkanya kwa musango yo, indoshi sha muno nshiku ishingi bantu fye ngo uli onse. Bamo ni bakalapashi bacindikwa, pamo nga baloya, bakafundisha, bakalemba, na banasi. Mpanga yonse kuliko ukumonekesha kwa mipepele iyo imoneka ukubomfya amaka yacila ubuntunse, pamo nge mipepele ya bubumbo (nature religion) e lyo ne ya neopaganism.a Kapokola umo mu Russia atile, “Konse uko mwingalola mu Russia pali ndakai mukasangako ubuloshi.” Catunganishiwa ukuti mu United States mwaba abaloshi nelyo “abena Wiccan,”b nga fintu bamo baiita, mupepi na 50,000 ukufika kuli 300,000.

Ilelo ishiwi lya kuti “indoshi” ilingi line libomfiwa ukulingana no mo umo alefwaila ukulibomfya kabili kuti lyapilibula ifyapusanapusana ku bantu bapusanapusana. Cilemoneka kwati icilengele ubuloshi ukufula pali ndakai libumba lya bakapepa ba kwa lesa mwanakashi, imipepele ya bubumbo iyasumina mu maka ya mipashi. Indoshi shimo shibomba fye sheka, ukulaceeceeta ukwaluka kwa nshita sha mwaka, imimonekele ya mweshi, kabili ne fintu fimbi ifimoneka mu bubumbo. Bambi bapepa e lyo no kwimba inyimbo sha malele mwi bumba, ilyo ilingi line liba ilya ndoshi 13.

Ca cnie ukuti kuli baAmerika, fintu abantu bamona ubuloshi ilelo fyalipusanininako fye ku fyo abaikeleko pa kati ka 500 A.D. na 1000 A.D. balebumona. Limo limo, nangu cibe fyo, kulaba ukupume ndoshi, ukushipumine mfwila. Ku ca kumwenako ku kutampa kwa October 1998 mu Indonesia, amabumba yaipangeshe na bapaanga yaipaulwile abantu ukucila pali 150 abatunganishiwe ukuti ni ndoshi. Cashimikwa ukuti pa kati ka 1990 na 1998, imilandu ya kupuma indoshi mu South Africa yalicilile 2,000 kabili abantu 577 abatunganishiwe ubuloshi balipaiwe. Ilintu bambi balitemwa ubuloshi kabili bambi ukubupatisha, ni shani fintu Abena Kristu balingile ukubumona?

Ukukabila Kushikushiwa

Cinshi cilenga abantu ukulapanda ubwanga pali ndakai? Batungo kuti cimo icilenga kufwaya ukucindika ububumbo no bumi. Bamo, na kuba, balaipeelesha ukulondolola ukuti ukupepa kwabo takusanshamo ukupeela amalambo ya nama. Bamo batila ico bayangilwa ku buloshi ni co bafwaya ukusapika abantu abo bengalalanshanya na bo, ukucetekela, kabili abatemwa ifintu fimo fine ifishimoneka. Indoshi imo yatile, “Onse uo naishiba uwaba mwi bumba lya ndoshi aliba bwino kabili taifinya. . . Bantu abasuma sana.” Kabili abengi balakaana ukuti tabomfwana na Satana, ukulanda ukwabula no kulamba ukuti tamwaba ifibanda mu mipepele yabo.

Ku bengi, icikalamba ico babela indoshi ni co bayumfwa ukubulwa lwa ku mupashi kabili bafwaya ukukanalufiwa ku mipepele ikalamba. Ukulandilako ibumba lya ndoshi ilyo abamo, Phyllis Curott, namapepo mukalamba umwina Wiccan, atila: “Ifwe bonse tatwatemenwe ifisambilisho ne micitile ya mipepele twakushiwemo.” Curott alondolola ukuti, indoshi sha ndakai, shesha ukusanga ifyasuko ku fipusho pamo nga, ‘Ni shani fintu twingasanga ifyashila?’ Lelo bushe ubuloshi e nshila ya cine cine ku kusangilamo ifya ku mupashi?

