Ukubwekeshapo Ku Kukomailapo

IMISAMBILISHISHE ilenga abantu ukumfwa ni ilya iibamo no kubwekeshapo. Nga mwabwekeshapo icishinka cacindama mulelanda, ilingi bakomfwa kuti balecibukisha. Nga mwabwekeshapo ifyebo, ukufilandila mu nshila imbi, kuti caafwa bakomfwa ukufyumfwikisha bwino.

Nga ca kuti bakomfwa wenu tabebukisha ifyo musosa, ifyebo fyenu tafyakabalenge batontonkanye pa fyo basuminamo kabili tafyakaalule imikalile yabo. Bakalatontonkanya fye maka maka pa fishinka ifyo mwakomailepo sana.

Yehova, Kasambilisha wesu Uwakulisha alitubikile cipasho mu kubwekeshapo pa kulanda. Apeele Amafunde 10 ku luko lwa bena Israele. Abomfeshe malaika ukumulandilako no kulenga uluko ukumfwa yalya mafunde pa Lupili lwa Sinai. Pa numa aliyalembele no kupeela Mose. (Ukufu. 20:1-17; 31:18; Amala. 5:22) Ilyo aebelwe na Yehova, Mose alibwekeshepo ukweba yalya mafunde ku luko ilyo bashilaingila mu Calo Calaiwe, kabili ukupitila mu mupashi wa mushilo, Mose aliyalembele, nga fintu tusanga mu Amalango 5:6-21. Pa mafunde yapeelwe ku bena Israele, pali ne funde lya kutemwa Yehova no kumubombela ku mitima yabo yonse, ku myeo yabo yonse, na ku maka yabo yonse. Ili funde nalyo lyalibwekeshiwepo imiku iingi. (Amala. 6:5; 10:12; 11:13; 30:6) Mulandu nshi? Pantu nga fintu Yesu asosele, “ifunde ili likulu kabili lya ntanshi.” (Mat. 22:34-38) Yehova abomfeshe kasesema Yeremia ukucinkulako abena Yuda ukucila pa miku 20 ukuti calikatama sana ukumfwila fyonse ifyo alebeba. (Yer. 7:23; 11:4; 12:17; 19:15) Kabili muli Esekiele, Lesa alandile ukucila pa miku 60 ukuti inko “shikeshibo kuti nine Yehova.”—Esek. 6:10; 38:23.

Mu fyalembwa pa lwa butumikishi bwa kwa Yesu, na mo tulamona ukuti pa kulanda alebwekeshapo. Ku ca kumwenako, kwaba Amalandwe yane—limo na limo lyabamo ifyacindama ifyacitike ifyalandwapo na mwi Landwe na limbi limo nelyo ayafulilako lelo ukufilandila mu nshila yapusanako panono. Ilyo Yesu alesambilisha, inshita ishingi alelanda pa cishinka cikalamba ica kufunda kwakwe cimo cine lelo ukucilandila umwapusanapusana. (Marko 9:34-37; 10:35-45; Yoh. 13:2-17) Kabili ilyo ali pa Lupili lwa Miolife ninshi kushele fye inshiku shinono ilyo talafwa, Yesu alibwekeshepo fimo ku kukomaila pali uku kufunda kwacindama ukwa kuti: “Loleni, pa kuti tamwaishibo bushiku Shikulwinwe akesamo.”—Mat. 24:42; 25:13.

Mu Butumikishi bwa mwi Bala. Ilyo muleshimikila abantu, mufwaya ukuti baleibukisha ifyo mwasosa. Ukwishiba bwino ifya kubwekeshapo kuti kwamwafwa sana ukucite co.

Ilingi line, ukubwekeshapo icintu ilyo line mulecilandapo kukafwa ukuti ciikalilile mu mutontonkanyo wa muntu mulelandako. E ico pa numa ya kubelenga ilembo limo, pa kukomailapo kuti mwalanda pa ciputulwa cimo icipulilemo no kwipusha ati, “Bushe namumona amashiwi yali pali ili lembo?”

