Mose Asalilepo Ukulapepa Yehova

Ilyo ulupwa lwa kwa Yakobo lwali mu Egupti, balelwita ukuti abena Israele. Pa numa ya mfwa ya kwa Yakobo na Yosefe, kwali Farao umbi uwatendeke ukuteka. Ilyo uyu kateka amwene ukuti abena Israele balefulilako fye kabili balekwatilako amaka ukucila abena Egupti, atendeke ukubatiina. E ico uyu Farao alengele abena Israele baba abasha. Balebapatikisha ukupanga injelwa nelyo amabrikisi e lyo no kubombesha mu mabala. Lelo abena Israele balefulilako fye nangu ca kuti balebacusha. Pa mulandu wa kuti Farao talefwaya abena Israele bafule, alandile ukuti umwina Israele nga akwata umwana umwaume balingile ukwipaya uyo mwana. Kanshi abena Israele bali no mwenso sana!

Yokebede umwanakashi umwina Israele alikwete umwana umwaume umusuma. Pa kuti beipaya uyu mwana, nyina amubikile mu museke no kuyamufisa mu matete ayali mu mbali ya Mumana wa Naelo. Miriamu nkashi ya kwa Mose alifiseme mupepi pa kuti alemona ifilecitika.

Umwana wa kwa Farao umwanakashi aile ku mumana mu kusamba e lyo amona umuseke. Mu kati ka museke mwali umwana uwalelila kabili alimumfwilile uluse. Miriamu amwipwishe ati: ‘Bushe kuti nayamufwaila umwanakashi uwingalasunga uyu mwana?’ Ilyo fye umwana wa kwa Farao asumine, Miriamu alibutwike no kuyasenda Yokebede uwali nyina wa kwa Mose. Umwana wa kwa Farao aebele Yokebede ati: ‘Kansungileko uyu mwana nkakulipila.’

Ilyo umwana akulile, Yokebede amutwele ku mwana wa kwa Farao. Mwana Farao ainike uyu mwana ukuti Mose kabili atendeke no kumukusha. Mose akuliile kwi sano kabili balemukusha kwati mwana wa mfumu. Mose balemupeela fyonse ifyo alefwaya, lelo talabile Yehova. Alishibe ukuti taali mwina Egupti lelo aali mwina Israele. E ico asalilepo ukulabombela Yehova.

Ilyo Mose ali ne myaka 40, alefwaya ukwafwa abena Israele banankwe. Ilyo amwene umwina Egupti aleuma umwina Israele umusha, Mose alyumine umwina Egupti ica kuti afwa no kufwa. Lyena Mose alimushiikile mu mucanga. Ilyo Farao aishibe ifyo Mose acitile, alefwaya ukumwipaya. Lelo Mose abutukiile ku Midiani. Yehova alemwafwa na lintu ali ku Midiani.