“Nkemya Kacema Umo”

1-3. Cinshi Esekiele abelele no bulanda, kabili finshi Lesa amwebele ukulemba?

CALI ni mu mwaka walenga 6 ukutula apo Esekiele abelele muli bunkole mu Babiloni.a Kasesema Esekiele ali sana no bulanda ilyo aletontonkanya pa fyo abantu bashalebateka bwino mu Yuda, icalo ico afumineko icali ukutali sana kabili ico atemenwe. Alimweneko uko imfumu shalekanalekana shaleteka.

² Esekiele afyelwe ilyo Imfumu Yoshia iyali ne cishinka yaleteka. Esekiele afwile alyumfwile bwino sana ilyo aishibe ifyo Yoshia aonawile ifilubi ifyo abantu balepepa ne fyo abweseshe ukupepa ukwasanguluka mu Yuda. (2 Imila. 34:1-8) Nomba ifyo Yoshia ayalwile tafyatwalilile pantu imfumu ishingi ishakonkelepo shalitwalilile ukupepa ifilubi. Te kuti tupape ukuti ilyo ishi imfumu shabipa shaleteka abantu balecita sana ifyabipa, kabili bucibusa bwabo na Yehova bwaile bulepwa. Bushe ici calepilibula ukuti abantu tabali no kupepapo Lesa mu nshila iyasanguluka na kabili? Awe nakalya!

³ Yehova alengele kasesema wakwe uwa cishinka ukulemba ubusesemo bwa kubalilapo pa masesemo ayengi ayo alembele ayalanda pali Mesia, uukaba Kateka kabili Kacema, uukabwesha ukupepa ukwasanguluka umupwilapo, kabili uukalasakamana bwino impaanga sha kwa Yehova. Kuti cawama twaishiba bwino aya masesemo pantu aya masesemo nga yafikilishiwa yakalenga tukabe no mweo wa muyayaya. Kanshi natusambilile pa masesemo 4 ayalanda pali Mesia ayaba mwi buuku lya kwa Esekiele.

“Akamusambo Akateku” Kaba “Umukedari Uukalamba”

4. Busesemo nshi Esekiele alandile, kabili bushe Yehova atendeke shani ukumweba ubu busesemo?

⁴ Nalimo mu mwaka wa 612 ninshi Yesu talaisa pano isonde, Yehova alilandile na Esekiele, kabili Esekiele alilandile ubusesemo ubwalelanga ifyo imitekele ya kwa Mesia yali no kuba ne co tulingile ukucetekelela Ubufumu bwakwe. Ilyo Yehova ale-eba Esekiele ubu busesemo, abalilepo ukweba Esekiele ukuti apikile bankole banankwe ubwile, ubwalangilile ifyo imfumu sha mu Yuda shali ne cishinka, kabili ubwalelanda pa fyo imitekele ya kwa Mesia iyalungama yacindama.—Esek. 17:1, 2.

5. Finshi ubwile bwalelandapo?

⁵ Belengeni Esekiele 17:3-10. Ubu e bwile ubo Esekiele apikile: “Kapumpe umukalamba” atimpula akantongolilo akalepuuka aka cimuti ca mukedari e lyo akatwala “mu musumba wa ba makwebo.” Lyena kapumpe “abuulilepo imbuto shimo isha mu calo” e lyo ayashibyala mu mushili uwa mufundo “umwaba sana amenshi.” Ulubuto lwalikulile kabili lwaishileba ‘umwangashi uwa-andalila.’ Lyena kwaishile “kapumpe na umbi umukalamba.” Uyu mwangashi watwele imishila ya uko kuli uyu kapumpe uwalenga bubili pa kuti aulimbule no kuya ulimba ku cifulo cimbi ukwali sana amenshi. Yehova tatemenwe ifyo ulya mwangashi wacitile, kabili alandile ukuti baali no ku-unukaula imishila kabili ‘wali no kuuma fye onse.’

