Ubunkalwe Bulatukuma Bonse

NI BANI bengatila ubunkalwe tabubakuma? Lyonse tulatamba ubunkalwe mu malyashi ya pa TV. Tulatiina abankalwe mu misebo na ku ncito, kabili abankalwe balacusha abana ku sukulu. Nangu fye ni mu lupwa umo abantu iling line bamona kwati nabacingililwa, abengi maka maka banamayo baba fye aba mwenso. Na kuba, mu fyalo fimo, banamayo abengi balanda ukuti balibasansapo ku muntu umukaya sana.

Mu fyalo ifingi, abantu balatiina ifimfulunganya no kusansa kwa fipondo. Icilelanga ukuti abantu bali sana no mwenso, kufulisha kwa makamera mu fyalo fimo aya kumwenako abalwani, maka maka muli filya fyalo umo ifipondo fifwaisha ukusansa.

E mulandu wine abapanga amakamera ya kumwenako abalwani balepangila sana ulupiya, nangu ca kuti aba makwebo bambi bena balelila ukuti amakwebo yabo tayale-enda bwino. Ni kwi kufuma indalama sha kucitilamo ifi fyonse? Shifuma kuli ifwe bonse ilyo tulipila imisonko iyalekanalekana. Kabili indalama ishingi shikalafwaikwa ilyo bakasangako inshila shimbi isha kuicingililamo kabili ishakosa umutengo.

Ifyabipa ififuma mu bunkalwe filingile ukutulenga twatontonkanya sana pa mibele yesu na pa fyo twasuminamo. Ifipande fikonkelepo fyala-asuka aya mepusho: Bushe abasabankanya ilyashi balenga shani ubunkalwe ukusalangana? Finshi fingalenga twapata nelyo ukutemwa ubunkalwe? Kuti twaicingilila shani ku fyabipa ififuma mu bunkalwe?