Lesa Aafwa Imfumu Hisekia

BUSHE nawishiba ico uyu umwaume alepepela kuli Yehova? Cinshi abikiile aya amakalata pa ntanshi ya cipailo ca kwa Yehova? Uyu umwaume ni Hisekia. Ali ni mfumu ya mikowa ibili iya bena Israele iyali ku kapinda ka ku kulyo. Kabili ali no bwafya ubukalamba. Cinshi calengele?

Pali iyi inshita ninshi abashilika ba bena Asiria balyonaula kale imikowa 10 iya ku kapinda ka ku kuso. Yehova alisuminishe ukuti iyi mikowa yonaulwe pantu balya bantu bali ababi. Kabili pali iyi inshita ninshi abashilika ba bena Asiria nabaya mu kulwisha ubufumu bwa mikowa ibili.

Imfumu ya bena Asiria ninshi e lyo yatumine fye amakalata ku Mfumu Hisekia. Amakalata e aya Hisekia abikile pa ntanshi ya cipailo ca kwa Lesa. Muli aya makalata, Imfumu yaleseka Yehova kabili yale-eba Hisekia ukuleka ukubombela Lesa. E ico Hisekia apepeele ati: ‘Mwe Yehova, tupususheni ku mfumu ya bena Asiria. Lyena abantu bonse bakeshiba ukuti ni mwe Lesa wa cine mweka fye.’ Bushe Yehova alyumfwile ifyo Hisekia apepele?

Hisekia ali imfumu iisuma. Taali nge mfumu ishalecita ifyabipa ishaleteka imikowa 10 iya bena Israele, nelyo imfumu Ahasi, wishi uwalecita ifyabipa. Hisekia alekonka amafunde ya kwa Yehova yonse. E ico ilyo Hisekia apwishishe ukupepa, kasesema Esaya amwebele ifyo Yehova alandile ati: ‘Imfumu ya bena Asiria tayakese ku Yerusalemu. Takuli umushilika nangu umo uukapalama ku Yerusalemu. Tabakalase umufwi nangu umo muli uyu umusumba.’

Lolesha pali ici icikope. Bushe naubeshiba aba abashilika abafwile? Bena Asiria. Yehova alitumine malaika wakwe, kabili ubushiku aipeye abashilika 185,000 aba bena Asiria. E ico imfumu ya bena Asiria yalibwelelemo ku ng’anda.

Ubufumu umwali imikowa ibili bwalipuswike, na bantu baikele mu mutende. Lelo ilyo Hisekia afwile, umwana wakwe Manase e watendeke ukuteka. Manase no mwana wakwe Amone uwamupyene pa bufumu, bonse bali imfumu ishibi sana. E ico abantu batendeke ukucita ifyabipa no kwipayana na kabili. Ilyo Imfumu Amone baipeye ku babomfi ba iko, Yoshia, umwana wa kwa Amone e watendekeke ukuteka imikowa ibili.