Baacitile Ukufwaya Kwa Kwa Yehova

Icitetekelo ca Bafyashi Calambulwa

KU BENA Israele, ukufyalwa kwa mwana mwaume kwaleleta ukusekelela kukalamba. Kwalepilibula ukuti umutande wa ntuntuko wali no kutwalilila no kuti ubupyani bwa mpanga bwali no kutwalilila ukuba mu lupwa. Lelo mupepi no mwaka wa 1593 B.C.E., ukufyala umwana umwaume napamo kwalemoneka ukuba icitiipu ukucila ukuba ipaalo ku baHebere. Mulandu nshi? Pa mulandu wa kuti Farao wa ku Egupti, pa mulandu wa kutiina ukufulisha kwa luko lwa ciYuda mu calo cintu aleteka, akambishe ukuti abana bonse abaume abalefyalwa baleipaiwa.—Ukufuma 1:12, 15-22.

Cali ni muli iyi nshita ya kwesha kwa kulofya uluko ukwa makankamike e mo Amramu na Yokebede, abaupana babili abaHebere, bafyele umwana mwaume uwayemba. Cintu cayanguka ukwelenganya fintu insansa shabo shasangwike ubulanda ku mwenso lintu baibukishe icipope ca kwa Farao. Lelo, ilyo Amramu na Yokebede balelolesha pa kanya kabo akaume, bapingwilepo mu kushangila ukuti tabaali na kukapoosa, te mulandu ne fyali no kufumamo.—Ukufuma 2:1, 2; 6:20.

Ukubomba mu Citetekelo

Pa myeshi itatu Amramu na Yokebede balefishilisha fye umwana wabo. (Ukufuma 2:2) Nangu cibe fyo, ici cali ca busanso, apantu abaHebere na bena Egupti balipalamene nga nshi. Uuli onse uwali no kusangwa aleesha ukuleuka icipope ca kwa Farao ukwabulo kutwishika aali no kwipaiwa kumo no mwana wine uyo. Cinshi, lyene, cintu aba bafyashi baipeelesha bali no kucita pa kuipususha abene no mwana wabo?

Yokebede alonganike amacinda. Amacinda yalikosa, yalipalanako ne nsengu, kabili yakwata umunkonti wa fiputulwa fitatu ubukulu mupepi ne cikumo. Ubutali kuti yafika ku mamita 6. Abena Egupti balebomfya ici cilimwa ku kupanga amapepala, impasa, insalu sha ku ngalaba, indyato, na mato yayanguka.

Yokebede abomfeshe amacinda ku kupangamo icibokoshi calinga ukwingilamo umwana wakwe. Lyene amashileko bitumene na safete ku kwikasha icipe kabili pa kuti amenshi yelaingila. Yokebede lyene abikile umwana wakwe muli ici cipe no kucifyantika mu fisonge pa mbali ya mulonga wa Naelo.—Ukufuma 2:3.

Umwana Asangwa

Umwana mwanakashi wa kwa Yokebede, Miriamu, aleiminina lwa mupepi ku kumona icali no kukonkapo. Lyene umwana mwanakashi wa kwa Farao aishile ku mulonga wa Naelo ku koowa.a Napamo Yokebede alishibe ukuti umwana wa mfumu aleya libili libili kuli ici ciputulwa ca Mulonga kabili mano mano ashile icipe apo cingasangwa bwangu. Te mulandu na fintu cali, umwana mwanakashi wa kwa Farao bwangu bwangu alimwene icipe cali mu fisonge, kabili atumine umupabi umo ku kuyacibula. Lintu amwene umwana alelila mu kati, aiketwe cililishi. Ailwike ukuti uyu aali mwana wa muHebere. Lelo, ni shani fintu engepaisha umwana wayemba ngo yu? Pa mbali ya kuba ne cikuuku ca cifyalilwa, umwana wa kwa Farao napamo asongelwe ne cisumino caseekele ku bena Egupti ica kuti pa kupokelelwa ku muulu kano wali umuntu wa cikuuku ilyo wali uwa mweo.b—Ukufuma 2:5, 6.

Miriamu, uwali akatalamukila alemona ifilecitika, aile ku mwana mwanakashi wa kwa Farao. “Bushe nje ku kumwitilo mwanakashi uuleonsha uwa mu baHebere, no kuleka esemonsesho yu mwana?” e fyo aipwishe. Umwana wa mfumu ayaswike ati: “Kabiye.” Miriamu abutukile kuli nyina. Bwangu bwangu, Yokebede aiminine pa ntanshi ya mwana mwanakashi wa kwa Farao. Umwana wa mfumu amwebele ati “Sendo yu mwana, no kuŋonseshako, na ine nkakupeele cilambu cobe.” Napamo pali iyi nshita umwana mwanakashi wa kwa Farao alishibe ukuti Yokebede aali e nyina wa ulya mwana.—Ukufuma 2:7-9.

Yokebede asungile umwana wakwe ukufikila asumwike.c Ici camupeele inshita isuma iyakulilako iya kumusambilisha pa lwa kwa Lesa wa cine, Yehova. Lyene Yokebede abweseshe umwana wakwe ku mwana mwanakashi wa kwa Farao, uwamwinike ishina Mose, ilyalola mu kuti “uwapusushiwe ukufuma mu menshi.”—Ukufuma 2:10.

Ifyo Twingasambililako

Amramu na Yokebede bashukile akashita akepi ako bakwete ku kusambilisha umwana wabo ifishinte fya kupepa kwasanguluka. Abafyashi ilelo bafwile ukucita cimo cine. Mu cine cine, cili icakatama ukuti bacite co. Satana Kaseebanya “endauka nge nkalamo iilelila, ukufwaya uuntu engalya.” (1 Petro 5:8) Kuti atemwa imisepela iiteku ukuba ifinakabupalu fyakwe—bakalume na bakashana—abakwete icilolelo ca kusanguka ababomfi ba kwa Yehova abashaiwamina. Ukuba abateku takumulenga ukuba ne cililishi kuli bene! Pali uyu mulandu, abafyashi ba mano balakansha abana babo abacili abaice ukutiina Lesa wa cine, Yehova.—Amapinda 22:6; 2 Timote 3:14, 15.

Ukubombesha kwa kwa Amramu na Yokebede ku kufisa umwana wabo mu myeshi ya kubalilapo itatu iya bumi bwakwe kwalilembwa pa AbaHebere 11:23 ukuti yali ni ncitilo ya citetekelo. Aba bonse abafyashi abaletiina Lesa balicetekele amaka ya kupususha aya kwa Yehova ukupitila mu kukaana ukulekelesha umwana wabo, kabili pali uyu mulandu balipaalilwe. Na ifwe bene tulingile ukukakatila ku mafunde ya kwa Yehova ne fishinte mu kupalamisha, abacetekelo kuti icili conse ico Yehova asuminisha ukutuponena mu kuya kwa nshita kuti catuletela ubutuntulu bubelelela ne nsansa.—Abena Roma 8:28.

[Amafutunoti]