Impunda Yalanda

BUSHE walyumfwapo impunda ilelanda? Umuntu onse kuti alanda ati, ‘awe nshaumfwapo pantu ifinama tafilanda.’ Lelo Baibolo itweba ukuti kwali impunda iyalandile. Leka tumone ifyo cali.

Abena Israele bali mupepi no kuya ku Kanaani. Balaki, imfumu ya bena Moabu yaletiina abena Israele. E ico atumine Balaamu, uwali uwacenjela ku kuyatiipa abena Israele. Balaki alilaile ukupeela Balaamu indalama ishingi. E calengele Balaamu anine pa mpunda yakwe no kuya mu kumona Balaki.

Yehova talefwaya ukuti Balaamu atiipe abantu bakwe. E ico atumine malaika uwakwete ulupanga ku kucilikila Balaamu pa musebo. Balaamu talemona malaika lelo impunda yena yalemumona. Impunda yalekele ukwenda e lyo yalaala fye pa nshi pantu yale-esha ukutaluka kuli malaika. Balaamu alifulilwe sana kabili atampile ukuuma impunda ne nkonto.

Lyena Yehova alengele Balaamu ukumfwa impunda yalanda. Yamwipwishe ati: ‘Kanshi cinshi nacita icalenga ukuti ungume umusango uyu?’

Balaamu atile: ‘Nauncusha, nga nacikwata ulupanga nga ninkwipaya kale!’

Impunda yamwipwishe ati: ‘Bushe nalicitapo ifi?’

Balaamu ayaswike ati: ‘Awe.’

Lyena Yehova alengele Balaamu amona malaika uwaiminine pa nshila no lupanga. Malaika atile: ‘Cinshi waumina impunda yobe? Njishile mu kukucilikila pa kuti wiya mu kutiipa abena Israele. Impunda yobe nga tayacifuma apo naciba, nga nacikuma no kukwipaya, lelo impunda yobe yena nga nshaci-ipaya.’

Balaamu atile: ‘Nimembuka. Nshacishiba ukuti waciba mu musebo.’ Malaika alekele Balaamu aya, na Balaamu alikonkenyepo ukuya mu kumona Balaki. Na lyo line, Balaamu alyeseshe ukutiipa abena Israele, lelo Yehova amulengele ukupaala abena Israele imiku itatu.