Abo Wingapashanya—Hisekia

Pali iyi nshita kuli icintu icikalamba icacitikila Hisekia. Ali fye ne myaka 25 ilyo bamusala ukuba imfumu mu Yuda. Ali no kuba imfumu ya musango nshi? Bushe akalacita ifyabipa ifyo wishi Ahasi uwali imfumu alecita? Ahasi aali ni cipondoka mpaka fye ne mfwa yakwe. Aletungilila ukupepa kwa bufi kabili alyocele umwana wakwe umwaume umo pa cipailo ca balesa wa bufi. (2 Imilandu 28:1-4) Lelo, Hisekia talekele ukupepa Yehova pa mulandu wa fyo wishi acitile kabili tatontonkenyepo na pa kulacita ifyabipa ifyo wishi alecita. Hisekia ena “alambatile pe kuli Yehova.”—2 Ishamfumu 18:6.

Bushe bawiso nelyo banoko balakutumfya pa mulandu wa kuti ulapepa Yehova? Bushe balakucusha nelyo bushe balitekwa ubusha ku misango yabipa? Nga e fyo baba, wilabakonkelela! Hisekia talekele ifyabipa ifyalecitika mu lupwa lwakwe ukonaula imibele yakwe. Na kuba aishileba imfumu iisuma sana ica kuti “pa numa yakwe takwali nangu umo uwalingene nankwe pa shamfumu shonse isha mu Yuda.” (2 Ishamfumu 18:5) Na iwe kuti waba ne mibele isuma nga Hisekia nangu ca kutila abafyashi bobe baba ne mibele yabipa. Cinshi cingakwafwa? ‘Ulelambatila pe kuli Yehova.’