Icipandwa 17
Finshi Imfwile Ukwishiba pa Fibusa fya pa Sukulu?
“Limo nga namona abaice banandi bali ibumba, intontonkanya nati, ‘Kwena aba bantu balomfwana ee. Na ine kuti natemwa ukulaumfwana na bo.’”—E fyalandile Joe.
“Ine nshakwete ubwafya bwa kupanga ifibusa pa sukulu. Ici cine e candetelele.”—E fyalandile Maria.
UMUNTU fye onse afwile ukukwata ifibusa ifyo engala-angala na fyo kabili ifyo engashintililapo ilyo akwata amafya. Yesu alikwete ifibusa, kabili aaletemwa ukuba na fyo. (Yohane 15:15) Kabili ilyo Yesu alefwa pa cimuti ico bamwipailepo, cibusa wakwe Yohane, “umusambi uo atemenwe,” aali mupepi. (Yohane 19:25-27; 21:20) Kanshi na iwe kuti cawama nga wakwata ifibusa ifyaba nga Yohane, aba kuti nangu ifintu fyabipa shani, te kuti bakutaluke!
Nalimo umona kwati walikwata kale ifibusa ifinono ifya musango uyu ku sukulu. Mwakwata amano yamo yene kabili ulomfwa bwino ukulanda na bo ilyashi. Nalimo ubamona kwati bena te ‘bantu ababi.’ (1 Abena Korinti 15:33) Anne alandile ukuti: “Tulamonana na ba abaice banensu cila bushiku, kanshi cilanguka ukwangala na bo. Tacaba nga filya ciba nga uli na Bena Kristu banobe, aba kuti nga ulelanda ulingile ukusala ifya kulanda e lyo ne fya kucita. Nomba ku sukulu kwena kuti wacita fye fyonse ifyo ulefwaya.” Nangu limbi na iwe waba nga Lois uwatile, “Nalefwaya ukulanga abana be sukulu banandi ukuti Inte sha kwa Yehova, tabaapusana na bantu bambi nga filya abantu batontonkanya.” Bushe ifi e fingalenga ukuti uleumfwana sana na banobe ba ku sukulu?
Mulandu Nshi Ulingile Ukubela Uwacenjela?
Umfwa ifyacitikile Maria, ulya tulandilepo pa kutendeka. Pa mulandu wa kuti aali bwino sana ku bantu, calyangwike ku bengi ukumutemwa, nomba ubwafya fye akwete, taishibe abantu ashalingile ukula-angala na bo. Atile: “Naleumfwa bwino sana ukutemwikwa ku balumendo na bakashana. E calengele ukuti njiletelele.” Ifya musango yu e fyacitike na kuli Lois. Atile: “Natampile ukukonkelela imisango ya banandi. Natampile ukukwata amano ayo bakweteko.”
Icacitike te kuti cikupapushe. Pantu kwena nga ca kuti uleumfwana sana na babiyo, ninshi na mano yene mufwile ukulingana. Nga walaumfwana na bantu bashikonka amafunde ayo waishiba ayalembwa mu Malembo, ninshi na iwe kuti wakwatako amano bakwata. (Amapinda 13:20) Kanshi e cilya umutumwa Paulo alembeele ukuti: “Mwiba kwi koli limo line na bashatetekela pantu tamwaba cimo cine.”—2 Abena Korinti 6:14.
Ifyo Wingacita
Bushe ifi Paulo alandile cilelola mu kuti ufwile ukutaluka abanobe abo usambilila na bo ku sukulu? Iyo! Pa kuti Abena Kristu babombe bwino umulimo wa ‘kulenga aba nko shonse ukuba abasambi,’ balingile ukwishiba ifyo bengalanshanya bwino na baume na banakashi aba mishobo fye yonse, abapepa ukwalekanalekana, kabili ababa ne fikulilo fyalekanalekana.—Mateo 28:19.
