Umukululo wa Fipusho

◼ Cinshi tulingile ukwibukisha lintu tulelemba amakalata ku bene mayanda abo tushasanga pa mayanda yabo?

Pa milandu yalekanalekana, tulacisanga ukuba icakoselako ukukumanya abantu lintu twabatandalila pa mayanda yabo. Bakasabankanya bamo basanga ukulemba amakalata nga inshila ya kwaafwa ku kulanshanya nabo. Ilintu iyi nshila kuti yaletako ifya kufumamo ifisuma, tulekabila ukulanguluka ifya kucinkulako fimo ifyo fingatwaafwa ukusengauka amafya yamo:

Mwibomfya akeyala ka Sosaite aka kubweseshapo amakalata. Ici kuti calangilila bubi bubi ukuti kalata yatuminwe ukufuma ku maofesi yesu, ukulenga amafya ya kuiletela fye kabili inshita shimo indalama shalundwako isha kulipila.

Shininkisheni ukuti namukwata akeyala kalungama na stampa wa ndalama shakumanina.

Pali kalata mwilembapo fye ukuti kuli “Mwine ŋanda”; bomfyeni ishina lya kulungatika.

Mwisha amakalata mwi samba lya ciibi ilyo pa ŋanda pashili muntu.

Amakalata ayepi eyawamisha. Isalilenimo trakiti nelyo magazini ukucila ukwesha ukulemba ubukombe ubutali.

Amakalata yataipwa yalyangukapo ukubelenga kabili yalamoneka bwino.

Amakalata aya tayapendwa pamo nga ifipempu fya kubwelelamo kano fye nga ca kuti mwalishimikile uyo muntu pa lwenu ku nshita yapita.

Nga ca kuti mulelembela ku muntu uyo ku numa alangishe ubuseko, mulingile ukulembapo akeyala nelyo inambala ya lamya pa kuti bengamutumina. Londololeni programu wesu uwe sambililo lya Baibolo.

Laalikeni mwine ŋanda ku kulongana kwa pa cilonganino cenu. Lembenipo icifulo ne nshita sha kulongana.

Mwitwalilila ukulemba amakalata ku bashiba pa mayanda pa numa mwabwesha ipepala lya cifulo; kasabankanya ukwete ico cifulo pali iyo nshita e washingamwa ukubombamo.