Fimo Ifyo Twa-alulako Pa Fyo Twaishibe
Pa myaka iingi, Ulupungu lwa kwa Kalinda lwalilanda pa fingi ifyo twa-alulako pa fyo twaishibe pa busesemo bwa kwa Esekiele. Na muli cino citabo citila Yehova Asuka Abwesha Ukupepa Kwasanguluka!, mwaliba na fimbi ifyo twa-alulako. Moneni nga kuti mwa-asuka amepusho yakonkapo.
Bushe ifinso 4 ifyo ifya mweo fyakwata fimininako finshi?
Ifyo twaishibe kale: Cila cinso pa finso 4 ifyo ifya mweo nelyo bakerubi bakwata, cimininako imibele imo pa mibele 4 iyacindamisha iya kwa Yehova.
Ifyo nomba twaishiba: Nangu ca kuti icinso cimo na cimo ica fya mweo cimininako imibele imo pa mibele 4 iyacindamisha iyo Yehova akwata, ifi ifinso nga fyamonekela pamo fimininako imibele yonse iyo Yehova akwata. Na kabili ifi ifinso filalenga twatontonkanya pa fyo Yehova acindama sana e lyo na pa fyo akwatisha amaka.
Icalengele twalule: Mu Cebo ca kwa Lesa ilingi line inamba 4 imininako icintu icalingana mu mbali shonse nelyo icapwililika. Kanshi ifi ifinso 4 nga fyamonekela pamo, tafilanga fye imibele 4 iyacindamisha iya kwa Yehova—lelo filalangilila ne mibele na imbi iyo Yehova akwata. Ifi finso fya fibumbwa ifimininako ubucindami, ukukosa, e lyo na maka. Na lyo line, ifinso fyonse 4 ifyo cila kerubi akwata ifimininako ifibumbwa fya maka, fyaba pe samba lya cipuna ca bufumu ica kwa Yehova. Ifi fyaba pe samba lya cipuna ca bufumu, filangilila ukuti Yehova e Kateka Wapulamo uwa fintu fyonse.
Nani uo umwaume uwali na ko kalemba abikamo inki emininako?
Ifyo twaishibe kale: Umwaume uwali na ko kalemba abikamo inki emininako abasubwa abacili pano isonde. Ilyo Abena Kristu basubwa babila imbila nsuma no kulenga abantu baba abasambi, ciba kwati baleshila akashilwa pa mpumi sha bantu abesa mu kuba mwi “bumba ilikalamba.”—Ukus. 7:9.
Ifyo nomba twaishiba: Umwaume uwali na ko kalemba abikamo inki, emininako Yesu Kristu. Mu nshita ya “bucushi ubukalamba,” Yesu akashila aba mwi bumba likalamba akashilwa ilyo akabapingula ukuti ni mpaanga.—Mat. 24:21.
Icalengele twalule: Yehova alipeela Umwana wakwe umulimo wa kupingula. (Yoh. 5:22, 23) Ukulingana na Mateo 25:31-33, Yesu e ukapingula ukuti aba ni “mpaanga” e lyo aba ni “mbushi.”
Bushe Ohola na Oholiba, abana bankashi abali bacilende baleimininako imipepele ya batila Bena Kristu, baKatolika e lyo na baProtestanti?
Ifyo twaishibe kale: Ohola (Samaria, umusumba uukalamba uwa mu Israele), umukalambapo, emininako imipepele ya baKatolika; Oholiba (Yerusalemu, umusumba uukalamba uwa mu Yuda), umwaicepo emininako imipepele ya baProtestanti.
Ifyo nomba twaishiba: Aba abana bankashi abali bacilende tabemininako imipepele iili yonse iya batila Bena Kristu. Na lyo line ifi balandapo pali aba banakashi babili cilalenga twaumfwikisha ifyo Yehova omfwa nga ca kuti abantu bakwe aba cishinka bacita bucilende bwa ku mupashi. Ifi fine e fyo omfwa na pa mipepele yonse iya bufi.
