Imfumu Iyabipa Yateka Mu Egupti

ABA baume ulemona, balepatikisha abantu ukubomba. Mona umwaume uuleuma umubomfi no bwembya! Aba ababomfi, lupwa lwa kwa Yakobo kabili betwa ati abena Israele. Abaume abalebapatikisha ukubomba, bena Egupti. Abena Israele balisangwike abasha ba bena Egupti. Cali shani pa kuti babe abasha?

Pa myaka iingi, ulupwa lwa kwa Yakobo lwalikele bwino mu Egupti. Yosefe, uwali umukankaala sana mu Egupti kabili uwali uwa cibili kuli Farao e walebasunga. Lelo Yosefe alifwile kabili Farao umbi, ushatemenwe abena Israele e watendeke ukuteka mu Egupti.

E ico uyu Farao uwali no mutima uubi atendeke ukucusha abena Israele. Asalile abaume bamo ababi imitima kabili abankalwe ukuba bakapitao ba bena Israele. Balepatikisha abena Israele ukubomba umulimo uwakosa sana uwa kukuulila Farao imisumba. Abena Israele baleya balefulilako fye. E ico, abena Egupti basukile batendeke ukutiina ukuti abena Israele bakafula sana no kukwatisha amaka.

Bushe nawishiba ico Farao acitile? Aebele banamayo abalepapisha abanakashi abena Israele ati: ‘Muleipaya umwana umwaume onse uwafyalwa.’ Lelo balya abanakashi bali no luse, tabaleipaya abana abalefyalwa.

E ico, Farao aebele abantu bakwe bonse ati: ‘Muleipaya abana abaume bonse aba bena Israele. Lelo abana abanakashi bena mwilabepaya.’ Ilyo ifunde lyalibipile sana, bushe te ifyo? Natumone ifyo umwana umwaume umo apuswike.