Abana Bankashi Abali Bacilende

Muli Esekiele icipandwa 23, mwaliba ubupingushi ubwa maka ubo Yehova apingwile abantu bakwe pa fyo bashali ne cishinka kuli ena. Ifingi ifyaba muli ici cipandwa fyalipalana ne fyaba mu cipandwa 16. Nga filya icipandwa 16 calandapo, icipandwa 23 naco cilabomfya icilangililo ca bacilende. Yerusalemu na Samaria babalandapo nga bana nkashi, Yerusalemu e mwaice e lyo Samaria e mukalamba. Ifipandwa fyonse fibili filalanga ifyo umwaice aishiletendeka ukukonkelela umukalamba wakwe mu kucita bucilende. Lelo umwaice ali-isacila umukalamba wakwe mu kucita ifyabipa na mu kucita bucilende. Mu cipandwa 23, Yehova alinike aba bana bankashi amashina: Ohola e walipo umukalamba, e kutila Samaria umusumba uukalamba uwali mu bufumu bwa mikowa 10 ubwa Israele; Oholiba e wali umwaice, e kutila Yerusalemu, umusumba uukalamba uwa mu Yuda.a—Esek. 23:1-4.

Kwaliba na fimbi ifyapalana muli ifi ifipandwa fibili. Nalimo ifyaishibikwa sana ni ifi: Pa kubala aba bacilende bonse bali nga abakashi ba kwa Yehova e lyo pa numa bamupondokela. Na kabili, ifi ifipandwa fyalilanda pe subilo. Icipandwa 23 tacalondolola sana pe subilo lya kuti bakalubuka, lelo ifyo calandapo fyalipalana sana ne fyaba mu cipandwa 16. Yehova atile: “Nkapwisha ifya nsoni ifyo ucita na bacilende.”—Esek. 16:16, 20, 21, 37, 38, 41, 42; 23:4, 11, 22, 23, 27, 37.

Bushe Ohola na Oholiba Baleimininako Imipepele ya Batila Bena Kristu?

Kale, mu mpapulo shesu twalelondolola ukuti Ohola na Oholiba, bemininako imipepele ya batila Bena Kristu, e kutila ba Katolika na ba Protestanti. Na lyo line, pa numa ya kupepelapo, ukutontonkanyapo sana e lyo no kufwailapo ifyebo na fimbi calenga twakwata aya mepusho. Bushe imipepele ya batila Bena Kristu yalibapo ngo mukashi wa kwa Yehova mu nshila iili yonse? Bushe yalipangenepo nankwe icipangano icili conse? Awe nakalya. Imipepele ya batila Bena Kristu tayaliko ilyo Lesa apangene “icipangano cipya” na Israele ya ku mupashi umo Yesu ali kawikishanya; kabili imipepele ya batila Bena Kristu tayalimo muli lulya luko lwa ku mupashi ulwa Bena Kristu basubwa. (Yer. 31:31; Luka 22:20) Imipepele ya batila Bena Kristu yatendeke ilyo abatumwa bonse bapwile ukufwa. Iyi imipepele yaishilebako mu myaka ya ba 300 ninshi Yesu alibwelelamo ku muulu. Ici icilonganino ca basangu cali icakowela kabili abalimo bali “fyani,” e kutila Abena Kristu ba bufi abo Yesu alandilepo mu cilangililo ca ngano ne fyani.—Mat. 13:24-30.

Na cimbi icilanga ukuti aba banakashi tabemininako imipepele ya batila Bena Kristu ca kuti: Yehova ali no kulubula Yerusalemu na Samaria abashali ne cishinka nga ca kuti balapila. (Esek. 16:41, 42, 53-55) Bushe Baibo yalilandapo ukuti imipepele ya batila Bena Kristu nayo bakailubula? Awe mukwai! Imipepele ya batila Bena Kristu tayakwata isubilo lya kulubuka nga filya fine caba ku mipepele yonse iyaba muli Babiloni Mukalamba.

Kanshi Ohola na Oholiba tabemininako imipepele ya batila Bena Kristu. Na lyo line ifi balandapo pali aba banakashi babili, filalenga twaumfwikisha icintu cimo icacindama sana: ifyo Yehova omfwa pa bantu abashilanda ifya cine pe shina lyakwe ilya mushilo kabili abashikonka amafunde yakwe ayalanda pa kupepa ukwasanguluka. Imipepele ya batila Bena Kristu e icita sana ifi, pantu amaceici ayengi ayaba muli iyi mipepele yatila yapepa Lesa uo Baibo yalandapo. Icacilapo ukubipa ca kuti batila, Umwana wa kwa Yehova uo atemwa sana, Yesu Kristu e ubatungulula. Balafisa icine ilyo balanda ukuti Yesu ni lesa umo pali balesa batatu abapanga Lesa umo, ne fi bashumfwila ifunde ilya kwa Yesu ilya kuti “mwiba aba muli ici calo.” (Yoh. 15:19) Ifi imipepele ya batila Bena Kristu yatwalilila ukupepa ifilubi no kuibika mu fikansa fya calo, filanga ukuti yaliba sana ulubali lwa kwa “cilende mukalamba.” (Ukus. 17:1) Ukwabula no kutwishika, iyi mipepele nayo ine bakayonaula ilyo bakonaula imipepele yonse iya bufi!