6. Londololeni umo ubwile bwalola.

⁶ Bushe ubu ubwile bwalolele mwi? (Belengeni Esekiele 17:11-15.) Mu mwaka wa 617 ninshi Yesu talaisa pano isonde, Imfumu Nebukadnesari iya ku Babiloni (“kapumpe umukalamba” uwa kubalilapo) yalishingile Yerusalemu. Yalifumishe Imfumu Yehoyakini iya baYuda pa bufumu (“akantongolilo”) no kuitwala ku Babiloni (“umusumba wa ba makwebo”). Nebukadnesari abikile Sidekia (‘ulubuto lumo ulwa mu calo’ e kutila uwa ku bufumu) pa bufumu mu Yerusalemu. Imfumu babikile mu Yuda, balilengele yalapa umulapo mwi shina lya kwa Lesa ukuti yakulanakila imfumu ya Babiloni. (2 Imila. 36:13) Lelo Sidekia tasungile umulapo, alipondokele abena Babiloni kabili ayalukile ku Mfumu Farao iya bena Egupti (“kapumpe umukalamba” uwalenga bubili) pa kuti imutumineko abashilika, lelo ifi tafyamwafwile. Yehova tatemenwe filya Sidekia afililwe ukusunga umulapo. (Esek. 17:16-21) Sidekia basukile bamufumya pa Bufumu kabili afwilile mu cifungo mu Babiloni.—Yer. 52:6-11.

7. Masambililo nshi twingasambilila ku bwile ubwalelanda pa busesemo?

⁷ Finshi twingasambilila kuli ubu ubwile ubwalelanda pa busesemo? Ica kubalilapo, apo tupepa Lesa mu nshila iyasanguluka tufwile ukulafikilisha ifyo twalaya. Yesu atile, “Muletila fye ‘Ee’ nga ca kuti mulepilibula ukuti ee, kabili muletila fye ‘Awe’ nga ca kuti mulepilibula ukuti awe.” (Mat. 5:37) Nga twamona ukuti nacilinga ukulapa pa menso ya kwa Lesa nga filya kuba ukulapa mu cilye, tulingile ukwibukisha ukuti tufwile ukufishapo uyo mulapo. Icalenga bubili, tatulingile ukulacetekela fye umuntu uuli onse. Baibo itusoka ukuti: “Mwilacetekela intungulushi nelyo umuntunse umbi, uushingamupususha.”—Amalu. 146:3.

8-10. Bushe Yehova alondolwele shani uukaba Kateka mu Bufumu bwa kwa Mesia, kabili bushe ubu busesemo bwafikilishiwe shani? (Moneni na akabokoshi akaleti “Ubusesemo Ubulanda Pali Mesia—Umukedari Uukalamba.”)

⁸ Na lyo line, kwaliba kateka umo uwalinga sana ukumucetekela. Pa numa ya kupika ubwile bwa kantongolilo ubwalelanda pa busesemo, Yehova atendeke ukulondolola Imfumu Mesia iikalateka ku ntanshi.

⁹ Ifyo ubu busesemo bulandapo. (Belengeni Esekiele 17:22-24.) Nomba uno muku wena te kapumpe umukalamba uukatimpula akantongolilo ka mukedari, lelo Yehova umwine e ukatimpula “akantongolilo ka mukedari no kukalimba . . . pa lupili ulutali kabili ulwasansuka.” Aka akantongolilo kakakula no kuba “umukedari uukalamba” kabili mwi samba lya uko mukalaikala “ifyuni fya misango yonse.” Lyena “ifimuti fyonse ifya mu mpanga” fikeshiba ukuti ni Yehova e ulengele ici icimuti icikalamba ukubalula.

¹⁰ Ukufikilishiwa kwa ubu busesemo. Yehova abulile Umwana wakwe Yesu Kristu uwa mu lupwa lwa kwa Davidi ulwa ku bufumu (“akantongolilo ka mukedari”) no kumubika pa Lupili lwa ku muulu ulwa Sione (“ulupili ulutali kabili ulwasansuka”). (Amalu. 2:6; Yer. 23:5; Ukus. 14:1) Kanshi Yehova abulile Umwana wakwe uo abalwani bakwe balemona ukuti e “wacepesha pa bantunse” no kumucindamika ilyo amubikile pa “cipuna ca bufumu ica kwa Davidi wishi.” (Dan. 4:17; Luka 1:32, 33) Nga filya umukedari uukalamba baulimbile pa lupili, Imfumu Mesia, Yesu Kristu, akaba ku muulu ilyo akalateka isonde lyonse kabili akalenga bonse abo akalateka bakapaalwe. Uyu e Kateka uo tulingile ukucetekela sana. Ilyo Yesu akalateka, abantunse aba cumfwila mwi sonde lyonse ‘bakalaikala umutende pantu tabakaletiina’ ukuti ifyabipa kuti fyabacitikila.—Amapi. 1:33.

