Ni Kwisa Mwingasanga Ifingalenga Mwaisaba ne Nsansa ku Ntanshi?

Nge fyo tulandilepo mu cipande cifumineko abantu bamona ukutila, ukuba ne shuko, ukusambilila sana, ukukwata icuma e lyo no kuba umuntu umusuma kuti kwalenga baisaikala bwino ku ntanshi. Ukucita ifi cimo no kuti ulefwaya ukuya ku ncende imo iyo ushayako lelo mapu ulebomfya ya ku ncende imbi. Bushe ici cilolele mu kuti tapali ifingalenga twaisaba ne nsansa ku ntanshi? Awe.

UKO TWINGASANGA IFINGALENGA TWAISABA NE NSANSA

Abantu nga balepingula pa fintu balepushako ku bakalamba nelyo abaishiba ifingi. Na ifwe bene Twalikwata umukalamba, uwa mano sana kabili uwaishiba ifingi uo twingepushako ifyo twingacita pa kuti tukeseba ne nsansa ku ntanshi. Kuti twaishiba ifyo e ngatupanda amano nga ca kuti tulebelenga icitabo icalembelwe imyaka nalimo 3,500 iyapita. Ici icitabo bacita ukutila, Baibolo.

Cinshi cingalenga twacetekela Baibolo? Ni co Uwalembele ici citabo mukalamba sana kabili E wakwatisha amano. Bamulondolola ukuti “Wa Nshiku ne Nshiku” kabili abako “ukufuma umuyayaya no kuya umuyayaya.” (Daniele 7:9; Amalumbo 90:2) Ni “Kalenga wa muulu, Lesa wa cine, Kapanga we sonde.” (Esaya 45:18) Atweba ukuti ishina lyakwe ni Yehova.—Amalumbo 83:18.

Apo uwalembele Baibolo ni Kalenga wa bantu bonse, Baibolo tailandapo ukuti umushobo umo waliwamapo ukucila umushobo umbi. Lyonse fye ifyo itupanda amano filabomba kabili nga twafikonka tukanonkelamo te mulandu no ko twikala. Baibolo e ko yaba mu ndimi ishalekanalekana kabili libuuku ilyo basabankanya sana ukucila ifitabo fimbi.a Ico bacitila ifi ni pa kutila bonse baleibelenga e lyo no kukonka ifyabamo. Ifi fine e fyo na Baibolo iine ilanda.

“Lesa taba na kapaatulula, lelo umuntu uwa mu luko lonse uutiina Lesa no kucita icalungama alapokelelwa kuli ena.”—IMILIMO 10:34, 35.

Nga filya fine umufyashi umusuma apanda abana bakwe amano, e fyo na Yehova Lesa umufyashi wesu abomfya Baibolo pa kutupanda amano. (2 Timote 3:16) Apo e watubumbile kuti twacetekela ifyo atweba kabili alishiba ne fingatuwamina.

KUTI TWACETEKELA IFYABA MU BAIBOLO

Kuti twacetekela ukuti Baibolo ya cine pantu imyaka 2,000 iyapita, yalisobele ifya cine pa fyo ifintu fikaba e lyo ne fyo imibele ya bantu ikaba ifyo tulemona pali ino nshita.

IFYO YASOBELE

“Uluko lukemina uluko lumbi, no buteko bukemina ubuteko bumbi; kabili kukaba ifinkukuma ifikalamba, na mu ncende shimo shimo mukaba ifikuko ne fipowe.”—LUKA 21:10, 11.

IMIBELE YA BANTU

“Mu nshiku sha kulekelesha mukesaba inshita ishayafya nga nshi. Pantu abantu bakaba abaitemwa, abatemwa indalama, aba mataki, aba matutumuko, aba miponto, abashumfwila abafyashi babo, abashitasha, abashaba na cishinka, abashatemwa abantu, abashifwaya ifipangano, aba lwambo, abashailama, abankalwe, abashatemwa ubusuma, abafutuka abanabo, bamunshebwa, aba cilumba, abatemwa ukwangala ukucila ukutemwa Lesa.”—2 TIMOTE 3:1-4.

Cinshi calengele ukutila filya Baibolo yasobele fise ficitike filya fine fye? Nalimo na imwe kuti mwalanda nga ba Leung aba ku Hong Kong abatile, “Aya masesemo yalembelwe kale sana kabili umuntu te kuti asobele ifikacitika ku ntanshi. Ici cilelangilila fye ukuti Baibolo yafuma ku muntu uwaishiba sana ifingi ukutucila.”

Mu Baibolo mwaliba amasesemo ayengi nganshi ayafikilishiwa.b Aya amasesemo yalangilila fye ukuti Baibolo cebo ca kwa Lesa. Yehova atila, “Nine Lesa kabili takwaba Lesa umbi” no kuti “ne usobela pa kutendeka ifikacitika ku mpela.” (Esaya 46:9, 10) Kanshi ukwabula no kutwishika kuti twacetekela ifyo Baibolo ilanda.

IFINGALENGA MWABA NE NSANSA PALI INO NSHITA E LYO NA KU NTANSHI

Mukanonkelamo nga mulekonka ifyaba mu Malembo ya Mushilo. Tontonkanyeni pa fya kumwenako fimo.

IFYO TULINGILE UKULAMONA INDALAMA NE NCITO

“Ukutuusha panono kwawama ukucila ukucishamo ukubombesha no kuuma fye umwela.”—LUKALA MILANDU 4:6.

IFYO MWINGABA NE NSANSA MU LUPWA

“Na imwe umo umo, onse atemwe umukashi wakwe ifyo aitemwa umwine; umukashi na o abe na katiina ku mulume wakwe.”—ABENA EFESE 5:33.

IFYO MWINGALAUMFWANA NA BANTU BAMBI

“Leka ubukali kabili taluka ku cipyu; wikalipa pantu ukukalipa kulenga umuntu ukucita ifyabipa.”—AMALUMBO 37:8.

Ukukonka ifyo Baibolo ilanda kuti kwalenga mwaba ne nsansa pali ino nshita e lyo na ku ntanshi. Lesa alitulaya mu Baibolo ukuti ifintu fikawama ku ntanshi no kuti:

ABANTU BAKALAIKALA MU MUTENDE

“Bakasekelela nga nshi pantu umutende ukafula.”—AMALUMBO 37:11.

BONSE BAKAKWATA UMWAKWIKALA NE FYA KULYA

“Kabili bakakuula amayanda no kwikalamo; bakalima na mabala ya myangashi no kulya ifisabo fya yako.”—ESAYA 65:21.

ABANTU TABAKALELWALA NO KUFWA

“Ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—UKUSOKOLOLA 21:4.

Finshi mulingile ukucita pa kuti mukabeko ilyo ifi twalandapo fikafikilishiwa? Belengeni icipande cikonkelepo.

a Nga mulefwaya ukwishiba ifingi pa fyo Baibolo ipilibulwa ne fyo yasabankanishiwa kabiyeni pa www.jw.org lyena muleya pa AMASAMBILISHO YA MU BAIBOLO > ILYASHI LYA KALE NA BAIBOLO.

b Nga mulefwaya ukwishibilapo na fimbi, moneni icipandwa 9 mu citabo citila Baibolo—Cebo ca kwa Lesa Nelyo ca Muntu? Abasabankanya ici citabo ni Nte sha kwa Yehova, kabili e po caba na pa www.jw.org. Kabiyeni pa IMPAPULO > IFITABO NA MABROSHUWA.