Umutumwa Paulo alibombele bwino sana uyu mulimo wa kushimikila. Alishibe ifya kulanda “ku bantu bonse,” nangu line talepepa uko bena balepepa. (1 Abena Korinti 9:22, 23) Na iwe kuti wapashanya Paulo. Wilaifinya ku banobe. Ulingile ukusambilila ifyo wingalanshanya na bo bwino. Nomba taulingile ukukonkelela imilandile ne mibele ya bana be sukulu banobe. Lelo, ulingile ukwangufyanya ukubalondolwela mu mucinshi umulandu wasalilapo ukulakonka amafunde ya mu Baibolo.—2 Timote 2:25.
Kwena cishinka ukuti tawakabe nga bantu bambi, kabili nga taucitileko ifyo balecita limo kuti caba bwafya. (Yohane 15:19) Lelo umfwa ifyo ulingile ukucita. Tutile uli mu bwato ubwa kupusushishamo abantu bushe na iwe kuti watolokela mu menshi pa kuti wafwilishe ababundile? Awe te fyo wingacita!
E fyo na bana be sukulu banobe baaba, baliba mu bwafya pantu te fibusa fya kwa Yehova. (Amalumbo 121:2-8) Nga wasuula amafunde ya kwa Yehova pa kuti fye wingalaumfwana na bana be sukulu banobe, ukailetelela fye ku fyabipa ificitikila abantu abashipepa kabili te kuti ube ne nsansa. (Abena Efese 4:14, 15; Yakobo 4:4) Icingawama ukucita, kwafwa fye abana be sukulu banobe ukwisaniina mu bwato bwa mampalanya umo waba, kabili pa kubaafwa, kubalangilila ifyo bengacita pa kuti balebombela Yehova. Bushe kwena kuti kwaba inshila na imbi iisuma iya kulangilila ukuti ni we cibusa musuma ku babiyo iingacila pali iyi?
ILEMBO
“Ifintu fyonse ncitila imbila nsuma, pa kuti nshimikileko bambi.”—1 Abena Korinti 9:23.
IFYO WINGACITA NI FI
Nga ca kuti abana be sukulu banobe balefwaya ukusambililako ifyo waishiba, ulebaleka balanda ifyo baletontonkanya. Ulingile ukukutikisha. Pa kubaasuka, ‘ulebasuka no mutima uwafuuka na katiina.’—1 Petro 3:15.
NAWISHIBA . . . ?
Abantu abengi ababombela Lesa pali lelo, baasambilile Baibolo ku bana be sukulu banabo abashali na mwenso wa kushimikila.
IFYO NDEFWAYA UKUCITA!
Nga namona ukuti ndeumfwana sana no mwana we sukulu munandi, ifyo nkacita ni fi ․․․․․
Nga ca kuti umwana we sukulu munandi alentumfya pa mulandu wa fyo nasambilila mu Baibolo, ifyo nkacita ni fi ․․․․․
Ifyo ningatemwa ukwipusha abafyashi bandi pali ili lyashi ni fi ․․․․․
ULETIPO SHANI?
● Mulandu nshi uletontonkanishisha ukuti te kuti cafye ukupanga ifibusa pa sukulu ukucila mu cilonganino?
● Fintu nshi ifyabipa ifingacitika nga ca kuti ilyo wainuka ku sukulu uleangala no mwana we sukulu munobe uo mushipepa nankwe?
● Busuma nshi bwaba mu kwebako abana be sukulu banobe ukuti uli Nte ya kwa Yehova?
[Amashiwi pe bula 143]
“Ku sukulu nalekwata amano yamo yene na banandi, kanshi tacaleafya ukupanga ifibusa. Pali ino nshita, nalishiba ukuti ifyo nalecita nalelufyanya. Nomba nalikwata ifibusa fya cishinka mu cilonganino.’’—E fyalandile Daniel
[Icikope pe bula 146]
Bushe nga ulefwaya ukwafwa umuntu uwaponena mu menshi, ufwile ukutolokelamo na iwe nangu kuti wamupoosela fye icingamwafwa ukupusuka?