Ni Kwi Kwingafuma Bumupashi bwa Cine Cine?

Baibolo ilalondolola bwino bwino ukuti Yehova e Lesa wa cine eka fye kabili e Mulopwe wa Kubumbwa Konse. (Amalumbo 73:28; 1 Petro 1:15, 16; Ukusokolola 4:11) Alelaalika abantu bonse ukumufwaya “no kumusanga.” (Imilimo 17:27) E co, kuti twaba fye na bumupashi bwa cine cine lintu twaishiba Lesa wa cine, Yehova mu kulungika. Ici kuti cacitwa fye ukupitila mu kusambilila Icebo cakwe, Baibolo wa Mushilo. Kalemba wa Baibolo Yakobo atwebekesha ukuti, “Palameni kuli Lesa, na o alapalama kuli imwe.”—Yakobo 4:8.

Nangu cibe fyo, Icebo ca kwa Lesa, cisoka pa lwa ntulo na imbi iya bumupashi bwabipa. (1 Yohane 4:1) Cishibisha Satana Kaseebanya, umulwani mukalamba uwa kwa Yehova, ne fibanda fyakwe ukuti e ntulo ya kumfwana ne mipashi ukwaseeka ilelo.c Ukulingana na Baibolo, Satana ‘alipofwisha imitima’ ya bengi. Na kuba ‘alelufya bonse abaikala mu calo conse,’ ukusanshako ne ndoshi cibe balande ukuti bapepa Kaseebanya nelyo iyo. Mulandu nshi cibelele fyo?—2 Abena Korinti 4:4; Ukusokolola 12:9.

Ifibelesho ifingi capamo no kusefya intambi ifyayampana no buloshi bwa nomba fyalipalana sana na busatana. E co, nangu fye kufwailisha uko kwingamonwa ukwabulamo ubusanso kuti na ko kwalenga umo ukusumina mu fimipashi. Cine cine, abengi muli iyi nshila baba finakabupalu ku kusonga kwabipa ukwa kwa Satana.

Icishinka cishingasuulwako ca kuti limo limo ico indoshi sha lelo shipandila ubwanga mulandu wa kufwaisha ukutungulula bambi nelyo ukufwaya ukulandula. Jennifer, uubomfya ubuloshi bwa muno nshiku atile, “Kwaliba abaloshi ababomfya ubuloshi bwabo ku mifwaile ya kukopeka bambi.” E co, indoshi fye shonse napamo ni shilya batila isha cikuuku nelyo isha cilandushi kuti shalatungululwa fye na Satana ne fibanda. Indoshi shimo kuti pambi shakaana ukuti takwaba ifibanda, lelo ici cibalenga ukuba abacililako ukulufiwa ku fiwa.—Linganyeniko 1 Abena Korinti 10:20, 21.

Baibolo ilasenuka ukubuka, ubuloshi, ukucita amalele, ukulowa, no musango fye onse uwa kufwaya ukulanda na bafwa. Ilondolola mu kumfwika ukuti: “Wa muselu kuli Yehova onse uucite fi fintu.” (Amalango 18:10-12) Ca cine, Abena Kristu balafwaisha ‘ukubomba icisuma kuli bonse,’ kabili mu butumikishi bwabo balyafwilisha abengi ukulekulukako ku musango onse uwa kupupe mipashi. (Abena Galatia 6:10; Imilimo 16:14-18) Nangu cibe fyo, Abena Kristu ba cine balasengauka ukupepa kwa bufi konse, ukusanshako no musango onse uwa buloshi.—2 Abena Korinti 6:15-17.

[Amafutunoti]

[Abatusuminishe Ukubomfya Icikope pe bula 31]

Picture Book of Devils, Demons and Witchcraft/Ernst na Johanna Lehner/Dover