Lesa Alaya Ukuleta Paradaise

ICI, cikope ca paradaise ico nalimo Lesa alangile kasesema wakwe Esaya. Esaya aliko pa numa ya mfwa ya kwa Yona.

Ishiwi lya kuti paradaise lipilibula ‘icifulo icisuma’ nelyo ‘parka’. Bushe uleibukisha ukumonapo icikope ca paradaise muli cino citabo? Paradaise imoneka nga filya icifulo icisuma ico Yehova Lesa apangiile Adamu na Efa ukulaikalamo calemoneka? Bushe icalo conse cikaba paradaise na kabili?

Yehova aebele kasesema Esaya ukulemba pali paradaise iili no kwisa, umukekala abantu ba kwa Lesa. Atile: ‘Imimbulu ne mpaanga fikekala pamo mu mutende. Utwana twa ng’ombe no twana twa nkalamo tukalaliila pamo, kabili abana abanono e bakalaficema. Insoka tashakulasuma abana abanono nga baleangala nasho.’

Abengi kuti batila, ‘Ifi teti ficitike pantu pa calo paliba amafya ukufuma fye na kale kabili aya mafya tayakapwe.’ Lelo tontonkanya pali ici: Bushe icifulo Lesa apangiile Adamu na Efa ukuti baleikalamo cali shani?

Lesa abikile Adamu na Efa mu paradaise. Lelo alibafumishemo kabili balikotele no kufwa pantu balikeene ukumumfwila. Lesa alilaya abantu abamutemwa ukuti akabapeela ifintu fyonse ifyo Adamu na Efa bakwete ilyo bashilabembuka.

Mu paradaise tamwakabe ifikalacusha abantu nelyo ukonaula ifintu pa calo. Mukaba umutende uwa cine cine. Abantu bonse tabakalelwala kabili bakaba aba nsansa. Icalo cikaba fye filya fine Lesa alefwaya ukuti cibe pa kubala. Lelo tuli no kusambilila ifyo Lesa akacita pa kuti icalo cikawame.