Pa kulanshanya, amashiwi ya kulekelesha na yo kuti yabomfiwa bwino. Ku ca kumwenako, kuti mwatila: “Icishinka cikalamba ico ndesubila ukuti mwakulaibukisha pali fi twalanshanya ni ci . . . ” Lyene cilondololeni mu nshila yayanguka. Kuti caba nge fi: “Ubufwayo bwa kwa Lesa bwa kuti isonde likasanguke paradise. Ubo bufwayo bukafishiwapo nangu cibe shani.” Nelyo kuti mwatila: “Baibolo ilalondolola bwino bwino ukuti tuli mu nshiku sha kulekelesha isha buno bwikashi. Nga tulefwaya ukwisapusuka, tufwile ukusambilila ifyo Lesa afwaya tulecita.” Atemwa kuti mwatila: “Nga fintu twamona, mu Baibolo mwaba ukufunda kwingatwafwa ukwishiba ifya kucita pa mafya ya mu lupwa.” Inshita shimo kuti mwabwekeshapo fye ifyo mwacibelenga mu Baibolo ukuti e cishinka cili no kwibukishiwa. Kwena, pa kucite fyo bwino kano ukutontonkanishisha kabela.

Ku fipempu fya kubwelelamo, na ku masambililo ya Baibolo, pa kubwekeshapo napamo kuti mwasanshamo amepusho ya kupitulukamo.

Nga ca kuti umuntu camukosela ukumfwa ukufunda kwa mu Baibolo nelyo kwamukosela ukukonka, napamo kuti mwakabila ukulanda pali uyo mulandu imiku yafulilako. Esheni ukuulondolwela mu nshila shapusanapusana. Ukulanshanya takulekabila ukulepa lelo kufwile ukucilimuna amatontonkanyo ya musambi pa kuti atwalilile ukutontonkanya pa lwa uyo mulandu. Ibukisheni ukuti Yesu alibomfeshe uyu musango wa kubwekeshapo ku kwafwa abasambi ukutaluka ku kufwaisha ukuba aba ntanshi.—Mat. 18:1-6; 20:20-28; Luka 22:24-27.

Pa Kulanda Amalyashi. Nga mulalanda amalyashi pa cisebele, ubuyo bwenu te kulanda fye ifyebo. Mulefwaya ibumba ukufyumfwa, ukufibukisha, no kufibomfya. Pa kuti cibe fyo, mulebwekeshapo ifishinka.

Lelo nga mwabwekeshapo ifishinka fikalamba imiku iingi sana, ibumba kuti lyaleka ukwangwako. Pooseniko amano ku kusala ifishinka filingile ukukomailwapo sana. Ifi ilingi line fiba fishinka fikalamba ifili mu lyashi lyenu, lelo inshita shimo kuti fyaba fyebo fimbi ifingaba ifyacindama nga nshi kwi bumba lyenu.

Pa kuti mubwekeshepo, intanshi kuti mwalondolola ifishinka fyenu ku ntendekelo. Kuti mwalanda fye amashiwi ayepi ayalesupula ifyo muli no kulanda, kuti mwaipushako amepusho, nelyo ukulandako ifya kumwenako finono ifilepindikapo amepusho ayo muli no kwasuka mu lyashi. Kuti mwalondolola ifishinka fikalamba ifilimo no kufipenda. Lyene kuti mwakolobonda muli fyo fishinka cimo na cimo ilyo mwaingila mu lyashi. Kuti mwakomailapo nga nshi ilyo mwafika mu kati ka lyashi pa kubwekeshapo icishinka cimo na cimo ilyo mushilaya ku cikonkelepo. Nelyo kuti mwacite fyo pa kubomfya ica kumwenako icilelanda pa fyo ico cishinka cikalamba cingabomfiwa. Kuti mwakomaila na kabili pa fishinka fikalamba pa kufibwekeshapo pa kusondwelela. Apo nomba, kuti mwafikomailapo ukupitila mu kulanda ifyebo filecilanya ifishinka, ukwasuka amepusho mwacipusha, nelyo mu kwipifya ukupikulula ubwafya mwacilandapo pa kubala.

Ukulunda pali fi twalanda, kalanda wabelesha alapempwila ukumona abali mwi bumba alelandako. Nga ca kuti bamo cabakosela ukumfwikisha ifyebo fimo, kalanda aleshiba. Nga ca kuti ico cishinka nacicindama, alacibwekeshapo. Lelo, nga ca kuti pa kubwekeshapo abomfya fye amashiwi yamo yene, teti bomfwe. Ukusambilisha kusanshamo ifingi ukucila pali fyo. Afwile ukwalulaalulako pa kulanda. Napamo kuti akabila ukulundako fimo ku lyashi lyakwe mu kupumikisha. Ukwishiba ifya kwalula ilyashi ukulingana ne bumba mulelandako e cikapima sana nga ni mwe bakasambilisha balenga abantu ukumfwa.