11. Lisambililo nshi ilyacindama ilyo twingasambilila ku busesemo ubulanda pa “kamusambo akateku” akaishileba “umukedari uukalamba”?

¹¹ Ifyo tusambilila kuli ubu busesemo. Ubu busesemo ubusuma ubulanda pa “kamusambo akateku” akaishileba “umukedari uukalamba,” bulenga twa-asuka icipusho icacindama sana ica kuti, ni nani tulingile ukucetekela? Buwelewele ukucetekela amabuteko ya bantunse na bashilika ba yako aba maka. Pa kuti tucingililwe icine cine tufwile ukucetekela Imfumu Mesia, Yesu Kristu. Ubuteko bwa ku muulu e bwingacingilila fye abantunse.—Ukus. 11:15.

“Uwakwata Insambu”

12. Bushe Yehova alangile shani ukuti talabileko ku cipangano apangene na Davidi?

¹² Ukulingana ne fyo Lesa alondolwele ubwile ubwalelanda pa busesemo ubwa bakapumpe babili, Esekiele alishibe ukuti Imfumu Sidekia iishali ne cishinka iya mu lupwa lwa kwa Davidi ulwa ku bufumu, bali no kuifumya pa bufumu no kuisenda bunkole ku Babiloni. Nalimo kasesema aletontonkanya ukuti, ‘Cikaba shani ku cipangano Lesa apangene na Davidi ica kuti uwa mu lupwa lwakwe e ukateka umuyayaya?’ (2 Sam. 7:12, 16) Esekiele nga aletontonkanya sana pali ici cipusho ninshi tapali no kupita sana inshita ali no kusanga icasuko. Nalimo mu mwaka wa 611 ninshi Yesu talaisa pano isonde, mu mwaka walenga 7 ukutula apo abaYuda babelele bankole, ninshi Sidekia acili aleteka mu Yuda, Yehova alilandile na Esekiele. (Esek. 20:2) Yehova alengele Esekiele alanda ubusesemo na bumbi ubwalelanda pali Mesia ubwalengele ashininkishe ukuti Yehova talabileko ku cipangano apangene na Davidi. Lelo ubu ubusesemo bwalelanga ukuti Imfumu Mesia yali no kukwata insambu sha kuteka no kupyana Davidi.

13, 14. Finshi ubusesemo bwaba pali Esekiele 21:25-27 bulandapo, kabili bushe ubu busesemo bwafikilishiwe shani?

¹³ Ifyo ubu busesemo bulandapo. (Belengeni Esekiele 21:25-27.) Ukwabula no kupita mu mbali Yehova alibomfeshe Esekiele ukulanda ne “ntungulushi ya Israele . . . iyabipa,” pantu inshita ya kukanda iyi ntungulushi yalifikile. Yehova aebele iyi ntungulushi yabipa ukuti bali no kuifuula “icitambala” ne “cilongwe” (ifyaleimininako amaka ya bufumu). Lyena amabufumu ayali “panshi” bali no kuyemya, e lyo amabufumu ayali “pa muulu” bali no kuyabwesesha panshi. Amabufumu ayo baimishe pa muulu yalitwalilile ukuteka mpaka ‘uwakwata insambu sha kuteka aisa,’ kabili Yehova alimupeele Ubufumu.

