Ifyo Ifishinte fya mu Baibolo Fingafwa Abakwata Ubulwele bwa Shuga
UKUILAMA no kucetekela filaafwa sana abakwata ubulwele bwa shuga. Lelo pa kulundulula iyo mibele, abakwata ubulwele bwa shuga bakabila ukutungililwa lyonse. Kanshi balupwa ne fibusa tabalingile ukutunka uwakwata ubulwele bwa shuga ukulya ifya kulya ashilingile ukulya, napamo pa kusosa ati, ‘Lyako fye umuku umo.’ BaHarry abalwala ubulwele bwa ku mutima no bwa shuga ubwa Type 2 batila: “Umwina mwandi alanjafwa sana. Tasha pa mbilibili ifya kulya ifyo aishiba ati nshilingile ukulya. Lelo bambi tabalangulukilako, tabaishiba ukuti cilankosela sana ukukanalya ifya kulya nshilingile ukulya nga ca kuti ndefimona.”
Nga ca kuti libili libili muba no muntu wakwata ubulwele bwa shuga, muleibukisha ifishinte fisuma sana fibili ifyaba mu Baibolo ifitila: “Umo umo elaifwaila icakwe, lelo afwaile umunankwe,” ne ca kuti “Ukutemwa . . . takuifwaila ifya kuko.”—1 Abena Korinti 10:24; 13:4, 5.
Bonse abangwa ubumi bwabo—nampo nga balikwata ubulwele bwa shuga nelyo iyo—bafwile ukulama imiliile yabo. Baibolo ilatwafwa muli ci, pantu ilondolola ukuti ifwe bonse tufwile ukuilama. Bushe mwapampamina pa kulundulula iyi mibele mu mikalile yenu? (Abena Galatia 5:22, 23) Kwaba ifya kumwenako na fimbi mu Baibolo, pamo nge ca mutumwa wa Bwina Kristu Paulo. Umo uwakwata ubulwele bwa shuga atila Paulo “alikwete umunga wa mutatakuya mu mubili, lelo alebombela Lesa mu busumino kabili mu kufikapo. Na ine wine kuti nacite fyo fine!”
Paulo alisambilile ukwikala ne fyo ashingaalula kabili alibombele bwino sana bumishonari. (2 Abena Korinti 12:7-9) Dustin, uwa myaka ya bukulu 18 afyelwe impofu, kabili akwata ubulwele bwa shuga ukutula ilyo aali ne myaka 12. Alemba ati: “Nalishiba ukuti takwaba nangu umo mu calo uwakwata fyonse ifyakumanina umupwilapo. Ndepembela inshita lintu mu calo cipya ica kwa Lesa nshakakwate ubulwele bwa shuga. Kuli ine, ici cintu ca pa kashita kanono. Cilakokolako ukucila icifuba nangu icifine, lelo kwi pele pele cikapwa.”
Ilyo Dustin alelande fyo, aleibukisha isubilo lya mu Baibolo ilya kuti muli paradaise wa pe sonde mu Bufumu bwa kwa Lesa kukaba ubumi bwapwililika. (Ukusokolola 21:3, 4) Icebo ca kwa Lesa cilaya ukuti mu kuteka kwa bulesa ukwa musango yo, “umwikashi wa mu calo takasose, ati, Nindwala.” (Esaya 33:24; Mateo 6:9, 10) Bushe kuti mwafwaya ukwishiba na fimbi pa lwa ubu bulayo bwa mu Baibolo? Ipusheni Inte sha kwa Yehova uko mwikala, nelyo kuti mwalembela kuli bakalemba ba uno magazini ukubomfya adresi walinga ukufuma pe bula 5.
[Icikope pe bula 12]
Ukuilama no kucetekela fyalicindama