Nomba Line Kuli no Kuba Ifya Kulya Ifishingamulwalika!
PA KUTI ifya kulya mulya filamulwalika, mufwile ukucitapo fimo. Na lyo line, te fyonse mwingakwanisha ukucita. Ku ca kumwenako, te kuti mukwanishe ukuceeceeta ifya kulya fyonse ilyo mushilafishita. Limo kuti mwashita ifya kulya ififuma ukutali sana. Kabili ku fya kulya fimo ifyo mwingashita, kuti kwaba imiti nelyo ifintu fimo ifiba mu mwela, mu menshi nelyo mu mushili ifingamulwalika.
Muli lipoti imo iyandile pa bwafya bwaba mu fyalo ifingi ubwa kupwisha amalwele yafuma ku fya kulya, aba mu kabungwe ka World Health Organization batile, “te calo cimo icingapwisha ubu bwafya, lelo ifyalo fyonse fifwile ukubombela pamo.” Amalwele yafuma ku tushishi tuba mu fya kulya yaba fye mu fyalo fyonse!
E mulandu wine abengi bapapila nga twalanda ukuti pano isonde pakaba ifya kulya ifishakalelwalika abantu. Icalenga ifwe tushininkishe, ni co “Yehova, Shikulu we sonde lyonse,” alilaya ukupwisha ubu bwafya bwa malwele yafuma ku fya kulya. (Yoshua 3:13) Bamo kuti batila, ifi kwaba ifya kulya ifikwata utushishi tuleta amalwele, cilanga fye ukuti Lesa te kuti apwishe ubu bwafya. Lelo baleni mutontonkanye: Bushe ifya kulya nga fyaonaika pa mulandu wa kuti uutwala ifya kulya ku bantu tabikileko amano, kuti mwapeela uwacipika umulandu? Awe iyo.
E fyo caba na ku fya kulya, icalenga twilakwata ifya kulya ifisuma, ni co abantu balyonaula icalo. E balenga ukuti ifya kulya fileleta amalwele, te Kabumba iyo. Lesa alilaya ukuti “akonaula abaleonaula isonde.”—Ukusokolola 11:18.
Icishinka ca kuti, Lesa alitulanga ukuti afwaya abantu balelya ifya kulya ifisuma. E wapangile isonde no muti onse “uwawama ukumona” kabili “uwawama ukulyako.” (Ukutendeka 2:9) Na lintu abantunse batendeke ukulwala, Yehova Lesa alyebele abantu bakwe ifya kucita ifyali no kucingilila ifya kulya ne mibili yabo.—Moneni akabokoshi kaleti: “Amafunde Ayalelanda pa Bumi.”
Fya kulya fya musango nshi Lesa afwaya tulelya? Baibolo itila: “Mulenga umulemfwe wa nama ukumena, E lyo ne fimenwa fya kuti abantu balebomfya, mulenga ne fya kulya ukufuma mu mushili, no mwangashi uulenga umutima wa muntunse umwina kufwa ukusekelela, ku kulenga icinso ukubeeka ku mafuta, no kulenga kube ifya kulya ifiikusha umutima wa muntunse umwina kufwa.” (Amalumbo 104:14, 15) Baibolo isosa no kuti: “Inama shonse isha mweo mukalelya.”—Ukutendeka 9:3.
Icebo cakwe cilanda pa nshita ya ku ntanshi aciti: “Akapeela imfula ya mbuto shenu isho mwabyala mu mushili, kabili umukate ukaba ukulobolola kwa mu mushili wenu, kabili ukaba uwa mulyo kabili uwa mafuta. Muli ubo bushiku, ifitekwa fyenu fikalya mu mulemfwe mu ncende iikalamba.” (Esaya 30:23) Ca cine, ku ntanshi uku tuleya, takwakabe amalyashi ya bulanda, twakulaumfwa fye amalyashi ayasuma pa fya kulya ifisuma ifyo abantu bonse bakakwata.
[Amashiwi pe bula 19]
Kabumba wesu alitulaya ukuti ku ntanshi ifintu fikawama kabili kukaba ifya kulya ifingi kabili ifisuma
[Akabokoshi pe bula 18]
“AMAFUNDE AYALELANDA PA BUMI”
Imyaka 3,500, iyapita, abena Israele balibapeele Amafunde. Yalya mafunde yalebacingilila ku malwele ayafuma ku fya ku kulya. Moneni fimo ifyo amafunde babapeele yalandile:
● Mwilaikata ifipe ifyakowela nelyo imbale iyo icinama icafwa cikumisheko: “Icipe conse ica musango onse icibomfiwa, cikabikwe mu menshi, kabili cikaba icakowela ukufika icungulo e lyo cikasanguluka.”—Ubwina Lebi 11:31-34.
● Mwilalya inama nga yaifwila: “Mwilalya conse icaifwila”—Amalango 14:21.
● Nga mwashapo ifya kulya, pelapita inshita iikalamba pa kuti mukafilye: “Icashalapo kuti caliiwa ulucelo lukonkelepo. Lelo icashalapo ica munofu we lambo ukufika ku bushiku ubwalenga shitatu cikocewe mu mulilo.”—Ubwina Lebi 7:16-18.
Ba A. Rendle Short, balipapile ukuti mu Mafunde ayo Lesa bapeele abena Israele mwali “amafunde ayasuma ayalelanda pa bumi,” ayapusene sana na mafunde ya nko shimbi ishaliko pali ilya nshita.