¹⁴ Ukufikilishiwa kwa ubu busesemo. Ilyo baonawile Yerusalemu mu mwaka wa 607 ninshi Yesu talaisa pano isonde, ubufumu bwa baYuda ubwali pa muulu ubwaletekela mu Yerusalemu, balibubweseshe panshi ilyo abena Babiloni baonawile uyu musumba no kusenda Imfumu Sidekia iyo bafumishe pa bufumu. Lyena ilyo mu Yerusalemu mushali imfumu iyaleteka iyafumine mu lupwa lwa kwa Davidi, amabufumu ya bena fyalo ayali “panshi” baliyemishe kabili e yatendeke ukuteka pano isonde lelo yatekele fye pa nshita iinono. “Inshita ya Bena Fyalo” yapwile mu 1914 ilyo Yehova apeele Yesu Kristu Ubufumu. (Luka 21:24) Apo Yesu afumine mu lupwa lwa Mfumu Davidi “alikwete insambu” sha kuteka mu Bufumu bwa kwa Mesia.b (Ukute. 49:10) Kanshi ilyo Yehova abikile Yesu pa Bufumu, alicitile ifyo alaile Davidi ukuti akamupeela uwa kumupyana pa bufumu uukateka umuyayaya.—Luka 1:32, 33.

15. Cinshi cingalenga twacetekela sana Imfumu Yesu Kristu?

¹⁵ Ifyo tusambilila kuli ubu busesemo. Kuti twacetekela sana Imfumu Yesu Kristu. Cinshi twalandila ifi? Pantu ena alipusanako na bakateka abantunse abo abantu bengasala nelyo abengaibikapo abene pali bukateka. Yesu ena, ni Yehova amusala kabili ‘e wamupeele ubufumu,’ kabili alikwata insambu sha kuteka muli ubu Bufumu. (Dan. 7:13, 14) Ukwabula no kutwishika, tufwile ukucetekela iyi Mfumu iyo Yehova umwine asala!

“Umubomfi Wandi” Davidi Akaba “Kacema wa Shiko”

16. Bushe Yehova omfwa shani pa mpaanga shakwe, kabili bushe “bakacema ba mu Israele” abaliko mu nshiku sha kwa Esekiele balesunga shani impaanga sha kwa Yehova?

¹⁶ Yehova Kacema Wapulishamo alasakamana sana impaanga shakwe, e kutila abantu bakwe abamupepa pano isonde. (Amalu. 100:3) Nga apeela bakacema banono abantunse umulimo wa kusakamana impaanga shakwe, e kutila abo apeelako amaka ya kutungulula, alabikako sana amano pa kuti amone ifyo balesunga impaanga shakwe. Taleni tontonkanyeni ifyo Yehova afwile aumfwile pali “bakacema ba mu Israele” abaliko mu nshiku sha kwa Esekiele. Shilya intungulushi shaletekela abantu “mu bukali kabili mu bunkalwe.” Ifi fyalengele impaanga shilecula, kabili ishingi shalishiile ukupepa ukwasanguluka.—Esek. 34:1-6.

17. Bushe Yehova apokolwele shani impaanga shakwe?

¹⁷ Finshi Yehova ali no kucitapo? Aebele intungulushi sha mu Israele ishaletekela abantu mu bukali ukuti ‘nkamulubulwisha.’ Lyena alaile ukuti “nkapokolola impaanga shandi.” (Esek. 34:10) Yehova lyonse alafikilisha ifyo alaya. (Yosh. 21:45) Mu mwaka wa 607 ninshi Yesu talaisa pano isonde, Yehova alipokolwele impaanga shakwe ilyo alengele abena Babiloni abaishile mu kusansa umusumba, bapoka aba bakacema abali bakaitemwe amaka ya kuteka. Ilyo papitile imyaka 70, alilubwile abantu bakwe abalemupepa abali nge mpaanga, ukubafumya ku Babiloni no kubabwesesha ku calo cabo pa kuti bayebwesha ukupepa kwa cine. Lelo impaanga sha kwa Yehova tashali no kucingililwa pantu shali no kutwalilila ukutekwa na mabufumu ya bena fyalo. Pali no kupita imyaka iingi pa kuti “inshita ya bena fyalo” ipwe.—Luka 21:24.

18, 19. Busesemo nshi Esekiele aseseme mu 606 ninshi Yesu talaisa pano isonde? (Moneni icikope pa ntendekelo.)

¹⁸ Mu mwaka wa 606 ninshi Yesu talaisa pano isonde, nalimo ninshi papitile fye umwaka umo ukutula apo baonawilile Yerusalemu, kabili ninshi kucili imyaka iingi ukuti abena Israele balubuke ukufuma mu Babiloni umo bali bankole, Yehova alengele Esekiele ukusesema ubusesemo ubulanga ifyo Kacema Wapulishamo abika sana amano ku ficitikila impaanga shakwe. Ubu busesemo bulondolola ifyo Imfumu Mesia ikalacema impaanga sha kwa Yehova.

