Bushe Imipepele Ya Batila Bena Kristu, E Yo Yerusalemu Yaleimininako?

Kale mu mpapulo shesu twalelondolola ukuti, imipepele ya batila Bena Kristu e yo Yerusalemu iyaishileba iisangu yaleimininako. Ifyalecitika mu Yerusalemu ukubikako fye no kupepa utulubi na mafisakanwa ayali fye mpanga yonse, fitwibukishako ificitika mu mipepele ya batila Bena Kristu. Lelo pali ino nshita mu mpapulo shesu ukubikako fye na muli luno lwine mulebelenga, tatulanda ukuti ubusesemo bumo buleimininako fimo, kano fye apo Baibo ilandile ukuti buleimininako fimo. Bushe kwaliba Amalembo ayalanga ukuti imipepele ya batila Bena Kristu e yo Yerusalemu yaleimininako? Awe.

Tontonkanyeni pali ifi: Mu Yerusalemu pa nshita imo e mwalebela ukupepa kwasanguluka, lelo pa numa, abaleikalamo baishileba abasangu. Nomba mu mipepele ya batila Bena Kristu mwena tamwatala amubapo ukupepa kwasanguluka. Ukutula fye apo imipepele ya batila Bena Kristu yatendekele mu myaka ya ba 300 ninshi Yesu alibwelelamo ku muulu, muli iyi mipepele basambilisha fye ifisambilisho fya bufi.

Na cimbi ca kuti pa numa abena Babiloni baonaula Yerusalemu, Yehova alipaalile uyu musumba na kabili, kabili mwaishileba ukupepa kwa cine na kabili. Lelo Lesa tapaalapo imipepele ya batila Bena Kristu, kabili ilyo bakayonaula mu bucushi bukalamba, tayakatale aibako na kabili.

Ukulingana ne fi twalandapo, finshi twingasondwelela? Ilyo tulesambilila pa masesemo ya mu Baibo ayafikilishiwe pali Yerusalemu, kuti twatila ‘ifi e ficitika na mu mipepele ya batila Bena Kristu muno nshiku.’ Lelo takwaba Amalembo ayali yonse ayo twingabomfya pa kulanda ukuti imipepele ya batila Bena Kristu e yo Yerusalemu yaleimininako.