Ukulembeshanya Bakalata

BAKALATA balilenga imikalile ne mibele ya bantu abengi nga nshi ukuwamako. Amabuuku ayengi aya mu Malembo ya Bwina Kristu aya ciGriki yali ni bakalata. Ifwe lelo kuti twalemba bakalata ku kukosha abasumina bapya, ukulembeshanya na banensu, ukukoselesha bamunyinefwe na bankashi abatendeka imilimo ipya, ukukosha abalecululuka, no kwebako bambi ifyebo fikabilwa pa kusakamana imilimo ya mu cilonganino.—1 Tes. 1:1-7; 5:27; 2 Pet. 3:1, 2.

Ukulemba bakalata na kabili ni nshila isuma iya kushimikililamo iibomba bwino. Mu ncende shimo, napamo mwaba imishi imo ne fifulo fimo umo bashingila icingileingile kabili umo tushingabombela. Bamo ilingi tabasangwa pa mayanda, e co tatubasanga ilyo tuleshimikila ku ng’anda ne ng’anda. Bambi bekala mu ncende shataluka ku shibiye.

Inshita shimo ukulwala, imiceele yabipa, nelyo icibindo ca nshita kuti fyalenga muleikala fye pa ng’anda. Bushe kuti mwalemba kalata ku kushimikilako lupwa lwenu nelyo umuntu mwashimikileko ubunte bwa mu lyashi? Bushe umusambi wenu uwa Baibolo umo alikuuka? Ukumulembelako kalata kuti kwamwafwa sana pa kuti atwalilile ukusambilila ifya ku mupashi. Napamo kuti mwalembela abopene nomba line ifyebo fya mu Malembo ifisuma, nelyo ukulembela ababeleke umwana, atemwa abafwililwe.

Ukushimikila Muli Kalata

Nga mulelemba kalata ku kushimikila ku muntu mushatala amumonanapo, intanshi ilondololeni. Kuti mwalondolola amuti mulebomba umulimo wa kuitemenwa uubombwako mu fyalo ifingi. Nga cingakabilwa, kuti mwalumbula no kuti muli Nte ya kwa Yehova. Ebeni uyo muntu ico mulelembela ukucila ukumutandalila. Lembeni kwati mulelanda nankwe pa kanwa nkati. Nalyo line, mu kumfwana no kufunda kutila “mube abacenjela nge nsoka, kabili abafuuke nge nkunda,” tontonkanyeni bwino sana pa bwingi bwa fyebo fya pa lwenu muli no kusokolola.—Mat. 10:16.

Mulembemo ifyebo ifyo mwali no kusosa amumutandalila pa mwakwe. Kuti mwakopako imitendekele ukufuma mu citabo ca Ukupelulula nelyo kuti mwabomfya imilandile ishintilile pe Lembo ukufuma mu Ubutumikishi Bwesu Ubwa Bufumu ubwa nomba line. Kuti mwaipusha icipusho no kukoselesha uyo muntu ukutontonkanyapo. Bakasabankanya bamo balondolola fye abati tulasuka abantu amepusho ya mu Baibolo ukwabula ukubalipilisha, lyene balanda pa mitwe ya fipandwa fimo ukufuma muli lumo ulwa mpapulo tusambilishamo. Pe bula 73 pali kalata wa kulangilila uulembeelwe ku kushimikila ubunte. Kuti mwamonapo ifyo mwingalemba, lelo cisuma ukulekanyalekanya ifya kulandapo. Nana nga te ifyo, abantu mu kupita kwa nshita kuti balepokelela kalata umo wine fye pe.

Bamo balomfwa ubunang’ani ukubelenga kalata umutali ufumine ku muntu bashaishiba. E co kuti caba bwino ukwipifya kalata wenu. Sondweleleni kalata ilyo ashilalepesha pantu uwayapokelela kuti ayanaka ukubelenga alekela pa kati. Kuti cawama ukwisalilamo akapepala kapulintwa aka kumulaalika ku kulongana ku Ng’anda ya Bufumu. Kuti mwaisalilamo trakiti, broshuwa, atemwa Ulupungu lwa kwa Kalinda nelyo Loleni! no kumulondolwela amuti kuti mulemupeelako ishi mpapulo libili libili nga alefwaya. Atemwa kuti mwamwipusha nga mwingamutandalila ku kulanda nankwe na fimbi pa lwa fyo mumulembeele.

