Ubufumu Babwakanya

Ilyo Solomone alepepa Yehova, mu Israele mwali umutende. Lelo Solomone alyupile abanakashi abengi aba ku fyalo fimbi, kabili aba banakashi balepepa ifilubi. Panono panono, Solomone alitendeke ukwaluka, kabili na o alitendeke ukupepa ifilubi. Yehova alifulilwe sana. Aebele Solomone ati: ‘Nkakupoka ubufumu bwa Israele kabili nkabwakanya pabili. Umubomfi obe nkamupeela abantu abengi aba kuteka, e lyo ulupwa lobe lukakwata fye abantu abanono abo lukalateka.’

Yehova alicitile na cimbi icalelanga ifyo aali no kucita. Ilyo Yeroboamu umubomfi wa kwa Solomone aleya mu nshila, akumenye kasesema Ahiya. Ahiya alepwile ica kufwala cakwe mu fipimfya 12, e lyo aeba Yeroboamu ati: ‘Yehova alepoka ulupwa lwa kwa Solomone ubufumu kabili alebwakanya pabili. Sendapo utupimfya 10 pantu ukaba imfumu pa mikowa 10 iya bena Israele.’ Ilyo Imfumu Solomone yaufwile ifi, yalefwaya ukwipaya Yeroboamu! E ico Yeroboamu alibutwike no kuya ku Egupti. Ilyo papitile inshita, Solomone alifwile kabili umwana wakwe Rehoboamu e waishileba imfumu. Yeroboamu alibwelele ku Israele pantu Solomone uwalefwaya ukumwipaya alifwile.

Abakalamba ba mu Israele baebele Rehoboamu ati: ‘Nga ulesunga bwino abantu, bakaba aba cishinka kuli iwe.’ Nomba abanankwe ba kwa Rehoboamu bena bamwebele abati: ‘Ufwile ukulacusha abantu! Ulebapeela incito ishakosa!’ Rehoboamu acitile ifyo abanankwe bamwebele. Alecusha sana abantu, ici calengele abantu bamupondokele. Babikile Yeroboamu pa bufumu bwa mikowa 10 ubo batampile ukwita abati ubufumu bwa Israele. Imikowa imbi ibili baleita abati ubufumu bwa Yuda, kabili iyi mikowa ibili yalitemenwe Rehoboamu. Ukutula ilya nshita imikowa 12 iya bena Israele baliyakenye.

Yeroboamu talefwaya abantu bakwe baleya mu kupepa ku Yerusalemu iyali mu ncende umo Rehoboamu aleteka. Bushe walishiba ico ashalefwaila baleya ku Yerusalemu? Yeroboamu alemona kwati abantu bakamupata kabili bakatemwa Rehoboamu. E ico apangile ifilubi fibili ifya golde e lyo aeba abantu ati: ‘Ku Yerusalemu kutali sana. Mulepepela fye kuno kwine.’ Abantu batendeke ukupepa ifilubi fya golde ica kuti balilabile Yehova na kabili.