¹⁹ Ifyo ubu busesemo bulandapo. (Belengeni Esekiele 34:22-24.) Lesa “akemya kacema umo” uo umwine eta ukuti “umubomfi wandi Davidi.” Ifi Yehova abomfya amashiwi ya kuti “kacema umo” pamo ne shiwi lya kuti “umubomfi,” filangilila ukuti uyu Kateka takaleke abafuma mu lupwa lwa kwa Davidi bakalepyana pa bufumu, lelo ena e ukapyana pa cipuna ca bufumu ica kwa Davidi umuyayaya. Uyu Kacema kabili Kateka akalaliisha impaanga sha kwa Lesa, kabili “akaba intungulushi pali shena.” Yehova ‘akapangana icipangano ca mutende’ ne mpaanga shakwe. “Amapaalo yakalalokela pali [shena] nge mfula,” shikacingililwa, shikaba ne nsansa, kabili ifintu fikalashendela bwino. Cinshi twalandila ifi? Ni co kukaba umutende, abantu bakalaumfwana kabili pa bantu ne nama napo pakaba umutende.—Esek. 34:25-28.

20, 21. (a) Bushe ubusesemo bulanda pa “mubomfi wandi Davidi” bwafikilishiwe shani? (b) Bushe amashiwi Esekiele alandile pa “cipangano ca mutende” yalangilila shani ifikacitika ku ntanshi?

²⁰ Ukufikilishiwa kwa ubu busesemo. Ifi Lesa aitile uyu Kateka ati “umubomfi wandi Davidi,” filangilila ukuti ubu busesemo bulanda pali Yesu uwatuntwike muli Davidi kabili uwakwata insambu sha kuteka. (Amalu. 89:35, 36) Ilyo Yesu ali pe sonde, alecita ifyalelanga ukuti ali ni “kacema musuma” kabili ‘alifwilile impaanga.’ (Yoh. 10:14, 15) Nomba pali ino nshita uyu Kacema aba ku muulu. (Heb. 13:20) Mu mwaka wa 1914 Lesa alibikile Yesu pa Bufumu, kabili alimupeele umulimo wa kucema no kuliisha impaanga sha kwa Lesa pano isonde. Ilyo papitile fye inshita iinono, mu mwaka wa 1919, iyi Mfumu yalisontele “umusha wa cishinka kabili uwashilimuka” pa kuti aleliisha “aba mu ng’anda,” e kutila ababomfi ba kwa Lesa aba cishinka abakwata isubilo lya kwikala ku muulu na bakwata isubilo lya kwikala pe sonde. (Mat. 24:45-47) Apo Kristu alatungulula umusha wa cishinka, uyu musha alitwalilila ukupekanishisha impaanga sha kwa Lesa ifya kulya fya ku mupashi. Ifi ifya kulya fyalilenga muli paradaise ya ku mupashi iiya ilekulilako fye mwaba umutende no mutelelwe.

²¹ Bushe amashiwi Esekiele alandile pa “cipangano ca mutende” na pa fyo amapaalo yakalaloka fye nge mfula yalangilila shani ifikacitika ku ntanshi? Mu calo cipya icileisa, “icipangano ca mutende” cikalenga abapepa Yehova mu nshila iyasanguluka pe sonde bakapaalwe nga nshi. Ilyo isonde lyonse likaba paradaise, abantu ba cishinka bakalaikala mu mutende pantu takwakabe inkondo, bumpulamafunde, ifipowe, ukulwala nelyo inama mpanga ishikalasansa abantu. (Esa. 11:6-9; 35:5, 6; 65:21-23) Bushe tamutemenwe ukwishiba ukuti kukaba umweo wa muyayaya muli paradaise pe sonde, umo impaanga sha kwa Yehova “shikalaikala umutende ukwabula nangu umo uwa kushitiinya”?—Esek. 34:28.

