Bamayo na Bana Babo Abana-kashi 10
NGA FINTU CASHIMIKWA NA BA ESTHER LOZANO
BAMAYO na batata bafyalilwe mwi tauni lya Bitlis, ku Turkey. Abafyashi babo bali bena Amernia. Ku kutendeka kwa ba 1900, ilyo ukwipayaulula abena Armenia kwali mpanga yonse, batata bafumine ku Turkey no kwisa ku United States. Bali napamo ne myaka 25. Bamayo ba Sophia baishileya pa numa ninshi bali ne myaka 12.
Cimoneka kwati abafyashi ba ndupwa shonse shibili balisuminishenye ukuti bamayo bakaye ku United States bakayeupwa kuli batata, ba Aram Vartanian. Ba Sophia bali abaice sana ica kuti tacalingile ukuti bopwe ilyo bafikile mu Fresno, ku California, e co baleikala na bali no kuba banafyala mpaka bakula.
Ibeli lya bafyashi besu ali mwaume uo bainike ati Antranig, ishina ilyo pa numa bayalwile ati Barney. Afyelwe pa August 6, 1914. Abana bonse 10 abo bakonkeshepo bali banakashi. Batata baishileba Abasambi ba Baibolo, nga fintu Inte sha kwa Yehova baleitwa pali ilya nshita, ilyo Shield Toutjian atandele ku Fresno no kulanda ilyashi ku bekashi ba mu Armenia mu 1924. Pa numa, ulupwa lwesu lonse lwalesangwa ku kulongana kwa Bwina Kristu capamo.
Twakuukile ku Oakland, ku California, mu 1931 kabili twalebishanya ne cilonganino kulya. Barney abombele Yehova mu busumino mu Napa, ku California, mpaka ne mfwa yakwe mu 1941. Nali uwa butatu ukufuma pali Barney, kabili naipeele mu lubatisho kuli Yehova mu 1935. Pa numa ya kusangwa ku kulongana pa myaka 75, nkashi yesu Agnes alibatishiwe, kwena te kale sana! Fwe banakashi bonse e ko twali, kabili twalitemenwe sana ukuti uwasheleko fye ukubatishiwa pali ifwe fwe banakashi 10 nomba alibatishiwe.
Ku ca bulanda bamayo tabaliko. Bafwiile umwaka wafumineko ninshi bali ne myaka 100 ne nshiku shibili. Imfwa yabo yalisabankanishiwe mu nyunshipepala ya mu Califronia Hayward News iya pa May 14, 1996. Yatile: “Ali ni Nte ya kwa Yehova, uwabombele umulimo wa kuitemenwa uwa kusambilisha . . . abalefwaya ukusambilila Baibolo pa myaka 54.” Icipande na kabili cayambwile amashiwi ya kwa nkashi yesu Elizabeth, uwatile: “Balesengela sana abeni mu mwabo, kabili lyonse baleshako ifya kulya fya muntu umbi uwingesa . . . Lyonse baleti: ‘Ingileni munweko kofi,’ kabili nga ca kuti umo asangile nabafumbika ica kulya ca baklava, kuti aipakisha icine cine.”
Gladys, nkashi yesu umukalamba pali bonse ali ne myaka 85 no mwaice pali bonse ali ne myaka 66. Bonse tuli Nte sha kwa Yehova. Ifwe batatu twabombele bumishonari pa numa ya kupwisha isukulu lya Baibolo Ilya Gileadi Ilya Watchtower. Elizabeth, uwikala ku Newport Beach, mu California pali nomba, ali mwi kalasi lyalenga 13 kabili abombele mu Callao, mu Peru pa myaka 5. Ruth ali mwi kalasi lyalenga 35. Wene na bena mwakwe, ba Alvin Stauffer, babombele bumishonari mu Australia pa myaka 5. Nali mwi kalasi lya Gileadi ilya bune kabili mu 1947 naebelwe ukuyabombela ku Mexico, uko naupilwe kuli ba Rodolfo Lozano mu 1955.a Bonse babili tubombela mu Mexico ukutule lyo.
Fwe banankashi bonse 10 tulatasha sana pantu tatulwalilila. Cilatwafwa ukutwalilila ukubombela Yehova no muntontonkanya onse, no mutima, na maka ukufikila inshita umwine engatemwa—pali lelo nelyo ku ciyayaya mu calo cakwe icipya.
[Futunoti]
a Ilyashi lya bumi bwabo kuti lyasangwa mu Ulupungu lwa kwa Kalinda ulwa January 1, 2001.
[Icikope pe bula 28]
Agnes ilyo alebatishiwa, mu 1997
[Icikope pe bula 29]
Elizabeth pa bushiku apwishishe isukulu lya Gileadi mu 1949
[Icikope pe bula 29]
Esther (ku kulyo) pa maofeshi yanono aya Nte sha kwa Yehova mu Mexico, mu 1950
[Icikope pe bula 29]
Ruth na Alvin Stauffer ababombela mu fyalo fyalekanalekana ababa pa maofeshi yanono aya Nte sha kwa Yehova mu Mexico, mu 1987