Icalengele twalule: Mu Malembo tamwaba ifilanga ukuti Ohola na Oholiba baleimininako imipepele ya batila Bena Kristu. Israele na Yuda bali nga bakashi ba kwa Yehova aba cishinka, lelo imipepele ya batila Bena Kristu tayatala aibapo ngo mukashi wa kwa Yehova uwa cishinka. Ifi balinganya abantu ba kwa Lesa abashali ne cishinka kuli bacilende mu fipandwa 16 na 23 ifye buuku lya kwa Esekiele, filenga twakwata isubilo lya kuti Yehova akalubula abantu bakwe, kabili akalenga ifintu fikabe nge fyo fyali pa kubala. Imipepele ya batila Bena Kristu tayakwata isubilo lya kulubuka nga filya fine caba ku mipepele yonse iyaba muli Babiloni Mukalamba.
Bushe imipepele ya batila Bena Kristu, e yo Yerusalemu iyali iisangu yaleimininako?
Ifyo twaishibe kale: Yerusalemu iishali ne cishinka kuli Yehova imininako imipepele ya batila Bena Kristu. Kanshi filya baonawile Yerusalemu fyalelangilila ifyo bakonaula imipepele ya batila Bena Kristu.
Ifyo nomba twaishiba: Ifyalecitika mu Yerusalemu ukubikako fye no kupepa utulubi na mafisakanwa ayali fye mpanga yonse, fitwibukishako ificitika mu mipepele ya batila Bena Kristu, lelo pali ino nshita tatulanda ukuti Yerusalemu yaleimininako imipepele ya batila Bena Kristu.
Icalengele twalule: Takwaba Amalembo ayali yonse ayo twingabomfya pa kulanda ukuti imipepele ya batila Bena Kristu e yo Yerusalemu yaleimininako. Ukupusanako na Yerusalemu, imipepele ya batila Bena Kristu yena tayatala aipepapo Lesa mu nshila iyasanguluka. Nangu ca kuti Yehova alibelele Yerusalemu uluse pa nshita imo, takabelele uluse imipepele ya batila Bena Kristu.
Bushe icimonwa ca mafupa ayauma ayali mu mpanga iyabatama cafikilishiwe shani?
Ifyo twaishibe kale: Mu mwaka wa 1918 abasubwa abo balecusha balibasendele bunkole muli Babiloni Mukalamba, kabili ilyo bali mulya, bali nga bafwa pantu tabalebombesha. Ilya inshita iinono iyo bali bankole yapwile mu mwaka wa 1919 ilyo Yehova alengele batendeka na kabili ukubila sana pa Bufumu bwakwe.
Ifyo nomba twaishiba: Abena Kristu basubwa bali nga bafwa muli bunkole bwa ku mupashi pa nshita iitali, kabili bali bankole kale sana ninshi no mwaka wa 1918 taulafika. Ubu bunkole bwatampile mu myaka ya ba 100 ninshi Yesu alibwelelamo ku muulu, kabili bwapwile mu mwaka wa 1919. Palipitile imyaka iingi pa kuti bafume muli bunkole nga filya fine Yesu alandile mu cilangililo ca ngano ne fyani.
Icalengele twalule: Abena Israele bali muli bunkole pa nshita iitali. Baali bankole ukutula mu mwaka wa 740 ninshi Yesu talaisa pano isonde, kabili babalubwile mu mwaka wa 537 ninshi Yesu talaisa pano isonde. Filya ubusesemo bwa kwa Esekiele bulondolola ukuti amafupa yali “ayauma” nelyo “ayauma icine cine,” filangilila ukuti abo aya amafupa yaleimininako balifwile pa nshita iitali sana. Na kabili ubusesemo bulondolola ukuti abafwile tabaishileba aba mweo apo pene fye, lelo baile baleba no mweo panono panono. Kanshi pali no kupita inshita pa kuti babe aba mweo.
Bushe ukubika utumuti tubili pamo pa kuti tube akamuti kamo kwalola mwi?
Ifyo twaishibe kale: Ilyo kwali Inkondo ya Calo iya Kubalilapo, abasubwa abali pano isonde tabali abaikatana pa nshita imo, lelo abasubwa abali ne cishinka balishileba abaikatana na kabili mu mwaka wa 1919.
