Ukuteyanya Kwabo Ukwa mwi Sonde Lyonse no Mulimo Wabo

KWALIBAKO inshila ishingi ishibomfiwa pa kutungulula umulimo wa kushimikila mu fyalo ukucila na pali 230 umo uyu mulimo ubombwa. Ubutungulushi bonse bufuma kwi Bumba Litungulula ilikala pa maofeshi yakalamba aya Watch Tower mu Brooklyn, ku New York. Ibumba Litungulula lilatuma abeminishi ba liko cila mwaka mu fyalo fyapusanapusana pano isonde ponse ku kwafwilisha abeminishi ba maofeshi yanono aya Watch Tower aya muli fyo fine fyalo. Mu maofeshi yanono aya Watch Tower, mwaba baKomiti ba Misambo umuba abantu batatu nelyo fye 7 abangalila umulimo wa mu fyalo balaashikwa ukwangalila. Amaofeshi yanono yamo aya Watch Tower yalikwata bamashini ba kupulintilako, yambi nayo yakwata fimashini fya maka sana ifyangufyanya ukupulinta. Icalo nelyo incende ibombelwa ne ofeshi linono ilya Watch Tower fyaakanishiwa mu fitungu, kabili ifitungu na fyo fyaakanishiwa mu miputule. Mu muputule umo umo muba ifilonganino mupepi na 20. Kangalila wa citungu atandalila imiputule mu citungu cakwe. Kulaba ukulongana kukalamba kubili mu muputule umo umo cila mwaka. Kwaliba na kangalila wa muputule, ena atandalila icilonganino cimo cimo mu muputule wakwe ilingi line imiku ibili cila mwaka, ukwafwilisha Inte ifya kuteyanya no kubomba umulimo wa kushimikila mu cifulo ca kubombelamo icapeelwa kuli co cilonganino.

Icilonganino ca ku ncende imo na imo ne Ng’anda ya ciko iya Bufumu e cifulo apo imbila nsuma itendekela ukwananishiwa mu ncende mwikala. Incende umwabela icilonganino cimo cimo ilakanishiwa mu fifulo finono finono ifya kubombelamo. Ifi filapeelwa kuli Nte umo umo uutukusha ukutandalila no kulanda na bantu ba pali cila ng’anda iyaba mu cifulo cakwe ica kubombelamo. Mu cilonganino cimo cimo mwaba fye ba Nte abalinga lelo nga bafula sana bafika fye kuli na 200, kabili baeluda babamo babomba imilimo yalekanalekana. Cila kasabankanya wa mbila nsuma alicindama mu kuteyanya kwa Nte sha kwa Yehova. Nte onse fye, nampo nga abombela pa maofeshi yakalamba aya Watch Tower, nelyo pa maofeshi yanono, nangu ni mu cilonganino, alabombako uyu mulimo wa mwi bala ukweba abantu pa lwa Bufumu bwa kwa Lesa.

Amalipoti ya iyi mibombele kuli pele pele yafika ku maofeshi yakalamba aya Watch Tower, kabili icitabo ca pa mwaka ica Yearbook cilapangwa no kusabankanishiwa. Ukulundapo, charti alasabankanishiwa cila mwaka mu Ulupungu lwa kwa Kalinda ulwa January 1. Ishi mpapulo shibili shilapayanya amalipoti yakumanina aya fibombwa cila mwaka mu kushimiko bunte kuli Yehova no Bufumu bwakwe ubutekwa na Kristu Yesu. Mu myaka ya ndakai Inte na bantu balefwaya ukusambilila icine bonse pamo abali mupepi na mamilioni 14 balisangwako ku Cibukisho ca mfwa ya kwa Yesu cila mwaka. Inte sha kwa Yehova bapoosa amaawala ukucila pali bilioni umo mu mwaka ukubilisha imbila nsuma, kabili abapya ukucila pali 300,000 balebatishiwa. Ifitabo fishalikwa mintapendwa ne mintapendwa.