Ifyo Bamo Balanda Ukuti E Filenga Tulecula

AbaHindu

balanda ukuti ifilenga umuntu ukucula filubo acita pali ino nshita nelyo ifyo acitile ilyo ashilafyalwa mu bumi ali nabo pali nomba. Batila umuntu alafwa no kufyalwa cipya cipya imiku iingi mpaka aba icibumbwa ca mupashi. Nga aba icibumbwa ca mupashi alaleka ukufwa, kabili ici e co beta ukuti moksha.

AbaShilamu

balanda ukuti umuntu nga alecula ninshi Lesa alemukanda pa filubo fyakwe nelyo ale-esha icitetekelo cakwe. Ba Dr. Sayyid Syeed, ba president ba Islamic Society of North America batile: Amacushi yalalenga tuleibukisha “ukulatasha Lesa pa fyo atupaala na kabili yalalenga twaishiba ukutila tufwile ukula-afwa abalecula.”

Aba mu mipepele ya baYuda

balanda ukuti icilenga umuntu ukucula, fintu acita. AbaYuda bamo basumina ukuti kukaba ukubuuka, kabili pali iyi nshita abantu abo bafyengele bakabalambula. AbaYuda bambi nabo basumina mu cisambilisho ca Kabbalistic, umo balanda ukuti umuntu alafwa no kufyalwa cipya cipya imiku iingi pa kuti engawamyako imibele yakwe no kuba umuntu umusuma.

AbaBuddha

basumina ukuti umuntu alafwa no kufyalwa imiku iingi, kabili pali iyi inshita yonse alacula pa kuti akaleke ukucita ifyabipa, ukufitontonkanyapo e lyo no kufwaya ukuficita. Mu kuya kwa nshita, umuntu alaleka ukucula nga aba sana na mano, atendeka ukucita ifisuma, kabili aleka ukutontonkanya pa fyabipa. Ici e co beta ukuti nirvana.

AbaConfucius

Icitabo beta ukuti A Dictionary of Comparative Religion cilanda ukuti, ilingi line icilenga abantu ukucula “filubo bacita abene.” Nangu ca kuti baishiba ukuti umuntu nga alecita ifisuma imikalile ilabako bwino, balanda no kuti “kwaliba ifyabipa ifingi ifyo abantu bashakwatapo amaka pa mulandu wa kuti ifibumbwa fya mupashi e filenga filecitika. Nga ca kuti umuntu alecula pa mulandu ne fintu ifyo ashakwatapo amaka, afwile fye ukusumina amacushi akwete ukwabula ukuilishanya nelyo ukumfwa ububi.”

Abakonka sana intambi

balanda ukuti abaloshi e balenga abantu ukucula. Na kabili batila abaloshi balikwata amaka ya kulenga umuntu aba na mafya nelyo ifintu fyalamwendela bwino. Basumina no kuti umuntu nga alwala balingile ukumutwala ku ng’anga pa kuti ingabuka no kumufwaila umuti.

Abena Kristu

balanda ukuti icilenga tulecula ni co abantu bakubalilapo babili abo balandapo mwi buuku lya Ukutendeka balibembwike. Na lyo line, aba mu macalici ayengi balanda ukuti kwaliba na fimbi ifilenga tulecula. Ku ca kumwenako, baKatolika bamo batila, umuntu afwile ukuipelesha ukucula pa kuti Lesa apaale icilonganino nelyo umuntu umbi.