Ifyo nomba twaishiba: Ubusesemo bulangilila ukuti Yehova akalenga abamupepa bakabe abaikatana. Mu kupita kwa nshita, pa numa ya mwaka wa 1919 abantu abengi abakwata isubilo lya kwikala pano isonde bali-ilundile ku Bena Kristu basubwa. Ababa muli aya amabumba yabili balikatana kabili bapepela Yehova pamo.
Icalengele twalule: Ubusesemo tabulanda ukuti akamuti kamo kalikontweke e lyo pa numa bakasuntinkanya kaba akamuti kamo. Kanshi ubusesemo tabulanda pa ba mwi bumba limo ukuti bali no kupaatukana e lyo pa numa baisaikatana na kabili. Lelo bulondolola ifyo amabumba yabili yali no kwikatana.
Bushe Goge wa ku Magoge nani?
Ifyo twaishibe kale: Goge wa ku Magoge e shina na limbi ilyaishileba ilya kwa Satana pa numa bamutamfya ku muulu.
Ifyo nomba twaishiba: Goge wa ku Magoge ni nko sha pano isonde ishikomana akapi mu nshita ya bucushi bukalamba no kusansa abapepa Yehova mu nshila iyasanguluka.
Icalengele twalule: Ifi ubusesemo bulanda pali Goge ukuti ifyuni fikamulya no kuti bakamupeela incende ya kumushiikamo pano isonde, filenga twaishiba ukuti Goge te cibumbwa ca mupashi. Na kabili ifyo ubu busesemo bulanda pa fyo Goge akasansa abantu ba kwa Lesa, fyalipalana ne fyo balanda mwi buuku lya kwa Daniele ne lya Ukusokolola pa fyo inko shikasansa abantu ba kwa Lesa.—Dan. 11:40, 44, 45; Ukus. 17:14; 19:19.
Bushe itempele ilyo Esekiele amwene kabili ilyo bamutandeshepo lyali litempele ilikalamba ilya ku mupashi ilyo Paulo alondolwele ninshi palipita imyaka iingi nga nshi?
Ifyo twaishibe kale: Itempele Esekiele amwene mu cimonwa e tempele lya ku mupashi ilyo umutumwa Paulo alondolwele.
Ifyo nomba twaishiba: Itempele Esekiele amwene te tempele lya ku mupashi ilyatendeke ukubako mu mwaka wa 29 ninshi Yesu alibwelelamo ku muulu, lelo ili itempele lilangilila ifyo ukupepa kwasanguluka uko balandapo mu Mafunde ya kwa Mose kwali no kubako na kabili ilyo abaYuda bali no kufuma muli bunkole. Pa kulondolola itempele lya ku mupashi, Paulo abikile amano ku milimo Yesu, Shimapepo Mukalamba abombele ukutendekela mu mwaka wa 29 ukufika mu mwaka wa 33. Itempele Esekiele amwene mu cimonwa, umo bashalumbulapo shimapepo mukalamba, lilanda sana pa kulenga ifintu fyaba nge fyo fyali pa kubala ukwatendeke mu mwaka wa 1919. Kanshi tatulanda ukuti fyonse ifyali mwi tempele lyali mu cimonwa ico Esekiele amwene na filya bapimine itempele fyali busesemo ubwaleimininako fimo. Lelo tubika sana amano ku fyo icimonwa Esekiele amwene citusambilisha pa mafunde ya kwa Yehova ayalanda pa kupepa kwasanguluka.
Icalengele twalule: Kwaliba ifyacindama ifyalenga itempele Esekiele amwene mu cimonwa lipusaneko ne tempele lya ku mupashi. Ku ca kumwenako, pe tempele Esekiele amwene baletuulapo amalambo ya nama ayengi, lelo pe tempele lya ku mupashi lilambo fye limo batuulapo, kabili balituulila fye “umuku wa limo.” (Heb. 9:11, 12) Ilyo kwali imyaka iingi ukuti Kristu ese, inshita ya kuti Yehova alenge icine icashika icilanda pe tempele lya ku mupashi cishibikwe, yali tailafika.