Sambilileni Icebo ca kwa Lesa

Mulandu Nshi Lesa Akwatila Ibumba lya Bantu abo Atungulula?

Ici cipande cilelanda pa mepusho ayo nalimo mutontonkanyapo kabili cilemulanga na po mwingasanga amasuko muli Baibolo yenu. Inte sha kwa Yehova kuti shatemwa nga nshi ukulanshanya na imwe aya masuko.

1. Mulandu nshi Lesa asalile abena Israele?

Lesa aliteyenye abafyelwe muli Abrahamu ukuba uluko kabili alibapeele na mafunde. Abapeele ishina lya kuti abena Israele kabili abapeele umulimo wa kucingilila ukupepa kwa cine ne Cebo cakwe, e kutila Amalembo ya Mushilo. (Amalumbo 147:19, 20) Ici calenga abantu aba mu nko shonse ukupaalwa.—Belengeni Ukutendeka 22:18.

Lesa asalile abena Israele ukuba inte shakwe kabili alebapaala nga baumfwila amafunde yakwe. (Amalango 4:6) Nga twasambilila ilyashi lya bena Israele, kuti twaishiba bwino Lesa wa cine.—Belengeni Esaya 43:10, 12.

2. Mulandu nshi Abena Kristu ba cine babombela pamo?

Mu kuya kwa nshita, abena Israele balilekele ukumfwila Lesa kabili Yehova nomba abikileko icilonganino ca Bena Kristu icabapyene. (Mateo 21:43; 23:37, 38) Abena Israele bali ni nte sha kwa Lesa lelo muno nshiku Abena Kristu ba cine bena ni nte sha kwa Yehova.—Belengeni Imilimo 15:14, 17.

Yesu asambilishe abasambi bakwe ukulabombela pamo mu kushimikila pali Yehova no kulapanga abasambi mu nko shonse. (Mateo 10:7, 11; 24:14; 28:19, 20) Ino nshita e lyo ukushimikila pali Yehova kufikile pa kalume. Yehova alelenga abantu abengi nga nshi abafuma mu nko shonse ukulamupepa mu kwikatana. (Ukusokolola 7:9, 10) Na kabili, Abena Kristu ba cine balabombela pamo nge bumba pa kuti balekoseleshanya no kwafwana. Konse fye ukwaba Abena Kristu ba cine, nga balongana basambilila ifyebo fya mu Baibolo fimo fine.—Belengeni AbaHebere 10:24, 25.

3. Bushe ba Nte ba muno nshiku batendeke shani?

Icilonganino ca Nte sha kwa Yehova ica muno nshiku catendeke muli ba 1870. Abasambi ba Baibolo abali fye impendwa iinono batendeke ukufwailisha icine ca mu Baibolo pa kuti basange icine ico aba kale baishibe. Baishileishiba ukuti umulandu Yesu ateyanishishe icilonganino ca Bena Kristu ni pa kuti baleshimikila. E ico batendeke ukulashimikila pa Bufumu mu calo conse. Mu 1931, baishilebula ishina lya kuti Inte sha kwa Yehova.—Belengeni Imilimo 1:8; 2:1, 4; 5:42.

4. Bushe icilonganino ca Nte sha kwa Yehova muno nshiku citungululwa shani?

Mu nshiku sha batumwa, ifilonganino fya Bena Kristu mu ncende ishingi fyaletungululwa ne bumba litungulula ilyapangilwe na batumwa na bakalamba abaishibe ukuti Yesu e Mutwe wa cilonganino. (Imilimo 16:4, 5) Na muno nshiku mwine, Inte sha kwa Yehova balishiba ukuti Yesu Kristu e Ntungulushi yabo. (Mateo 23:9, 10) Na kabili batungululwa ne Bumba Litungulula ilyapangwa na baeluda abaishiba ifingi ifya mu Baibolo abakoselesha no kutungulula ifilonganino ukucila pali 100,000. Mu cilonganino cimo na cimo, mwaliba abaume abafikapo ababomba nga baeluda nelyo bakangalila. Aba baume balasakamana bwino umukuni wa kwa Lesa.—Belengeni 1 Petro 5:2, 3.

Inte sha kwa Yehova balabombela pamo mu kushimikila imbila nsuma no kupanga abasambi. Pa kuti bashimikile ku bantu bonse, balapilibula, ukupulinta, no kusabankanya impapulo ishilanda pali Baibolo mu ndimi ukucila pali 500. Nga filya fine fyalecita abatumwa, nabo bashimikila ku ng’anda ne ng’anda. (Imilimo 20:20) Balaitemenwa ukusambilisha abantu abafwaisha ukwishiba icine ca mu Baibolo. Apo Inte sha kwa Yehova baabika sana amano ku kucita ifyo Lesa afwaya na ku kwafwa abantu, baliba ne nsansa.—Belengeni Amalumbo 33:12; Imilimo 20:35.

Nga mulefwaya ukwishibilapo na fimbi, belengeni icipandwa 19 muli ici citabo Bushe Cinshi Baibolo Isambilisha? icalembwa ne Nte sha kwa Yehova.