Ifya Kulya Ifyaibela

BUSHE utu utwabuuta uto abantu baletoola pa nshi nautwishiba? Pa mushili palemoneka kwati pacilokela imfula ya mabwe, lelo utu utwabuuta te tumabwe twa mfula, fya kulya.

Pa numa ya mweshi umo ukutula apo abena Israele bafumine mu Egupti, baingile mu matololo. Mu matololo tamwalemena ifya kulya, ne ci calengele abantu batendeke ukuilishanya ati: ‘Kanshi Yehova nga atwipaile fye mu Egupti. Pantu mwena twalelya ifya kulya fyonse ifyo twalefwaya.’

E ico Yehova atile: ‘Ndemuponesha ifya kulya ukufuma mu muulu.’ Yehova alicitile ico asosele. Ubushiku bwakonkelepo ulucelo, ilyo abena Israele bamwene utupaapaatu utwabuuta, batendeke ukwipushanya abati: ‘Tunshi utu?’

Mose atile: “Fya kulya ifyo Yehova amupeele ukuti mulye.” Abantu batendeke ukwita ifi ifya kulya ati MANA. Fyaleumfwika kwati mukate wapaapaatala uwa buci.

Mose aebele abantu ati: ‘Muletoola cila muntu ukulingana ne fyo engalya.’ Ifi fine e fyo balecita lyonse ulucelo. Lyena akasuba nga kabala sana, mana iyaleshala pa mushili yalesungulika.

Mose asosele no kuti: ‘Tapali uufwile ukushako mana ya kulya ubushiku bwakonkapo.’ Lelo abantu bamo tabaumfwilile. Bushe nawishiba icalecitika? Nga kwashala mana, ulucelo balesanga ilenunka ninshi muli ne mitiiti!

Lelo kwali ubushiku bumo mu mulungu, ubushiku bwalenga 6, ubo Yehova abebele ukulatoola mana iingi pa kuti balesheko iya kulya pa bushiku bwalenga 7. Yehova alibasuminishe ukushako mana ya kulya ubushiku bwakonkapo, pantu pa bushiku bwalenga 7 taleponya mana ili yonse. Nga bashako mana ya kulya pa bushiku bwalenga 7, tamwaleba imitiiti kabili no kununka tayalenunka! Ici cali cipesha mano na cimbi!

Pa myaka yonse iyo abena Israele baikele mu matololo, balelya mana iyo Yehova alebapeela.