Programu wa Kwafwa Ukuba Kalanda Kabili Kasambilisha Musuma

NAMPO nga uli mwaice nelyo muli bakalamba, abaume nelyo abanakashi, yano masambililo kuti yamwafwa ukuwamyako imilandile yenu no kumulenga ukuba kasambilisha musuma uwa Cebo ca kwa Lesa.

Kangalila we sukulu akatantika abali no kulanda amalyashi mwi Sukulu lya Butumikishi Ilya Bulesa. Pa mabula yakonkelepo yatatu, mwalasangapo formu wa kufundilwapo uwa pa lwenu. Amanambala yali pa ntanshi ya fishinka fimo na fimo yalelangilila amasambililo yali pa mabula yakonkelepo. Muli ayo masambililo muli no kusanga nabalondolola ifya kucita pa kwishiba iyo milandile ne misambilishishe no mulandu cacindamina. Muli no kusanga ne fya kwafwa pa fyo mwingacita icilandilwe.

Ku kuso kwa formu wa kufundilwapo kuli ifiishibilo fyaibela ifya kulangilila ifishinka fingabomfiwa (1) mu kubelengela ibumba, (2) mu lyashi lya kulanda nge cilangililo ca bantu babili nelyo abengi, nelyo (3) ku lyashi lya kulanda ku cilonganino. Kangalila we sukulu akamweba icishinka mukabombelapo. Kuti cawama ukubombela pa cishinka cimo pa nshita imo. Mukamwenamo nga mwacita ifitubulwilwe pa mpela ye sambililo mupeelwe ukubombelapo. Nga camoneka ukuti namubomfya bwino ukufunda mwi sambililo mwaebelwe, kafundisha wenu akamweba ukubombela pa cishinka cimbi.

Nga ca kuti ilyashi lyenu lili no kulandwa nge cilangililo, mukakabila imitantikile. Pe bula 82 pali umutande wa mitantikile, lelo te iyi ine fye yeka mwingabomfya. Kafundisha wenu kuti amweba ukwesha imitantikile imo pa kuti mubeleshe ukuibomfya, nelyo kuti amuleka mwaisalila iyo mulefwaya.

Ukubelenga cino citabo no kucita ifitubulwilwe nangu fye tamulepekanishisha ilyashi lya mwi sukulu kukamwafwa sana ukulunduluka. Napamo cila mulungu kuti mulebelenga isambililo limbi.

Te mulandu ne myaka yapitapo apo mwatendekela ukulanda amalyashi mwi sukulu nelyo ukubombako ubutumikishi bwa mwi bala, nalyo line kuti mwatwalilila ukulunduluka. Shi nonkelenimo apakalamba mu masambililo ya mwi Sukulu lya Butumikishi Ilya Bulesa.