Impunda ya kwa Balaamu Yalanda

Abena Israele bali mu matololo pa myaka mupepi na 40. Balicimfishe abantu abengi abaleikala mu misumba iyakosa. Nomba ilyo bali mu ciswebebe ca Moabu ku kabanga ka Mumana wa Yordani, bali mupepi no kwingila mu Calo ca Bulayo. Balaki, imfumu ya bena Moabu alitiinine pantu alemona ukuti abena Israele balamupoka icalo. E ico aitile umwaume uo baleita ati Balaamu ukuti aye ku Moabu no kuyatiipa abena Israele.

Nomba Yehova aebele Balaamu ati: ‘Witiipa abena Israele.’ E ico Balaamu alikeene ukuyako. Imfumu Balaki yalimwitile na kabili ukuti aye ku Moabu kabili yamwebele ukuti ikamupeela conse ico alefwaya. Na lyo line Balaamu alikeene. Lyena Lesa amwebele ati: ‘Kabiye, lelo ifyo nkakweba e fyo ukalande.’

Balaamu alininine pa mpunda yakwe aya na ku Moabu. Nangu ca kuti Yehova alimukeenye ukuyatiipa abena Israele, Balaamu alefwaya ukuyabatiipa. Ilyo aleya, pa miku itatu malaika wa kwa Yehova aliminine mu nshila. Balaamu talemona uyu malaika lelo impunda yakwe yena yalemumona. Pa kubala ilyo impunda yamwene malaika yalifumine mu nshila yaya mu mpanga. Lyena impunda yailetininkisha ulukasa lwa kwa Balaamu ku cibumba ca mabwe. Impunda yasukile yaikala panshi pa kati ka musebo. Ilyo ifi fyalecitika Balaamu aleuma impunda ku nkonto.

Pa numa ya kuuma impunda imiku itatu, Yehova alengele impunda yalanda. Impunda yaipwishe Balaamu ati: ‘Cinshi mulengumina?’ Balaamu aebele impunda ati: ‘Ulenenga ukumoneka kwati nshakwata amano. Nga nacikwata ulupanga nga ninkwipaya.’ Impunda yamwebele ati: ‘Kale natendeka ukumwensha. Bushe nalitala ncitapo ifi?’

Lyena Yehova alengele Balaamu amona malaika. Malaika aebele Balaamu ati: ‘Yehova alikwebele ukuti wikatiipa abena Israele.’ Balaamu ayaswike ati: ‘Nindufyanya. Nalabwelelamo ku ng’anda.’ Lelo malaika amwebele ati: ‘Wibwelelamo, kabiye ku Moabu, lelo ukalande fye ifyo Yehova akakweba ukulanda.’

Bushe Balaamu alisambilileko ku fyamucitikile? Awe. Ilyo afikile ku Moabu, Balaamu alyeseshe ukutiipa abena Israele pa miku itatu, lelo Yehova alemulenga ukupaala abena Israele. Mu kupita kwa nshita, abena Israele balile mu kulwa na bena Moabu kabili Balaamu balimwipeye. Nga ca kuti Balaamu alicitile ifyo Yehova amwebele, nga tafwile!