Ifyo Mwingacita Umwana Wenu nga Amwipusha pa Mfwa

UMULANDU CAFISHA

Elenganyeni ukuti umwana wenu uuli ne myaka 6 amwipusha ati, “Bushe na imwe bushiku bumo mu kafwa?” Kuti mwapapa e lyo mwayipusha amuti: ‘Bushe umwana wandi nakula ica kuti nga namweba icasuko kuti aumfwa? Kuti nalanda shani nankwe pa lwa mfwa?’

IFYO MUFWILE UKWISHIBA

Abana balatontonkanyapo pa mfwa. Bamo balapanga no tusela umo bacita kwati umo nafwa. Kanshi, tatufwile ukumona imfwa kwati lyashi ilyo tushingalandapo no mwana, kabili mufwile ukwasuka amepusho ayo alemwipusha pa mfwa. Nga ca kuti limo limo mulelandako pa mfwa no mwana, mukamwafwa ukwishiba ifya kucita nga ca kuti umuntu uo atemwa afwa.

Mwilamona kwati nga mulelanshanya no mwana pa mfwa akulaikala fye mwenso mwenso. Lelo, ici cine e cikamwafwa no kukanalatiina imfwa. Lelo mulingile ukumulondolwela bwino ifyo imfwa yaba. Ku ca kumwenako, abasambilila sana pa fyo abana baba batila, abana abashilafisha imyaka 6 tabaishiba ukuti umuntu nga afwa ninshi capwa. Mufisela bangala, umwaice kuti aipanga kwati nafwa e lyo panono fye abuuka.

Lelo, nga bayabalekula baleshiba ukuti imfwa ibi, e cilenga baleipusha amepusho, ukusakamana nelyo ukuba no mwenso maka maka nga kwaliba uo batemwa uwafwa. Kanshi calicindama ukulanshanya no mwana pa mfwa. Marion Haza uwasambilila sana pa fyo abantu batontonkanya atile: “Umwana alatiina sana imfwa nga ca kuti abafyashi balemukanya ukulanda nabo pa mfwa.”

Tamulingile ukulasakamana sana pa fyo mwingalanda. Abafwailishe sana pali ili lyashi batile ico abana bafwaya fye “kubeba icishinka mu nshila ya cikuuku.” Muleibukisha ukuti umwana nga amwipusha icipusho cimo ninshi alefwaya ukwishiba icasuko.

IFYO MWINGACITA

Mulemona inshita iisuma iyo mwingalanshanya nankwe pa mfwa. Tutile umwana wenu amona akoni akafwa mu mbali ya mu musebo nelyo icitekwa pa ng’anda cafwa, kuti mwamwipusha amepusho ayengalenga alanda ifyo aletontonkanya. Nalimo kuti mwatila: “Bushe inama iyafwa ilacula? Bushe ilomfwa impepo nelyo insala? Kuti waishiba shani ukuti inama naifwa nelyo umuntu nafwa?”—Ilembo ilingamwafwa: Lukala Milandu 3:1, 7.

Mwimufisa. Nga ca kuti uo mwaishiba nelyo lupwa afwa, mwilamupita mu mbali no kulamweba amashiwi pamo nga “baliya mu kutandala.” Pantu ici kuti calenga umwana alamona kwati kasuba kamo bakabwela. Kanshi mulingile ukumulondolwela fye icishinka mu nshila iya-anguka. Ku ca kumwenako, kuti mwatila: “Ilyo bamama bafwile umubili wabo walilekele ukubomba. Kanshi te kuti tulande nabo, lelo tatwakabalabe.”—Ilembo ilingamwafwa: Abena Efese 4:25.

Mwebeni ukuti te walengele. Umwana kuti aletontonkanya ukuti ifyo acitile nelyo ifyo alandile e fyalengele ukuti uyo muntu afwe. Mu nshita ya kumweba fye ukuti te walengele, kuti mwamwipusha amuti, “Cinshi uletontonkanishisha ukuti ni we walengele?” Ilyo alelondolola mulekutikisha, kabili mwilasuusha ifyo alelanda. Na kabili, apo umwana umunono kuti nalimo aletontonkanya ukutila imfwa ilambukila, mwebeni ukuti te kuti imwambukile.

Mwafweni ukulanda ifili ku mukoshi. Mulelanda nankwe pa bantu mwatemenwe abafwa, pamo nga balupwa wenu abafwa abo tamwenepo. Kuti mwamushimikilako ifisuma fimo ifyo banyinasenge, banalume, nelyo banakulu bacitile ilyo tabalafwa. Nga mulebalandapo ninshi mulemusambilisha ukuti tacabipa ukubalandapo nelyo ukubatontonkanyapo. Lelo, nga talefwaya ukulandapo, tamulingile ukumupatikisha. Kuti mwalanshanyapo inshita imbi iyo mukamona ukuti nailinga.—Ilembo ilingamwafwa: Amapinda 20:5.