1. Mulesala Bwino Ifya Kulya Muleshita
ABASHIILIMINA ifya kulya bashita ifyo balya ku maliketi nelyo mu matuuka. Cinshi cingamwafwa ukulasala no kushita ifya kulya ifishingamulwalika?
● Saleni inshita ya kushitilapo ifya kulya fimo.
Aba mu Kabungwe ka Food Safety Information Council aka mu Australia batile: “Mulebalilapo ukushita ifya kulya ifishonaika bwangu, e lyo mwalekelesha filya ifisungilwa mu furiji.” E lyo nga muleshita ifyo baipikila kabela, mulefishita ilyo muli mu kuya ku ng’anda.
● Mwilashita ifyaikala inshita iitali.
Muleshita ifya kulya lilya line fye fyaisa.a Ba Ruth, abekala ku Nigeria, kabili abakwata abana babili batile: “Natemwa ukuya ku maliketi lucelocelo ninshi e lyo baleta fye ifya kulya.” Ba Elizabeth, aba ku Mexico, abashita ifya kulya pa maliketi nabo batile: “Ku maliketi ndashita ifisabo ne misalu ninshi e lyo bafiswa fye, kabili ndaisalila ifyo ndefwaya. Ndashita ne nama ninshi e lyo baipaya fye. E lyo nga yashalako njisungila mu furiji.”
● Mulebebeta ifya kulya muleshita.
Muleyipusha amuti: ‘Bushe umunani nshitile uli fye bwino? Bushe inama naikwata akaceena akabi?’ Ifya kulya nga balafibika mu cipaketi, moneni icipaketi nga taconaike. Nga naconaika utushishi tuleta amalwele kuti twaingila mu fya kulya.
Ba Chung Fai, abashita ifya kulya mu matuuka ku Hong Kong batile: “Calicindama sana ukulolesha pa cipaketi no kumona ilyo ifya kulya filimo fikonaika.” Mulandu nshi cacindamina? Abasoma pali uyu mulandu batila, nga “bwalipita ubushiku batila e bo ifya kulya fikonaikilapo,” kuti fyamulwalika nga mwafilya nangu ca kuti filemoneka bwino no kununkila bwino e lyo no kumfwika bwino.
● Mulefilonga bwino pa kusenda.
Nga kwaliba ifyo mushitilamo ifya kulya lyonse, mulefisuka ne sopo na menshi libili libili. Mulesendela isabi ne nama fyeka pa kuti tafilekumya ifya kulya fimbi.
Ba Enrico abekala ku Italy na bena mwabo ba Loredana, bashita ifya kulya uko bekalila. Batile: “Ukucite fyo kulalenga twilaenda intamfu iikalamba ne fya kulya pantu kuti fyaonaika.” Nga ca kuti palapita amamineti ukucila pali 30 pa kuyafika ku ng’anda, mulebika ifya kulya ifiba mu furiji mu cipe icingalenga fyaikala fye ifyatalala pa kuti tafyonaike ilyo muleya mu kufika ku ng’anda.
Mu cipande cikonkelepo, tukalanda pa fyo mwingasunga bwino ifya kulya ilyo fyafika mu ng’anda mu mwenu pa kuti tafimulwalike.
[Futunoti]
a Moneni icipande caba muli Loleni! ya April–June 2011 icitila, “Icalenga 1—Mulelya Ifya Kulya Ifisuma.”
[Akabokoshi pe bula 14]
SAMBILISHENI ABANA BENU: “Ndasambilisha abana bandi ukulamona ubushiku ifya kulya fiba mu fipaketi fikonaika ilyo bashilafishita.”—Ba Ruth, aba ku Nigeria