22. Bushe Yesu omfwa shani pa mpaanga sha kwa Yehova, kabili bushe bakacema banono bafwile ukulamupashanya shani?

²² Ifyo tusambilila kuli ubu busesemo. Yesu alabikako sana amano ku ficitikila impaanga nga filya fine Wishi na o abikako sana amano. Uyu Kacema kabili Imfumu alashininkisha ukuti impaanga sha kwa Wishi lyonse shilelya ifya kulya fya ku mupashi kabili shileikala umutende no mutelelwe muli paradaise ya ku mupashi. Ala tulatemwa nga nshi ifi kateka wa musango uyu atusakamana. Apo baeluda ni bakacema banono, nabo bafwile ukulabika sana amano ku mpaanga nga fintu Yesu acita. Baeluda bafwile ‘ukulaitemenwa’ no ‘kulafwaisha’ ukucema impaanga, kabili bafwile ukulacita ifingalenga impaanga shalabapashanya. (1 Pet. 5:2, 3) Eluda tafwile ukulacusha impaanga nangu imo iya kwa Yehova! Ibukisheni ifyo Yehova aebele bakacema ba mu Israele abali abakali mu nshiku sha kwa Esekiele, abebele ati: ‘Nkamulubulwisha.’ (Esek. 34:10) Kacema Wapulishamo alabikako sana amano ku fyo bakacema banono basunga impaanga shakwe. Umwana wakwe na o alabikako sana amano.

“Davidi Umubomfi Wandi Akaba Intungulushi Yabo Umuyayaya”

23. Finshi Yehova alaile ifyalelanda pa kulenga uluko lwa bena Israele lwaikatana, kabili bushe afikilishe shani ifyo alaile?

²³ Yehova afwaya ababomfi bakwe baleba abaikatana ilyo balemubombela. Mu busesemo ubulanda pa kubwesesha abena Israele ku calo cabo, Lesa alaile ukuti akalonganika abantu bakwe, e kutila abaleimininako ubufumu bwa mikowa ibili iya baYuda e lyo no bufumu bwa mikowa 10 iya bena Israele, kabili ali no kubekatanya na kabili pa kuti babe “uluko lumo” kwati aleikatanya “utumuti tubili” pa kuti tube “akamuti kamo” mu minwe yakwe. (Esek. 37:15-23) Pa kufikilisha ubu busesemo, Lesa alibweseeshe uluko lwa bena Israele ulwali ulwaikatana ku Calo ca Bulayo mu mwaka wa 537 ninshi Yesu talaisa pano isonde.c Lelo abantu mu calo cipya bakekatana sana ukucila na pa fyo abena Israele baikatene kabili bakekatana umuyayaya. Pa numa Yehova alaya ukwikatanya abena Israele, aebele Esekiele ubusesemo pa fyo uukaba Kateka akalenga bakapepa ba cine bakekatane mwi sonde lyonse umuyayaya.

24. Bushe Yehova alondolola shani Kateka wa mu Bufumu bwa kwa Mesia, kabili bushe iyi Mfumu ikateka ukufika lilali?

²⁴ Ifyo ubu busesemo bulandapo. (Belengeni Esekiele 37:24-28.) Yehova na kabili abwekeshapo ukwita Kateka wa mu Bufumu bwa kwa Mesia ati, “umubomfi wandi Davidi,” “kacema umo,” e lyo no kuti “intungulushi,” nomba uno muku Yehova aita uyu Uwalaiwe no kuti “imfumu.” (Esek. 37:22) Bushe iyi Mfumu ikateka ukufika lilali? Iyi Mfumu ikatwalilila fye ukuteka. Ishiwi babomfya ilya kuti umuyayaya litulanga fye ukuti ilyo iyi mfumu ikalateka abantu bakapaalwa umuyayaya.d Ilyo ikalateka abantu bakekatana. Ilyo iyi “mfumu imo ikalateka,” aba cishinka abo ikalateka “bakalakonka ubupingushi bumo bwine” kabili “bakekala [pamo] mu calo.” Ilyo iyi Mfumu ikalateka, abantu bakapalama sana kuli Yehova Lesa. Yehova akapangana “icipangano ca mutende” na bantu abo iyi Mfumu ikalateka. Yehova akaba Lesa wabo nabo bakaba abantu bakwe, kabili icifulo cakwe ica mushilo, cikaba “pali bena umuyayaya.”

