Cinshi Baibolo Ilanda?

Lekeni tulande pa masesemo yakonkapo:

• “Uluko lukemina uluko lubiye no buteko bukemina ubuteko bubiye, kabili kukaba ifipowe ne finkukuma mu ncende shimo shimo.”—Mateo 24:7.

• “Mu nshiku sha kulekelesha mukesaba inshita ishayafya nga nshi. Pantu abantu bakaba abaitemwa, abatemwa indalama, aba mataki, aba matutumuko, aba miponto, abashumfwila abafyashi babo, abashitasha, abashaba na cishinka, abashatemwa abantu, abashifwaya ifipangano, aba lwambo, abashailama, abankalwe, abashatemwa ubusuma, abafutuka abanabo, bamunshebwa, aba cilumba, abatemwa ukwangala ukucila ukutemwa Lesa.”—2 Timote 3:1-4.

Aya amasesemo ayalanda pa filecitika mu calo yalalenga abantu abengi balamona kwati ifintu mu calo fya kulabipilako fye. Icalo cilebipilako fye ica kuti abantu te kuti bacitepo icili conse. Ukulingana ne fyo Baibolo ilanda, abantunse tabakwata amaka yakupwisha ifyabipa fyonse ifilecitika. Ifi fine e fyo na malembo yakonkelepo yalanda:

• “Kuli inshila iyalungama ku muntu, lelo ku mpela ya iko kwaba imfwa.”—Amapinda 14:12.

• “Umuntu atekela umuntu munankwe ku kumucusha.”—Lukala Milandu 8:9.

• “Umuntu . . . takwata amaka ya kutungulula intampulo shakwe.” —Yeremia 10:23.

Nga ca kuti abantu batwalilila ukucita fye ifyo balefwaya, icalo cikonaikilila. Lelo ici tacakacitike. Cinshi twalandila ifi? Baibolo itila:

• Lesa ‘ashimpile isonde pa cifulo ca liko icapampamikwa; Talyakatelentenshiwe umuyayaya, umuyayaya.’—Amalumbo 104:5.

• “Inkulo imo ilepita, ne nkulo imbi ileisa; lelo isonde lyaikalilila fye umuyayaya.”—Lukala Milandu 1:4.

• “Abalungama e bakekala mu calo, kabili bakekalamo umuyayaya.”—Amalumbo 37:29.

• “Ingano shikafula nga nshi pano isonde; Pa muulu wa mpili shikafula icine cine.”—Amalumbo 72:16.

Ifi Baibolo ilanda filalenga twaishiba ukuti icalo tacakonaikilile. Abantu tabakafwe ku mwela wabipa, ku cipowe na ku kukanakwata amenshi nelyo ku fintu fimbi ifileonaula icalo. Na kabili icalo tacakonaulwe ku mabomba yakwatisha amaka. Mulandu nshi? Ni co Lesa akacingilila icalo. Ca cine ukuti Lesa alipeela abantu insambu sha kuisalila, nomba ifyo basalapo ukucita kuti fyalenga ifintu fyabawamina nelyo ukubabipila. (Abena Galatia 6:7) Lesa takaleke abantu bakaleonaula fye icalo ukufikila cikonaikilile. Alikwata apo engapeleela ukusuminisha abantu ukucita ifingabaletela amafya.—Amalumbo 83:18; AbaHebere 4:13.

Nomba kwaliba na fimbi ifyo Lesa akacita. Akalenga ‘umutende ukufula’ pa calo. (Amalumbo 37:11) Ifisuma ifikacitikila abantu ku ntanshi ifyo tulandilepo muli cino cipande, fimo fye pa fyo Inte sha kwa Yehova shisambilila mu Baibolo ukuti e fikacitika ku ntanshi.

Inte sha kwa Yehova bantu ba mishinku yalekanalekana kabili ababa mu calo fye conse. Bapepa Lesa wa cine, uo Baibolo yalanda ukuti ishina lyakwe ni Yehova. Tabatiina ifikacitika ku ntanshi pantu Baibolo itila: “Yehova, Kalenga wa muulu, Lesa wa cine, Kapanga we sonde kabili Kalenga wa liko, uwalipampamike, ushalipangiile apa fye, lelo uwalipangiile ukuti lileikalwamo, atila: ‘Nine Yehova, kabili takwaba umbi.’”—Esaya 45:18.