Fundeni Abana Benu

Umukashana Alefwaya Ukwafwilisha

BUSHE walitala aumonapo umuntu umulwele sana?— Ilyo wamumwene, bushe walefwaisha ukumwafwa ukuti apole?— Nga ca kuti uyo muntu aafumine ku calo cimbi nelyo apepa kumbi, bushe nga walimwafwilishe?— Mupepi ne myaka 3,000 iyapita, umukashana umo uwaikeelepo kale mu calo ca bena Israele, alefwaya ukwafwa umuntu umo ukuti apole. Natulande pa fyo cali ilya nshita.

Uyu mukashana aleikala mu calo ca bena Israele, kabili abena Israele balelwa sana inkondo na bena mupalamano babo abena Suria. (1 Ishamfumu 22:1) Bushiku bumo, abena Suria baile ku calo ca bena Israele no kusenda uyu mukashana mu busha. Bamutwele ku Suria, kabili kulya aileba umusha ku mukashi wa kwa Naamani uwali umukalamba wa bashilika abena Suria. Naamani alilwele ubulwele bwabipisha ubwa fibashi ubulenga iminofu ukuliiwa.

Uyu mukashana umusha aebele umukashi wa kwa Naamani ukuti umulume wakwe kuti apola. Umukashana atile: ‘Naamani nga aba mu Samaria, Elisha kasesema wa kwa Yehova kuti amupususha ku fibashi fyakwe.’ Ifyo umukashana alandiile pali Elisha fyalengele Naamani ukucetekela ukuti cine cine kasesema kuti amundapa. E ico lintu Beni-hadadi imfumu ya Suria yamusuminishe, Naamani aile na babomfi bakwe pa lwendo ulutali sana ulwa makilomita mupepi na 150 ku kuyafwaya Elisha.

Intanshi baile kuli Yehoramu, imfumu ya bena Israele. Balangile iyi mfumu kalata yafumine ku Mfumu Beni-hadadi iyalelangilila ukuti Naamani alefwaya uwa kumundapa. Lelo Yehoramu tacetekele Yehova na kasesema Elisha. Yehoramu ena amwene kwati Beni-hadadi alefwaya fye apa kutampila inkondo. Ilyo Elisha aumfwile icacitike, aebele Imfumu Yehoramu ukuti: “Shi leka ese kuli ene.” Elisha alefwaya ukundapa Naamani ulwalwelele ubulwele bwabipa pa kuti alange abantu amaka ya kwa Lesa.—2 Ishamfumu 5:1-8.

Ilyo Naamani uwali na bakabalwe na maceleta afikile pa ng’anda ya kwa Elisha, Elisha atumine inkombe ukuyaeba Naamani ukuti: “Kabiye kowe imiku cinelubali mu Yordani, no mubili obe ulebwelelamo no kusanguluka.” Naamani alifulilwe. E na ale-enekela ukuti Elisha e walafuma no kwisapisha iminwe yakwe pa fibashi no kumundapa. Lelo aishilemona fye inkombe ya kwa Elisha e yaisa! Awe Naamani e fyo apilibwike cipyu cipyu no kutendeka ukubwelelamo.—2 Ishamfumu 5:9-12.

Nga ca kuti wali umubomfi wa kwa Naamani nga wacitile shani?— Umubomfi umo amwipwishe ukuti: ‘Bushe Elisha amweba ukucite cintu cikalamba, nga tamucitile? pali bufi apo amweba, ati, Owa, no kusanguluka?’ Naamani alyumfwile ifyo bamwebele. ‘Alitentemwike, aitumpa na mu Yordani imiku cinelubali (7), no mubili wakwe wabwelelemo ngo mubili wa mwaice munono.’

Naamani abwelele kuli Elisha no kuyamweba ukuti: “Shi moneni, nomba ninjishibo kuti tapali Lesa pano isonde ponse kano muli Israele!” Alaile Elisha ukuti takatale ‘aninika ilambo ku milungu imbi, kano kuli Yehova.’—2 Ishamfumu 5:13-17.

Bushe kuti watemwa ukwafwa umuntu ukusambilila pali Yehova na pa fyo afwilisha abantu nga filya umukashana acitile?— Ilyo Yesu ali pano calo, umwaume umo uwali ne fibashi alimucetekele kabili amwebele ukuti: ‘Nga mulefwaya kuti mwansangulula.’ Bushe walishiba ifyo Yesu amwaswike?— Yesu atile, “Ndefwaya.” Yesu alimundepe nga filya fine Yehova aundepe Naamani.—Mateo 8:2, 3.

Bushe walishiba ukuti Yehova akaleta icalo cipya umukaba abantu abashakalelwala kabili abakekala umuyayaya?— (2 Petro 3:13; Ukusokolola 21:3, 4) Kanshi na iwe kuti cawama uleebako bambi pali ifi fintu fisuma!

Amepusho:

○ Bushe umukashana baikete ku bashilika ba kwa Naamani, aafwilishe shani Naamani?

○ Cinshi calengele ukuti Naamani akaane ukumfwila Elisha pa kubala, lelo cinshi calengele ukuti amumfwile pa numa?

○ Cinshi wingafwaisha ukucita pa kuti upashanye ulya mukashana?

○ Cinshi Yesu alefwaya ukucitilo uwa fibashi, kabili cinshi cikalenga imikalile mu calo cipya ica kwa Lesa ukuwama?