Abacaice Bepusha Ukuti . . .
Finshi Fingawama Ukulacita mu Bumi Bwandi?
“Pa kubala nshalesakamana sana pa fyo nkekala ku ntanshi. Lelo ilyo nali mupepi no kupwisha isukulu, nailwike ukutila nkafwaya ukuikalila, ukwingila incito e lyo no kukwata indalama sha kuliilamo.”—Alex, uuli ne myaka 17.
ILYO wali umwaice, bushe waletontonkanyapo pa fyo ukaba nga wakula? Bushe na pali ino nshita ifyo fine e fyo ufwaya ukuba? Bushe tawaishiba bwino ifyo ukulacita pa kuti ukaiteke we mwine nga wakula? Nga e fyo cili ala te iwe weka. Icitabo icilanda pa kwafwa abaice ukusala incito, icitila Career Coaching Your Kids catile, “Ukusala ifya kucita mu mikalile, kwaba pa fintu ifyayafya sana ku bacaice.”
Napamo pali ino nshita tautontonkanyapo pa kusala ifyo ukalacita ku ntanshi. Limbi wabika fye amano ku kwangala. Ukwangala takwabipa, pantu na Baibolo ikweba ukutila “Sekelela we mulumendo ilyo ucili umulumendo.” (Lukala Milandu 11:9, NW) Na lyo line, ino e nshita yalinga ukutendeka ukutontonkanya pa fyo ukekala ku ntanshi. Pa Amapinda 14:15 patila: “Uwacenjela amwensekeshe nyantilo shakwe.” Kuti wamwensekesha shani inyantilo shobe?
“Ufwile Ukwishiba Uko Uleya”
Tutile ulepanga ukuya ku cifulo cimo ukutali sana. Ufwile ukabalilapo ukumona mapu pa kuti usale umusebo wingawama ukuyamo. E fyo caba na pa kusala ifyo ukacita ku ntanshi. Michael umulumendo uubombela pa maofesi ya Nte sha kwa Yehova atila, “ifya kucita fyena fingi.” Kuti wasala shani icingawama pali fyonse ifi? Michael atila, “icingakwafwa kusalila limo ifyo ukacita mu bumi.”
Ifyo ulepanga ukucita mu bumi kuti twatila e cifulo uko uleya. Kwena nga ulelulumba fye te kuti ufike uko uleya. Kuti cawama wabuula mapu yobe no kumona inshila walakonka. Nga wacite fi ninshi ulekonka filya Amapinda 4:26 yasosa ati: “uleangwe kuba lya makasa yobe, leka ne mibele yobe yonse ipampamikwe.” Baibolo ya Contemporary English Version yena itila: “Ufwile ukwishiba uko uleya.”
Mu myaka ya ku ntanshi, ukafwaikwa ukusala ifya kucita pa fintu ifikalamba pamo nga incito, icupo, ulupwa, na fimbi ifyacindama. Nga waishiba uko uleya atemwa ifyo ulefwaya ukucita mu bumi, cikanguka ukwishiba ne fyo walacita pali iyi milandu. Kabili ilyo ulemona inshila ya kulolamo, kuli na cimbi icinkankaala ico ushifwile kulaba.
“Ibukisha Kalenga Obe”
Nga ulefwaya ukuba ne nsansa sha cine, ufwile ukwibukisha amashiwi yalandile Imfumu ya mano Solomone aya kuti: “Ibukisha Kalenga obe ilyo ucili umwaice.” (Lukala Milandu 12:1, Today’s English Version) Ufwile ukutontonkanya pa kulenga Yehova ukusekelela ilyo ulesala ifya kucita mu bumi.
Mulandu nshi ico cacindamina? Pa Ukusokolola 4:11, Baibolo itila: “Mwaliwamina, mwe Yehova, mwe Lesa wesu, ukupokelela ubukata no mucinshi na maka, pantu mwabumbile ifintu fyonse, kabili ni pa mulandu wa kufwaya kwenu fyabeleleko no kubumbwa.” Ca cine, ifibumbwa fyonse mu muulu na pano isonde fifwile ukutasha Kabumba. Bushe na iwe ulatasha pa “bumi no mupu na fyonse” ifyo akupeela? (Imilimo 17:25) Bushe taufwaya ukupeela Yehova Lesa fimo pa kuti ulange ukutasha pali fyonse ifyo akupeela?
Ukwibukisha kabumba wabo kwalenga abacaice abengi Inte sha kwa Yehova ukusala ukubomba umulimo wa nshita yonse. Icishinka ca kutila, umulimo wa nshita yonse, mulimo wacindama sana, kabili ulaleta amapaalo ayengi. (Malaki 3:10) Lelo pa kubomba bwino ufwile ukupekanya bwino ifintu. Ica kumwenako, uipushe auti, ‘Milimo nshi naishiba nelyo finshi nacenjelamo ifyo ningalacita pa kusanga umwa kuliila ilyo ndebomba umulimo wa nshita yonse.
Kelly uuli ne myaka 27, apekenye ifya kucita ninshi ali umwaice. Alefwaya sana ukubomba umulimo wa nshita yonse. Ilyo ali mupepi no kukumanya imyaka 20, “atendeke ukusala inshila” ya kuyamo, icilolele mu kuti asalile incito aali no kulabomba. Atila: “Nasalile incito iyali no kungafwa ukubomba bwino ubutumikishi.”
Kelly alisambilileko panono ifya kundapa abalwele ba meno ilyo ali ku sukulu, ku sekondari. E wacilike na mu kucimfyanya kwali muli cilya citungu pali aya masambililo. Lelo ico tacalengele alaba ku co alefwaya ukucita mu bumi. Kelly atila: “Ico nalefwaisha sana, kubomba umulimo wa nshita yonse. Ifyashala tafyacindeme sana.” Kelly acili aleipakisha ukubomba umulimo wa nshita yonse. Atila: “Nalimona ukutila ico nasalile ukucita cintu icisuma sana.”
