Baibo Kuti Yatwafwa Ukwishiba Ifisuma ne Fyabipa
Te kuti twishibe nga ca kuti ifyo tulefwaya fili fye bwino nga tuletontonkanya fye pa fyo tumfwa, ne fyo abantu bambi bomfwa. Baibo yalilanda pa mulandu cabela ifi, e lyo yalanda na pa fishinka na fimbi. Yalilanda pa fyo twingaba ne mibele iisuma iingalenga twaba ne nsansa.
TULAKABILA UKUTI LESA ALETUTUNGULULA
Mu Baibo, Yehovaa Lesa alitweba ukuti e ulingile ukulatungulula abantu, kabili abantu tabalingile ukulaitungulula abene. (Yeremia 10:23) E co atupeelela amafunde ayalanda pa mibele iisuma ayaba mu Baibo. Alitemwa fwe bantunse kabili tafwaya tulecita ifyabipa ifingalenga twaba na mafya. (Amalango 5:29; 1 Yohane 4:8) Kabumba wesu alikwata sana amano kabili alishiba ifingatuwamina. (Amalumbo 100:3; 104:24) Nomba tapatikisha abantu ukuti balekonka amafunde yakwe.
Ilyo Yehova abumbile umwaume no mwanakashi abakubalilapo e kutila Adamu na Efa, alibapeele fyonse ifyo balekabila pa kuti bengaba ne nsansa. (Ukutendeka 1:28, 29; 2:8, 15) Alibapeele ne funde ilisha-afishe ukukonka ilyo balingile ukulaumfwila. Lelo alibapeele no buntungwa ubwa kusalapo nampo nga bali no kulakonka ili ifunde nelyo iyo. (Ukutendeka 2:9, 16, 17) Ku ca bulanda, Adamu na Efa basalilepo ukukonka ifyo baletontonkanya ukucila amafunde ya kwa Lesa. (Ukutendeka 3:6) Finshi fyafuma mu fyo basalilepo ukucita? Bushe abantunse balekala bwino ifi baisalila abene ifya kucita? Nakalya. Ifyacitika ukufuma ilya nshita filangilila ukutila te kuti tuleikala mu mutende nelyo ukuba ne nsansa nga tatulekonka amafunde ya kwa Lesa.—Lukala Milandu 8:9.
Mu Baibo mwaliba ifyo tulingile ukukonka pa kuti tulepingula bwino pa fintu te mulandu na kuntu twikala. (2 Timote 3:16, 17; moneni akabokoshi kaleti “Ibuuku lya Bantu Bonse.”) Natumone ifyo Baibo icita ifi.
Sambilileni umulandu twingalandila ukuti Baibo “cebo ca kwa Lesa.”—1 Abena Tesalonika 2:13. Tambeni vidio itila Nani Umwine wa Fyebo fya mu Baibolo? Pa jw.org.
IFYO BAIBO ITULANGA IFYO LESA AFWAYA TULECITA
Mu Baibo mwaba amalyashi ya cine pa fyo Yehova omfwana na bantu. Ifyaba mu Baibo filatulanga ifyo Lesa amona ukuti fisuma nelyo fyalibipa, ifingalenga ifintu fyatuwamina nangu ifingalenga twaba na mafya. (Amalumbo 19:7, 11) Tulasambilila amashinte ayengalenga twaishiba ifya kucita cila bushiku.
Ku ca kumwenako, tontonkanyeni pa fyo Baibo ilanda pa Amapinda 13:20 apatila: “Uule-enda na ba mano akaba uwa mano, lelo uwangala na bawelewele akacula.” Ili ishinte lilabomba pali ino nshita nga fintu lyalebomba kale. Mu Baibo mwaliba amashinte ayengi ayabomba bwino nge li ishinte.—Moneni akabokoshi kaleti “Ifyo Baibo Ilanda Filabomba Bwino.”
Nalimo kuti mwaipusha amuti, ‘nomba kuti nashininkisha shani ukuti amashinte yaba mu Baibo yalabomba na muno nshiku?’ Mu cipande cikonkelepo tukalanda pa fyo Baibo ya-afwa abantu bamo muno nshiku.
a Yehova e shina lya kwa Lesa.—Amalumbo 83:18.