ILYASHI LYA PANO ISONDE

Isonde Lyonse

Ukulingana ne fyalandile akabungwe ka World Health Organization (WHO), ukucusha abanakashi “bwafya ubuseekele sana mu fyalo ifingi.” Aka akabungwe kalandile no kuti, “Pa banakashi 100, abali 35 balabapuma ku bena mwabo nelyo kubo baupilweko kale. Ilingi line abanakashi abaupwa e bo bacusha sana ku bena mwabo.”

Britain

Pa bantu 64,303 abo baipwishe, abantu 50,800 batile “imipepele yalileta amacushi ne fimfulunganya pano calo.” Na kabili ilyo kwali ukupenda abantu mu England na mu Wales mu 2001, casangilwe ukuti abantu abengi sana abo baipwishe, batile Bena Kristu, lelo ilyo papitile imyaka 10, casangilwe ukuti abantu ukucilako fye panono pali hafu, e batile Bena Kristu. Pa nshita imo ine, abantu abashatemenwe ifya mapepo balifulileko.

China

Ukulingana ne lyashi lyafumine ku milabasa, ubuteko bwalipanga ifunde lya kuti abana abakalamba bafwile ukulatandalila abafyashi babo abakoloci libili libili no kubafwilisha nga kuli “ifilebasakamika.” Ili ifunde “talyalanda ifyo abana” abafilwa ukulikonka bakalakandwa.

Europe

Bampulamafunde nabatendeka ukupanga ifintu ifyo abantu babomfya sana pamo nga ifya kusubasuba, sopo e lyo ne fya kulya ifishalondoloka. Umukalamba wa ku kampani kalolekesha pa fya kulya atile: “Nangu ca kuti ifibomfiwa pa kupanga ifintu fimo tafyakosa no mutengo, bampulamafunde bena babomfya ifintu fimbi fye ifishalondoloka.” Uwasambilila sana pa fya kulya asangile ukuti ifya kulya fimo ifyo bashitisha mu fyalo ifikankaala balabikamo fimo ifilenga fiiba ifyo fifwile ukuba.