Ulufyengo Lwali fye Mpanga Yonse
Abashimika ili lyashi ni ba Patrick O’Kane
NAFYELWE mu 1965 ku Northern Ireland kabili nakulile mu Citungu ca Derry. Ulupwa lwesu lwali lupiina. Muli ilya myaka, kwali ifimfulunganya pa kati ka baKatolika na baProtestanti ifyasendele imyaka ukucila pali 30. BaKatolika abali abanono muli ici calo balemona kwati baProtestanti abafulile mu buteko balebatitikisha no kulakaana ukubengisha incito nelyo ukubapeela amayanda pa mulandu fye wa kuti ni baKatolika.
Ala kwali ulufyengo ica kuti nangu fye nine wine nalifyengelwepo imiku iingi. Ilingi nga ndeya kumo, bakapokola nelyo abashilika balenjiminika no kutendeka ukundubulwisha no kumpikita uku ninshi nabansonta ne mfuti. Naleumfwa kwati balencusha sana, e ico natendeke ukulatontonkanya ukuti limbi kuti nacitapo cimo pali ulu lufyengo.
Ilyo kwali ukwibukisha abantu 14 abo baipeye ku bashilika ba calo ca Britain pa bushiku baleita ati Bloody Sunday mu 1972, na ine e ko nali. Na kabili mu 1981, nalisangilweko na ku kwibukisha abafungwa abafwile ku nsala pa numa ya kusalapo ukuleka ukulya pa nshiku ishingi. Pa numa, naimike amaflagi ya calo ca Northern Ireland ayo ubuteko bwa Britain bwabindile no kulembaula pa fikuulwa ifilembo fya kulenga abantu ukupata abena Britain. Ilingi kwaleba sana ifyongo pantu cila nshita baKatolika balebepaya.
Ilyo nali pa yuniversiti, nailundile ku bana be sukulu abalecita ifyongo pa fyo abantu baleonaula ifilengwa na Lesa. Lyena nakukiile ku London, kulya nako nali-ilundile mu fyongo fyaimishe akabungwe ka ba socialist ku kuilishanya pa fyo ubuteko bwalecita ifyaleafwa fye abakankaala no kuliila abapiina amasuku pa mutwe. Nailundile na mu fyongo ifyaimishe abemininako ababomfi ba makampani pa kuilishanya pa fyo ubuteko bwa cefesheko amalipilo ya babomfi, kabili nailundile na mu fyongo fyaliko mu 1990 ku kuilishanya pa misonko ikalamba iyo ubuteko bwalefwaya abantu ukulalipila, kabili ifi fyongo fyalengele incende baleita ati Trafalgar Square ukonaika ububi nga nshi.
Nomba icatendeke ukunkalipa ca kuti ifyongo tafyalepwisha ubwafya, lelo ilingi fyalelenga fye abantu mu calo ukupatana sana.
Pali ilya ine nshita, umunandi aishilelenga naishibana ne Nte sha kwa Yehova. Ba Nte bansambilishe ukubomfya Baibolo ukuti Lesa alasakamana pali ifi tucula kabili akafumyapo fyonse ifyabipa ifyo abantunse bacita. (Esaya 65:17; Ukusokolola 21:3, 4) Abantunse nangu bakwate shani amapange ayasuma, te kuti balete umulinganya mu calo. Tulakabila Lesa ukulatutungulula e lyo tulakabila ukwishiba ukuti Yehova fye, e wakwata amaka ya kufumyapo ifibanda ifilenga amafya ayengi ayaba mu calo.—Yeremia 10:23; Abena Efese 6:12.
Nomba ng’umfwa kwati filya fyongo twalecita pa lufyengo lwalecitika twaleicusha fye, cimo no kwesha ukooba ubwato ubutulike ubuleya bulebunda. Ndomfwa bwino sana ukwishiba ukuti kukaba inshita ilyo pano calo tapakabe ulufyengo, ilyo abantu bonse bakaba fye cimo cine.
Baibolo isambilisha ukuti Yehova Lesa “atemwa umulinganya.” (Amalumbo 37:28) E mulandu wine twacetekelela ukuti akalenga mu calo mukabe umulinganya uo amabuteko ya bantunse yafilwa ukuleta. (Daniele 2:44) Nga mulefwaya ukwishibilapo na fimbi, landeni ne Nte sha kwa Yehova ku ncende mwikala nelyo belengeni ifyebo na fimbi pa Intaneti pa www.pr418.com.
[Icikope pe bula 11]
[Abatusuminishe]
Protest images: Copyright Homer Sykes
[Amashiwi pe bula 12]
Abantunse nangu bakwate shani amapange ayasuma, te kuti balete umulinganya mu calo