Ukulingana Na Baibolo

Bushe Abena Kristu Balifilwa Ukukonka Ifyo Yesu Alesambilisha?

ABANTU abatila Bena Kristu bengi. Nomba nangu bafule fyo icalo calyakanikana ku mulandu wa fikansa fya calo kabili nacifika apabi sana ku lukaakala. Bushe ici cilolele mu kuti ifyo Yesu asambilishe Abena Kristu fyalilubana? Nelyo, bushe icalenga ni co abantu abengi tabakonka bwino bwino ifyo Kristu asambilishe?

Ici cipande calalondolola ifyo Kristu asambilishe ne fyo alecita. Ifi fine e fyo afwaya abakonshi bakwe ukukonka. Na kabili calalondolola ne fyo abengi abatila Bena Kristu bacita, ifyapusana ne fyo Abena Kristu ba cine bafwile ukucita.

Abena Kristu Abashikonka Ifyo Baibolo Isambilisha

Ilyo papitile imyaka 400 apo Yesu afwilile, Abena Roma baishiletemwa imipepele ya bashalekonka ifyo Baibolo isambilisha. Apo nomba aba Bena Kristu tabalebakankamba ku bena Roma, baingile mu buteko na mu tubungwe twa kwaafwa abantu mu bwikashi bwa bena Roma. Intungulushi sha mapepo shimo, pamo nga Augustine, ilyo shaumfwile uku kwaluka shatendeke ukusambilisha ukuti Ubufumu bwa kwa Lesa ubo twalelolela nabufika. Ishi ntungulushi sha mapepo shasambilishe fye no kuti ukubombesha kwabo mu fikansa fya calo na mu fya mapepo e fyali no kuleta ukufwaya kwa kwa Lesa pe sonde. E ico abengi basumine ukuti abantu e bengawamye fintu pano calo.

E calenga abengi ukutontonkanya ukuti Abena Kristu bafwile ukubamo mu mitekele ya calo. Abengi basumina ukutila, pa kuti Umwina Kristu aafwe abantu mu bwikashi bwakwe, tafwile ukukonka fyonse ifyo asumina. Ku ca kumwenako, abengi balanda ukuti balakonka filya Kristu atile baletemwa abanabo no kuba no mutende, lelo abantu bamo bene balaisansha mu nkondo shabipisha. E fyo na macalici yacita. Kuti yakoselesha abantu babo ukupepela Ubufumu bwa kwa Lesa lelo pa nshita imo ine baleyafwilisha bakateka abatekela abantu ku munga we fwafwa.

Iyi mipepele ya bufi, te yo Yesu atendeke. Lelo, bantu abene e baleta iyi mipepele kabili na baikonka ni balya abalanda fye pa kanwa abati Bena Kristu, lelo tabakonka Kristu. Abena Kristu ba musango yu balifilwa ukukonka ifyo Yesu asambilishe nga fintu tumona mu macalici ayengi mu Kristendomu umo bashikonka ifyaba mu Baibolo.

Bushe Finshi Yesu Asambilishe Pali Uyu Mulandu?

Abantu bambi kuti cabapapusha ukwishiba ukuti Yesu atile abakonshi bakwe “tabali ba pano calo, ifyo na [wene ashali] wa pano calo.” (Yohane 17:15, 16) Mulandu nshi Kristu engakoselesesha abasambi bakwe ukukanaba aba pano calo? Uwa aswike ici cipusho ni Yohane umusambi wa kwa Yesu uo atemenwe sana. Alembele ukuti: “Icalo conse calaala mu maka ya mubifi.”—1 Yohane 5:19.

E ico, ifyo Yesu asambilishe filenga abantu ukwishiba ukuti Ubufumu bwa kwa Lesa e bukaleta icalo ca mulinganya kabili icalungama pano pene pe sonde, te tubungwe twa buntunse nakalya. (Mateo 6:10) Yesu umwine talefwaya ukupumfyanya imitekele ne mikalile ya bantu ilyo ali pano calo. Alikaninine ndai ukuba kateka. (Yohane 6:15) Na kabili alikeenye ulukakaala, atile te nshila ya kupwishishamo ifikansa. (Mateo 26:50-53; Yohane 18:36) Yesu tashile amafunde yalelanda pa nsambu sha bekala calo. Tabalile engila mu fikansa fya calo ilyo ali pano isonde. Ku ca kumwenako, talelwishishako abasha ukuti balubuke, nelyo fye baYuda tabalwishishe pa kuti balubuke ku bena Roma.

Nangu ni fyo, ici tacilolele mu kuti Yesu tasakamene abantu nelyo amafya abantu bakwete. Ifyo Yesu asambilishe sana fya kuti umuntu afwile ukwangwa umuntu munankwe. Asambilishe abantu ukuba aba cishinka mu kulipila imisonko kabili abakonkomeshe fye no kunakila abantu abapeelwe amaka ya kuteka. (Mateo 22:17-21) Alilangile abantu ifya kusakamana abalecula. Na kabili asambilishe abantu ifya kucindika abantu banabo ne fya kubalangulukilako, ukubeeleela, no kuba no luse. (Mateo, ifipandwa 5-7) Kanshi, ico Kristu asambilishe sana, kutemwa Lesa no kutemwa umunensu.—Marko 12:30, 31.

Abena Kristu ba Cine Aba Muno Nshiku

Nomba, ninshi Umwina Kristu wa cine afwile ukuba shani? Alingile ukuba ifyo Yesu aali. Nangu ca kutila afwile ukumfwila amafunde ya calo, tafwile ukwingila mu fikansa fya calo. (Yohane 12:47, 48) Nangu fye bamucushe shani takaleke ukukonka ifishinte fya mu Baibolo ifyo Abena Kristu bakonka. (1 Petro 2:21-23) Lelo te kutila akulatamba fye ifilecitikila abantu ukwabula ukubabikako amano. Umwina Kristu wa cine akabikako amano ku bantu banankwe, nge fyo Yesu acitile. (Marko 6:34) Akeesha na maka ukwaafwa abantu ukwishiba no kucita ifyo Yesu alesambilisha pa kutila baba ne nsansa mu mikalile yabo.—Yohane 13:17.

E fyo ne Nte sha kwa Yehova shicita. Balesha sana ukusakamana abantu filya Kristu alebasakamana. Nangu baaba bekala calo ba mutende kabili abomfwila amafunde, tabaaba ba pano calo. Bapashanya Yesu, e ico tabacitako ulukaakala kabili tabaingisha mu fikansa fya mitekele ya calo ifyaseeka muno nshiku. Basubila ukuti Ubufumu bwa kwa Lesa e bukapwisha amafya yaba mu calo. Abena Kristu ba cine ba nsansa kabili balikatana. (Yohane 13:34, 35) Bena tabafilwa ukukonka ifyo Yesu asambilishe.

BUSHE MWALITONTONKANYAPO PALI IFI?

◼ Bushe Abena Kristu balingile ukuisansha mu fikansa fya calo?—Yohane 6:15.

◼ Bushe Kristu atile ulukaakala e nshila ya kupwishishamo ifikansa?—Mateo 26:50-53.

◼ Abena Kristu ba cine beshibikilwa kuli cinshi?—Yohane 13:34, 35.

[Abatusuminishe Ukubomfya Icikope pe bula 17]

EL COMERCIO, Quito, Ecuador