25. Bushe ubusesemo bulanda pa Mfumu Mesia bwafikilishiwe shani?

²⁵ Ukufikilishiwa kwa ubu busesemo. Mu 1919, “kacema umo,” Imfumu Mesia, Yesu Kristu alilengele abasubwa abaali aba cishinka baba abaikatana. Pa numa, ababa mwi “bumba ilikalamba” abafuma “mu nko shonse, mu mitundu yonse, mu mishobo yonse na mu ndimi shonse,” balikatene na Bena Kristu basubwa. (Ukus. 7:9) Abasubwa ne bumba likalamba baisaba “umukuni umo,” kabili bakwata “kacema umo.” (Yoh. 10:16) Bonse abakwata isubilo lya kwikala ku muulu na bakwata isubilo lya kwikala pe sonde balomfwila Yehova, kabili balakonka ifyo apingula. Ifi fyalenga bonse babe muli paradaise ya ku mupashi kabili babe aba bwananyina abaikatana mwi sonde lyonse. Yehova alilenga baba no mutende kabili icifulo cakwe ica mushilo, e kutila ukupepa ukwasanguluka, kwaba mu kati kabo. Yehova e Lesa wabo kabili balomfwa icilumba ifi bamupepa pali ino nshita, kabili bakalamupepa umuyayaya!

26. Finshi mufwile ukulacita pa kuti muli paradaise ya ku mupashi muleba ukwikatana?

²⁶ Ifyo tusambilila kuli ubu busesemo. Twalipaalwa ifi twaikatana na ba bwananyina mwi sonde lyonse mu kupepa Yehova mu nshila iyasanguluka. Na lyo line, na ifwe tulingile ukulacita ifingalenga twatwalilila ukuba abaikatana. Kanshi bonse fye tulingile ukulacitapo fimo pa kuti tutwalilile ukuba abaikatana mu fyo twasuminamo e lyo na mu fyo tucita. (1 Kor. 1:10) E ico, tulya ifya kulya fya ku mupashi fimo fine, tukonka fimo fine ifyo Amalembo yalanda pa kuba ne mibele isuma, kabili bonse tulabombako umulimo uwacindama sana uwa kubila pa Bufumu e lyo no kulenga abantu baba abasambi. Nomba icikalamba sana icilenga tuleba abaikatana, kutemwa. Nga tuleibikilishako pa kuti tube no kutemwa e lyo ne mibele imbi iilanga ukuti twaliba no kutemwa pamo nga, ukulangulukilako, uluse e lyo no kweleela, tulaba abaikatana. Baibo ilanda ukuti “ukutemwa kulalenga abantu baba abaikatana bwino.”—Kol. 3:12-14; 1 Kor. 13:4-7.

27. (a) Bushe mumfwa shani pa masesemo ayalanda pali Mesia ayaba mwi buuku lya kwa Esekiele? (b) Finshi tukasambilila mu fipandwa fikonkelepo?

²⁷ Tulatasha nga nshi pali aya masesemo ayalanda pali Mesia ayaba mwi buuku lya kwa Esekiele! Ukubelenga no kutontonkanya sana pali aya masesemo kulatusambilisha ukuti, tulingile ukucetekela Imfumu yesu, Yesu Kristu iyo twatemwa sana. Yalikwata insambu sha kuteka, ilatucema bwino kabili ikalenga tukabe abaikatana umuyayaya. Ala twalipaalwa nga nshi ifi tutekwa ne Mfumu Mesia! Natuleibukisha ukuti aya masesemo ayalanda pali Mesia, yaba pa masesemo ayaba mwi buuku lya kwa Esekiele ayalanda sana pa kubwesha ukupepa ukwasanguluka, e lyo na pa kulenga abantu ba kwa Lesa baba abaikatana na kabili. Yesu e o Yehova abomfya pa kulonganika abantu bakwe no kubwesha ukupepa ukwasanguluka pali bena. (Esek. 20:41) Mu fipandwa fikonkelepo muli cino citabo, tuli no kulanda pali ili lyashi ilisuma ililanda pa kulenga ifintu fyaba nge fyo fyali pa kubala. Lyena tukamona ne fyo balondolola ili lyashi mwi buuku lya kwa Esekiele.