Ilyo Kwacitika Ica Kutiinya

“Ninkwata umwele! Nga wapunda nalakwipaya!”

CALI kasuba ninshi na buca bwino mu nshita ya lusuba, kabili Jane,a uli ne myaka 17 kabili Inte ya kwa Yehova, aleenda pa nsapato sha mawilo mu parka ku Virginia, U.S.A. Awe alubile ne fyo abantu bapwa mu parka, na o e pa kutila kandeya fye. Ilyo aikele mupepi na motoka ya lupwa lwakwe alefuula insapato sha mawilo, kwaishile umuntu ashaishibe. Alandile amashiwi ya kutiinya aya pa muulu no kumupatikisha ukulala na o, kabili aikete Jane, no kwesha ukumusunkila muli motoka. Apundile apapela amaka yakwe, lelo ulya mwaume talekele.

Pa numa ilyo aibukishe, Jane atile: “Naumfwile uwapelelwa, kwati kashishi akalelwishanya ne cinama icikalamba. Lelo natwalilile ukupunda no kulwisha. Nasukile nalomba Lesa, ukuti ‘Mwe Yehova, napapata mwileka ici cincitikile!’” Aya mashiwi kwati yalipapwishe uwalemusansa, kabili alimulekele no kubutuka.

Ilyo ulya muntu walefwaya ukulala na o aingile muli motoka yakwe, Jane aikomene muli motoka yakwe, ninshi aletutuma. Aikatishe lamya wa kwenda na o, no kwesha ukushikatala. Atumine bakapokola no kulondolola bwino ifyo motoka ya ulya mwaume wamusanshile yalemoneka ne nambala ya ilya motoka, ica kuti balimwikete ninshi tapalapita ne nshita.

Bushe Ili Lyashi Lyalipwile Bwino?

Ee, lelo talyapwilile palya pene. Ubwafya bwa kwa Jane e lyo nomba bwatendeke. Nangu ca kuti bakapokola na balemba inyunshipepala balimutashishe pa kutontonkanya bwangu no kushilimuka ilyo asanshilwe, ilyo ici cintu capitile, Jane taleyumfwa uwashilimuka. Alondolola ati: “Ilyo papitile imilungu inono, nali no bulanda nga nshi. Naletiina sana lyonse kabili ici canengele ukukanalaala. Ilyo papitile imilungu, nalefilwa ukusambilila nelyo ukwangwa ku fintu. Kabili naletiina nga nshi. Ku sukulu umwaume twalesambilila nankwe uwalemoneka nga ulya uwansanshile anjikete pa kubeya ukuti anjipushe inshita kabili nafwaile ukupunda.”

Atila: “Nali no bulanda nga nshi. Nalekele ukulanshanya na banandi, kabili ukutalalilwa kwanengele ukuba sana no bulanda. Naleipeela umulandu pa kuisuminisha ukusanswa, kabili nali no bulanda pantu nshali uwa nsansa kabili uwacetekelwa nge fyo nali ilyo ici cishilacitika. Naleumfwa kwati nomba nshali ifyo nali kale.”

Ico Jane alepitamo fishibilo fya musango wa bulwele bwa kufulungana kwa matontonkanyo uko beta ati post-traumatic stress disorder (PTSD). Bushe PTSD cinshi, kabili cinshi twingacita ku kwafwa abantu abacula ku fishibilo fya iko ifyabipisha? Ifi fipusho fyalayasukwa mu cipande cikonkelepo.

[Futunoti]