Ukulingana Na Baibolo

Bushe Mufwile Ukulatiina Abafwa?

Umutundu umo uwa ku Nigeria, uo beta ati aba Annang, basumina ukuti umuntu nga afwa nomba tabacitilepo ifyo bacita abene ku kulanga umucinshi ku ufwile pa kumushiika, umupashi wakwe kuti waleta amafya, kabili kuti waipaya na balupwa wakwe. Abena China bamo nabo basumina ukuti nga ca kuti tabakonkele intambi pa kushiika umuntu, umupashi wakwe ukasansa abantu nangu fye ukwipayapo bamo.

ABANTU mu fyalo ifingi, balisumina ukuti umuntu nga afwa, mu mubili wakwe mulafuma umweo, umupashi nelyo iciwa. Abengi basumina no kuti uyu wine mweo nelyo umupashi uufumamo kuti wacita ifintu fimo kuli balupwa ne fibusa fya muntu uufwile.

Nomba nangu abantu basumina ifi, bushe cine cine kwaliba icintu icishala ica mweo umuntu nga afwa? E lyo bushe ico cine cintu kuti cacusha abantu abatuntulu? Cinshi Baibolo yalandapo pali ili lyashi?

Bushe Umuntu nga Afwa Kulaba Ifyo Eshiba?

Baibolo ilanda ukuti abafwa “tabaishiba akantu nangu kamo.” Ilanda no kutila “balifwa.” (Lukala Milandu 9:5; Esaya 26:14) Icebo ca kwa Lesa cilanda pa muntu wa kubalilapo Adamu ukuti: “Yehova Lesa abumbile umuntu ku lukungu lwa mu mushili kabili apuutile mu myona yakwe umupu wa bumi, no yo muntu aishileba uwa mweo.”—Ukutendeka 2:7.

Mwamona, ilembo lyalanda ukuti ilyo Adamu bamubumbile aishileba uwa mweo, e kutila umuntu umumi. Baibolo tailanda ukuti Adamu bamupeele umweo uwingalekana no mubili wakwe. Kanshi ilyo Adamu abembwike, alifwile. Asangwike “icitumbi.” (Impendwa 6:6) Baibolo na kabili itila: “Umuntu uubembuka e ukafwa.” (Esekiele 18:4) Ulubembu no kukanapwililika kwa kwa Adamu kwalitwambukila bonse fye. Kanshi nga twafwa, no mweo wesu wine ulafwa.—Abena Roma 5:12.

Baibolo tailondolola ifyo abafwa baaba ukubomfya amashiwi ayayafya ukumfwa, lelo ibomfya fye amashiwi ayayanguka, pamo nga ‘ukupona mu tulo twa mfwa.’ (Amalumbo 13:3) Inshita imo, Yesu alandile pa mukashana wa myaka 12 uwafwile ati: “Tafwile iyo lelo aleele fye utulo.” Abantu ba-ambile ‘ukumuseka no kumupumya, pantu balishibe ukuti nafwa.’ Lelo Baibolo ilanda ukuti Yesu alibuushishe ulya mukashana uwaleele utulo twa mfwa.—Luka 8:51-54.

E fyo cali na lintu Lasaro afwile. Yesu aebele abasambi bakwe ukuti ali no kuya ‘mu kubuusha’ Lasaro. Abasambi ba kwa Yesu tabaumfwile umo aloseshe, “Yesu e pa kubeba fye icishinka ati: ‘Lasaro nafwa.’” Umutumwa Paulo na o alilandilepo pa ‘baleele mu mfwa,’ kabili atile pa nshita Lesa umwine asala, akababuusha bakabe no mweo na kabili.—Yohane 11:11-14; 1 Abena Tesalonika 4:13-15.

Tapaba nangu fye pamo apo Baibolo yalanda ukuti, umuntu nga afwa umweo wena taufwa. Kanshi tapali ico tulingile ukulatiinina abafwa. Nomba ninshi nani uwaleta icisambilisho casabankana icalo conse, ica ukuti umuntu nga afwa kulaba icintu cimo icishifwa? Kabili cinshi calenga abantu ukulatiina ukuti abafwa kuti bacita icabipa ku batuntulu?

Ifi Basambilisha Ukuti Umuntu Tafwililila fya Bufi

Imipepele ya bufi, e yasabankanya ici cisambilisho ca kuti umuntu nga afwa tafwililila. Akale sana mu myaka ishishibantu, abantu abengi balisumine ukuti umweo taufwa. Pa mulandu wa ici cisumino, nga ca kuti kateka afwa, pamo nga bakateka ba ku Egupti abo beta ati ba Farao, baleipaya na basha babo pa kuti aba basha bakatwalilile ukubombela uyo kateka uufwile mu bumi bumbi ku ntanshi.

Abantu abengi nga balecula babeba ukutila mipashi ya bafwa e ilebacusha. Pa mulandu wa fyo babeba, basumina ukuti ifibacusha mipashi ya bantu babo abafwa e lyo na bambi abafwile abo bashacitiile ifisuma ifyo balefwaya. Lelo Amalembo yalalanda fye apabuuta ukuti, ifya musango yu fya bufi. Imipashi ishimoneka, iitwa ukuti ifibanda, e icusha abantu, kabili ilomfwa bwino ukubacusha no kubatiinya.—Luka 9:37-43; Abena Efese 6:11,12.

Amalembo yatila Satana “e wishi wa bufi,” kabili “alaifungushanya kwati ni malaika wa lubuuto.” Ena ne fibanda fyakwe ‘balalufya aba pano isonde bonse.’ (Yohane 8:44; 2 Abena Korinti 11:14; Ukusokolola 12:9) Na kuba, Satana wine e waleta no bufi bwa kutila umweo wa muntu taufwa no kuti abafwa kuti bacita icabipa ku ba mweo.

Lelo abaishiba bwino Baibolo, tababepwa ku bufi bwa musango yu. Balishiba bwino ifyo Satana abepa abantu pa kuti ababeleleke ukusumina ukuti abafwa kuti baumfwana na ba mweo. Icishinka ni ci Baibolo yalanda ica kuti: “Aba mweo balishiba ukuti bakafwa; lelo abafwa, tabaishiba akantu nangu kamo.” (Lukala Milandu 9:5) Kanshi Icebo ca kwa Lesa calitweba icine pa fyo abafwa baaba icilenga twilabatiina!—Yohane 8:32.

BUSHE MWALITONTONKANYAPO PALI IFI?

◼ Bushe abafwa balishiba akantu akali konse?—Lukala Milandu 9:5; Esaya 26:14.

◼ Nani aleta icisambilisho casabankana icalo conse ica kuti umuntu nga afwa kulaba icintu cimo icishifwa?—Yohane 8:44.

◼ Ni kwi twingasanga icine pa fyo abafwa baaba?—Yohane 8:32; 17:17.

[Amashiwi pe bula 19]

Imipashi yabipa, yalitemwa ukucusha abantunse, iyi te mipashi ya bantu abafwa