Ba-abuka Bemba Wakashika

MONA ifilecitika pa cikope! Uusontele inkonto pali Bemba Wakashika ni Mose. Aba ali nabo, bena Israele, ninshi nabaabuka Bemba. Lelo Farao ne fita fyakwe balenwina muli Bemba. Natumone ifyo cali.

Nga fintu twasambilile, Farao aebele abena Israele ukufuma mu Egupti pa numa ya cinkunka calenga 10. Abena Israele 600,000 abaume, e lyo na banakashi abengi na bana balifumine mu Egupti. Kwali na bantu bambi abengi abacetekele Yehova abaile na bena Israele. Bonse basendele impaanga shabo ne ng’ombe e lyo ne mbushi.

Ilyo abena Israele bashilafuma mu Egupti, balombele abena Egupti ifya kufwala, ne fipe fya golde ne fya silfere. Abena Egupti bali no mwenso icine cine pa mulandu wa cinkunka ca kulekelesha icabacitikile. E ico bapeele abena Israele fyonse ifyo balefwaya.

Pa numa ya nshiku ishinono, abena Israele bafikile pali Bemba Wakashika no kutendeka ukutuusha. Pali iyi nshita, Farao na bantu bakwe batendeke ukumfwa ububi pa kuleka abena Israele ukuya. Batile: ‘Abasha besu baya!’

E ico Farao na kabili alyalwike. Apo pene fye, aebele ifita fyakwe ukupekanya amaceleta bwangu bwangu. Basendele amaceleta 600 ayo bacetekelemo e lyo na maceleta yambi yonse aya bena Egupti no kukonka abena Israele.

Ilyo abena Israele bamwene Farao ne fita fyakwe baleisa, balyumfwile umwenso, tabakwete ukwa kubutukila. Uko baleya kwali Bemba Wakashika, e lyo uko balefuma kwali abena Egupti. E ico Yehova abikile ikumbi pa kati ka bantu bakwe na bena Egupti. Kanshi abena Egupti balifililwe ukusansa abena Israele pantu tabalebamona.

Yehova nomba aebele Mose ukuti atambalike inkonto yakwe pali Bemba Wakashika. Ilyo Mose acitile ico, Yehova aletele icimwela icikalamba ica ku kabanga. Ici icimwela calengele ameshi pali bemba ukwakanikana.

Lyena abena Israele bayabwike bemba pa mushili uwauma. Palipitile inshita iikalamba pa kuti abantu bonse kumo ne finama fyabo baabuke bemba. Ilyo abena Israele ba-abwike umumana, e lyo abena Egupti batendeke ukubamona na kabili. E ico bwangu bwangu baingile muli bemba pa kuti bayebwesha abasha babo!

Ilyo baingile pali bemba, Lesa atendeke ukusokola imipeto ku maceleta yabo. Abena Egupti balyumfwile umwenso ica kuti batendeke ukupunda ati: ‘Natufulumuke ku bena Israele, pantu Yehova alebalwilako!’ Lelo balicelelwe.

Yehova aebele Mose ukutambalika inkonto yakwe pali Bemba Wakashika, nga fintu umwene pa cikope. Kabili ilyo Mose acitile ico, amenshi yatendeke ukubwela na bena Egupti na maceleta yabo balibiile mu menshi. Abashilika ba bena Egupti bonse balikonkele abena Israele pali bemba. E ico tapaali nangu umo uwapuswike, bonse balifwile!

Ala abantu ba kwa Lesa balitemenwe pa fyo Lesa abapuswishe! Abaume baimbile ulwimbo lwa kutasha Yehova abati: ‘Yehova nacimfya. Apoosa bakabalwe na bacininapo muli bemba.’ Nkashi ya kwa Mose, Miriamu abuulile akaoma, na banakashi bonse babuulile utuoma twabo no kumukonka. Batendeke ukucinda no kwimbako ulwimbo abaume baleimba abati: ‘Yehova nacimfya. Apoosa bakabalwe na bacininapo muli bemba.’