Umukululo wa Fipusho

◼ Mulandu nshi tulingile ukubela abapempwila ilyo tuleshimikila ukubomfya kalata?

Ukushimikila ukubomfya kalata kwalibomba bwino pa nshita ntali. Nalyo line, ifilecitika mu calo pali ndakai, filengele abantu ukuba abapempwila pa lwa kwisula kalata bashishibe. Baenifulupu babula ukulembwapo uko bafumine ilingi line balatwishikwa, maka maka nga ca kuti balembelwe kuli bopeni kabili nabatuuma. Abene mayanda kuti bapoosa kalata wa musango yo ukwabula no kumwisula. Bushe kuti twacilikila shani ica musango yu ukukanacitika?

Nga cingacitika, fyonse fibili kalata na enifulupu filingile ukutaipwa. Ishina lya mwine wa ng’anda e lilingile ukulembwa pali enifulupu. Mwilembapo fye ati “Ku Bene ba Ng’anda.” Kabili, lyonse mulelembapo akeyala kenu. Nga tacili bwino ukulembapo akeyala kenu, lembenipo ishina lyenu na keyala ka Ng’anda ya Bufumu. Mwituma kalata apabula ishina lyenu. Mwibomfya akeyala ka maofeshi ya Nte sha kwa Yehova.—Moneni Umukululo wa Fipusho mu Ubutumikishi Bwesu Ubwa Bufumu ubwa November 1996.

Imitubululo na imbi e lyo na kalata wa kulanga ifya kulemba kuti mwafisanga mu citabo ca Nonkelenimo mu Masambililo ya Isukulu lya Butumikishi Ilya Bulesa, amabula 71-3. Ifi fya kutungulula fikatwafwa ukubomfya amakalata bwino mu kubila imbila nsuma kuli bambi.