Ipusha Aba Kukupandako Amano
Nga uleya ku cifulo cimo uko ushaishiba, kuti wafika pa cifulo cimo apo wingafwaya ukwipusha abantu bambi pa kuti bakulange ukwa kulola. Na pa kupekanya imikalile ya ku ntanshi, kuti waipushako bamo. Umfwa ifyo bambi bengasosa. Pa Amapinda 20:18 muli Baibolo ya New World Translation patila: “Ukupandwa amano kulenga amapange ukubombeka.” Abafyashi kuti bakwafwa sana. Kabili kuti waipushako na Bena Kristu bakosa abakonka amano yafuma kuli Lesa mu mikalile yabo. Roberto atila: “Ufwile ukwipusha aba mu cilonganino wabamo nelyo mu filonganino fya mupepi ababika sana amano ku kupepa. Kuti bakwebako fimo ifyo ushabalile autontonkanyapo.”
Ico Yehova Lesa afwaisha, kukwafwa ukusala bwino ifya kucita mu mikalile pa kuti ukakwate sana insansa. Kanshi mwipushe pa kuti akwafwe ‘ukukutuluka icabo kufwaya kwakwe’ pa mikalile yobe iya ku ntanshi. (Abena Efese 5:17) Nga wacetekela Yehova no mutima obe onse, “akatambalike nshila shobe.”—Amapinda 3:5, 6.
Nga mulefwaya ukubelenga ifipande na fimbi ifitila “Abacaice Bepusha Ukuti . . . ” kuti mwafisanga pa kompyuta pa Web site iyi: www.watchtower.org/ypa
IFYA KUTONTONKANYAPO
◼ Milimo nshi waishiba kabili finshi wacenjelamo ukucita?
◼ Tontonkanyapo pa fyo wingabomfya ifi waishiba ne fyo wacenjelamo mu kulumbanya Yehova
◼ Mulimo nshi uwa nshita yonse pa milimo twalandapo uo watemwa sana?
[Akabokoshi pe bula 16]
INSHILA YA CIMPELESHA
Baibolo itila: “Abafwaisha ukuba ne fyuma bawila mwi tunko kabili mu citeyo kabili mu lunkumbwa ulwingi ulwa kutumpa kabili ulwa kucena, ifyo fiibisha abantu mu bonaushi kabili mu kupomonwa.” Ukukonkelela icuma kulaleeta amafya! Uulekonkelela icuma aba ngo uleya mu nshila ya cimpelesha, pantu asuka aba ne nkongole, amasakamika, kabili alafilwa ukubombela Lesa.—1 Timote 6:9, 10.
[Akabokoshi ne Fikope pe bula 17]
BUPAINIYA
Painiya Mwina Kristu wakosa mu kupepa, uwabatishiwa kabili uwaipeelesha ukubila imbila nsuma ya Bufumu amawala 70 cila mweshi. Bapainiya balacenjela sana mu kusambilisha Baibolo pantu balasambilila ifya kushimikila e lyo kabili balashimikila inshita ikalamba.
UMULIMO WA PA BETHEL
Ababa pa Bethel ni balya ababombela pa maofesi ya Nte sha kwa Yehova mu fyalo fyalekanalekana. Aba babomfi, baliipeelesha ukupulinta no kutuma impapulo mu fifulo fyalekanalekana nelyo ukubombako imilimo imbi iyayampana ne fi. Umulimo onse uwa pa Bethel wa mushilo.
UKUBOMBELA UKULI UKUKABILA
Bapainiya bamo balakuukila ku fifulo uko aba kubila mbila ya Bufumu bafwaikwa sana. Bamo balasambilila ululimi lumbi no kuyabombela ku calo cimbi nelyo mu cilonganino cimbi umo balanda ulo lulimi.
UKUBOMBELA KU FYALO FIMBI
Ababombela ku fyalo fimbi baya mu kwafwa abantu ukukuula Amayanda ya Bufumu na maofesi ya musambo. Uyu mulimo wa mushilo, walingana no mulimo wa kukuula itempele, uo abantu babombele mu nshiku sha kwa Solomone.—1 Ishamfumu 8:13-18.
ISUKULU LYA KUKANSHA ILYA BUTUMIKISHI
Ili isukulu ilisenda imilungu 8, e mo baeluda abashimbe na babomfi batumikila basambilila ifya kutungulula icilonganino ne fya kulanda ku cintubwingi. Bamo abapwisha ili sukulu, babeba ukubombela mu calo cabo cine. Bamo baya mu kubombela ku fyalo fimbi.
BUMISHONARI
Bapainiya ababomba bwino kabili abashilwalilila balabasambilisha pa kutila bayabombela mu fyalo fimbi. Bamishonari balakwata sana insansa mu mikalile yabo.
[Akabokoshi ne Cikope pe bula 17]
WHAT WILL I DO WITH MY LIFE?
Muli iyi video iyapangwa ne Nte sha kwa Yehova, balipusha abaice aba ku Brazil, Britain, Germany, na ku United States abalanda ifyebo ukufuma pa nshi ya mutima. Ili no kufuma mu ndimi na shimbi nomba line.
[Icikope pe bula 16]
“Ukusalila limo ifyo ukacita ku ntanshi kulafwa sana.”—Michael, umubomfi wa pa Bethel
[Icikope pe bula 17]
“Ico nasalile ukucita cintu icisuma sana.”—Kelly, uwabomba bupainiya pa myaka 6
[Icikope pe bula 18]
“Muleipusha balya abakosa ukupepa.”—Roberto, Umubomfi wa pa Bethel