Ukulanda pa lwa Milembele

Moneni kalata wa kulangilila uuli muli cino cipande. Moneni ukuti: (1) Alembelwe busaka busaka, te wa busanku. (2) Nangu enifulupu aluba, uupokelele kalata acili nakwata ishina lya utumine na keyala. (3) Umulandu kalata alembeelwe naulondololwa mu kwanguka kabili mu kulungatika muli paragrafu wa kubalilapo. (4) Icishinka cimo na cimo naciikwatila paragrafu wa ciko. (5) Pa mulandu wa bufwayo bwa uyu kalata, imilembele taili ya musamwe kabili umucinshi ulimo taucishishe mu cipimo.

Muli kalata ku ba mu bulashi, pamo nga ulya kalemba wa cilonganino engatuma kwi ofeshi lya Sosaite, ishina lya cilonganino lifwile lyalembwapo, capamo ne shina lya kwa kalemba, akeyala kakwe, no bushiku. Ishina lya kabungwe mulelembela nalyo lifwile ukulembwa. Ici cikonkwapo na mashiwi ya kuti “Kuli ba . . .” Pa kulekelesha, kuti mwalemba ati “Napwa nine,” e lyo mwalemba ne shina lyenu. Ishina lifwile ukulembwa ku minwe.

Muli kalata uli onse, pooseniko amano ku nsopelo, imilandile, ukubomfya amakooma, amafulustopu, ne fishibilo fya mepusho, e lyo no busaka. Ico cikalenga kalata wenu no bukombe bulimo ukucindamikwa.

Pa kulemba akeyala ako uwapokelela kalata ali no kubomfya pa kumubwesesha, kuti cawama ukulemba akeyala kenu aka ku posti ofeshi. Nga mwamona ukuti teti ciwame ukupeela umuntu mushaishiba akeyala ilyo muleshimikila muli bakalata, ipusheni baeluda nga kuti basuminisha ukubomfya akeyala ka cilonganino nelyo aka kwa eluda upokelela bakalata ba cilonganino. Mwibomfya akeyala ka Watch Tower Society, apo abakapokelela kalata kuti batila afumine ku maofeshi ya Sosaite kabili kuti caleta icimfulumfulu. Nga tamulembele akeyala ka kubweseshako bakalata e lyo mwaisalilamo impapulo, na co kuti calenga balemona kwati baSosaite e babatumine.

Kakatikenipo amastampa ya mutengo wakumanina, maka maka nga namwisalilamo ne mpapulo. Ngo mutengo wa mastampa wacepa, uo muletumina kalata kuti bamweba ukuyabikapo ishibulile, kabili ici kuti camupumbula ukufuma ku bukombe. Mwilaba ukuti mu fyalo fimo nga mwaisalilamo broshuwa nelyo magazini muli kalata, umutengo wa mastampa ulanininako ukucila uwa kalata fye.

Imyumfwikile Yalinga

Ilyo mwapwa ukulemba kalata wenu, belengenimo no kulingulula ifyo mulembele. Aleumfwika shani? Bushe aleumfwika uwa bucibusa kabili uulimo umucenjelo? Ukutemwa ne cikuuku e mibele imo iyo tutukuta ukulangisha kuli bambi. (Gal. 5:22, 23) Nga mwaumfwamo ifishiweme nelyo nga mwaumfwika ukukomaila sana pa fibi, aluleni imilembele.

Kalata kuti aya ku fifulo mushingafika. Ici cine cishinka cilenga kalata ukuba icibombelo cacindama nga nshi ica kubomfya ku butumikishi. Apo kalata emininako imwe ne fyo mwaba, pooseniko amano ku fintu musoselemo, ifyo alemoneka, ne fyo aleumfwika. Napamo ifyebo mwalemba e fingakabilwa ku kulanga umuntu inshila ya ku mweo, ukumukosha atemwa ukumukoselesha ukulaenda muli yo ine nshila.