Palameni Kuli Lesa
Alitupeela Amaka ya Kuisalila
ABAFYASHI balingile ukuba ne mibele isuma iyo abana babo bengapashanya. Imibele yabo iisuma kuti yalenga abana nabo ukuba ne mibele isuma kabili kuti yabafwa ukulapingula bwino pa fintu. Ica bulanda ca kuti abafyashi abengi tababa ne mibele isuma iyo abana babo bengapashanya. Bushe ici calola mu kuti abana ba musango yu te kuti bakwate imibele isuma? Icasuko ca kuti, Yehova Lesa alitupeela amaka ya kuisalila kabili ici cilatusansamusha. Moneni ifyo cali ku Hisekia, nga fintu calembwa pali 2 Ishamfumu 18:1-7.
Hisekia ali ni “mwana Ahasi imfumu ya Yuda.” (Icikomo 1) Ahasi alifumishe abantu bakwe ku kupepa kwasanguluka ukwa kwa Yehova. Iyi mfumu yabipa yalepepa Baali, no kutuula amalambo ya bantu. Kabili alengele no kuti bamunyina nelyo munyina wa kwa Hisekia epaiwe no kutuulwa ilambo. Ahasi aisele ifiibi fya kwi tempele no “kuipangila ifiipailo pa makoona yonse aya mu Yerusalemu.” “Alikalifye Yehova.” (2 Imilandu 28:3, 24, 25) Ukwabula no kutwishika, wishi wa kwa Hisekia ali mubi icine cine. Bushe Hisekia na o ali no kuba umubi nga wishi?
Ilyo Hisekia apyene wishi Ahasi pa bufumu, bwangu bwangu alilangile ukuti tali no kupashanya imibele yabipa iya kwa wishi. Hisekia “alecita ifisuma mu menso ya kwa Yehova.” (Icikomo 3) Hisekia atetekele Yehova, kabili “takwali uwalingene nankwe pa shamfumu shonse isha mu Yuda.” (Icikomo 5) Mu mwaka wa kubalilapo uwa kuteka kwakwe, iyi mfumu yacaice yatendeke ukusangulula ukupepa kwa cine kabili yaonawile ififulo fya kupepelapo balesa ba bufi. Yaliswile ifiibi fye tempele kabili ukupepa kwa cine kwalitendeke na kabili. (Icikomo 4; 2 Imilandu 29:1-3, 27-31) Hisekia “alambatile pe kuli Yehova . . . , kabili Yehova ali nankwe.”—Ifikomo 6, 7.
Cinshi calengele ukuti Hisekia epashanya imibele yabipa iya kwa wishi? Bushe nyina Abiya, uo bashalandapo sana mu Baibolo, e walengele ukuti uyu mwana abe umuntu umusuma? Bushe ica kumwenako ca kwa Esaya, uwatendeke umulimo wa kusesema ninshi na Hisekia talafyalwa e calengele ukuti iyi mfumu yacaice ibe iisuma?a Baibolo tayatweba. Te mulandu ne calengele, Hisekia asalilepo ukuba ne mibele iyapusaninine fye ne ya kwa wishi.
Ifyo Hisekia acitile kuti fyakoselesha bonse abashakushiwe bwino pa mulandu wa kuti abafyashi babo tabali ne mibele isuma. Te kuti twalule nelyo ukulaba ku fintu ifyabipa ifyo twapitilemo kale. Lelo ifya musango uyu tafipilibula ukuti tapali icili conse ico twingacitapo. Ifyo tusalapo ukucita ino nshita kuti fyalenga twaisakwata insansa ku ntanshi. Nga filya fyacitile Hisekia, na ifwe kuti twasalapo ukutemwa no kulapepa Lesa wa cine, Yehova. Nga twasalapo ukucite fi, tukaba ne nsansa pali ino nshita kabili tukesakwata umweo wa muyayaya mu calo cipya ica kwa Lesa. (2 Petro 3:13; Ukusokolola 21:3, 4) Ala mwandini tufwile ukutasha Lesa wakwata ukutemwa, uwatupeela ubupe ubwawamisha, e kutila amaka ya kuisalila!
[Futunoti]
a Esaya atendeke ukusesema nalimo mu 778 B.C.E. ukwisafika mu 732 B.C.E. no kucilapo panono. Hisekia atendeke ukuteka mu 745 B.C.E., ilyo ali ne myaka 25.