Umushilika no Mukashana Umunono

Mu calo ca Siria mwali umukashana umunono umwina Israele uo basendele ukufuma ku calo uko afyalilwe. Abashilika abena Siria e bamusendele ukumufumya kuli balupwa lwakwe, kabili aileba umusha wa mukashi wa kwa Naamani. Naamani ali mukalamba wa bashilika abena Siria. Umukashana alepepa Yehova nangu ca kuti abantu aleikala nabo tabalepepa Yehova.

Naamani alilwele ubulwele bwa pa nkanda ububi sana, kabili aleumfwa ubukali inshita yonse fye. Umukashana alefwaya sana ukwafwa Naamani. E ico aebele umukashi wa kwa Naamani ati: ‘Nalishiba umuntu uwingaposha abena mwenu. Mu Israele mwaliba kasesema wa kwa Yehova, ishina lyakwe ni Elisha. Kuti aposha abena mwenu.’

Umukashi wa kwa Naamani aebele umwina mwakwe ifyo umukashana alandile. Naamani ali-ipeeleshe ukucita icili conse pa kuti apole, e ico aliile ku ng’anda ya kwa Elisha mu Israele. Naamani alemona kwati Elisha akamupokelela bwino sana pantu ali muntu uwacindama. Lelo Elisha tailelanda na Naamani, atumine fye umubomfi wakwe ukuya mupokelela no kumweba ati: ‘Kabiye, kasambe imiku 7 mu Mumana wa Yordani. E lyo walapola.’

Naamani tatemenwe ifyo Elisha acitile. Atile: ‘Ine nacilati uyu kasesema alaita pe shina lya kwa Lesa wakwe, apishe no kuboko kwakwe pa mubili wandi, no kumposha. Lelo anjeba fye ukuyasamba mu mumana wa mu Israele. Twalikwata imimana iisuma sana mu Siria. Cinshi teti ndeyasambila mu mimana ya ku mwesu?’ Naamani alifulilwe, kabili alifumine na pa ng’anda ya kwa Elisha.

Nomba ababomfi ba kwa Naamani bamwebele ati: ‘Bushe te kuti mucite fyonse ifyo bamweba pa kuti mupole? Ico uyu kasesema amweba ukucita tacafishe. Cinshi mwakaanina?’ Naamani alyumfwile ifyo bamwebele. Aile ku Mumana wa Yordani no kuitumpika mu mumana imiku 7. Ilyo Naamani aitumpike pa muku walenga 7, alipolele. Alitemenwe sana, e ico alibwelele kuli Elisha pa kuti amutashe. Naamani alandile ati: ‘Nomba naishiba ukuti Yehova e Lesa wa cine.’ Bushe ulemona ukuti umukashana umwina Israele aumfwile shani ilyo Naamani aile ku ng’anda ninshi napola?