Isambililo 14

Ifyo Inte sha kwa Yehova Shateyanishiwa

Ni lilali lintu Inte sha kwa Yehova isha muno nshiku shatendeke? (1)

Ni shani fintu ukulongana kwa Nte sha kwa Yehova kutungululwa? (2)

Ni shani fintu ifipooswa fisakamanwa? (3)

Ni bani batungulula mu cilonganino cimo na cimo? (4)

Kulongana nshi ukukalambako ukucitwa cila mwaka? (5)

Mulimo nshi ucitwa pa maofesi yabo ayakalamba na mu maofesi yanono? (6)

1. Inte sha kwa Yehova isha muno nshiku shatendeke muli ba 1870. Pa kubalilapo, baleitwa Abasambi ba Baibolo. Lelo mu 1931 baisalile ishina lya mu Malembo ilya Inte sha kwa Yehova. (Esaya 43:10) Ukufuma pa kutendeka ukunono ukuteyanya kwalikula ukufika ku mamilioni ya Nte, abali abapamfiwa ukushimikila mu fyalo ukucila 230.

2. Ifilonganino ifingi ifya Nte sha kwa Yehova filalongana imiku itatu mu mulungu umo. Ulelaalikwa ukusangwa ku kulongana ukuli konse pali uku. (AbaHebere 10:24, 25) Baibolo e mufuma ifisambilishiwa. Ukulongana kwiswilwa no kwisalilwa ne pepo. “Inyimbo sha bumupashi” isha kufuma ku mutima shilembwa pa kulongana ukwingi. (Abena Efese 5:18, 19) Tabalipilisha pa kwingila, kabili tabapitamo balepoka indalama.—Mateo 10:8.

3. Ifilonganino ifingi filonganina mu Ŋanda ya Bufumu. Aya mayanda ilingi line yaba fikuulwa fishapikana ifikuulwa ne Nte ishiitemenwa. Tawakasangemo ifipasho ifili fyonse, imisalaba, nelyo ifyapale fi mu Ŋanda ya Bufumu. Indalama balipila ifya kulipilalipila shifuma ku misangulo ya kuitemenwa. Ku balefwaya ukusangwilako, kulabako akabokoshi ka misangulo.—2 Abena Korinti 9:7.

4. Mu cilonganino cimo na cimo, mwalibamo baeluda, nelyo bacilolo. E batungulula mu kusambilisha mu cilonganino. (1 Timote 3:1-7; 5:17) Bafwilishiwa na babomfi batumikila. (1 Timote 3:8-10, 12, 13, NW) Aba baume tabasumbulwa pa muulu wa bambi mu cilonganino. (2 Abena Korinti 1:24) Tabapeelwa amalumbo yaibela. (Mateo 23:8-10) Tabafwala mu kupusanako na bambi. Kabili tabalipilwa pa mulimo wabo. Baeluda mu kuitemenwa balasakamana ukukabila kwa ku mupashi ukwa cilonganino. Kuti bapayanya icisansamushi no butungulushi mu nshita sha mafya.—Yakobo 5:14-16; 1 Petro 5:2, 3.

5. Inte sha kwa Yehova na kabili balakwata ukulongana kukalamba nelyo amabungano cila mwaka. Pali utu tushita ifilonganino ifingi filesa capamo kuli programu waibela uwa masambililo ya Baibolo. Ulubatisho lwa basambi bapya lubali lwa lyonse ulwa kulongana kukalamba kumo na kumo nelyo programu we bungano.—Mateo 3:13-17; 28:19, 20.

6. Amaofesi yakalamba mu calo conse aya Nte sha kwa Yehova yabela mu New York. Kulya e kwaba Ibumba Litungulula, ibumba lya baeluda babelesha abangalila icilonganino ca mu kusaalala kwa calo. Na kabili kwalibako amaofesi yanono ukucila pali 100 ukushinguluke calo. Muli ifi fifulo, aba kuitemenwa balaafwa ukupulinta no kutuma impapulo sha Baibolo. Na kabili ubutungulushi bulapeelwa ku kuteyanya umulimo wa kushimikila. Mulandu nshi te kupekanishisha ukutandalila iofesi linono ilyapalamina na kuntu wikala?